Yoa. 6 - Ebaibul

Kisimuj Yesu ŋituŋa ŋalipyo ŋakan

¹ Kedau ŋun, tolot Yesu tolunyar ekekwaye anam ŋina a Galileya, anam ŋina anyaritae Tiberia.

² Totupakis ŋituŋa ŋulu alalak Yesu, anerae keris ikes kiŋolikis ŋakujuwuanisya ŋuna etaŋaleunio Yesu ŋituŋa ŋulu adyakasi.

³ Apotu Yesu ka ŋikeekasyomak todokasi kidiama emukura, kiboikinos.

⁴ Aapuunit apaki ŋina a ŋasuban a Ŋiyudayan ŋina enyaritae Paska.

⁵ Kireo Yesu, kiŋolik ŋituŋa ŋulu alalak eponito neni keŋ. Kiŋit iŋes Pilipo tema, “Ai mono tokona ikipedorya iwon agyelunia ŋamugati ŋadi, ikotere ŋituŋa lu daadaŋ kimuja?”

⁶ (Eŋisit iŋes Pilipo ŋakiro ŋun aŋuna ka arosya iŋes, anerae ayeni Yesu elope ŋuna itiyakini.)

⁷ Toboŋok Pilipo tema, “Kerae tari toyakas ŋidinari ŋamiae ŋaarei, pa kitemokin akigyel ŋamugati ŋuna eryamuni ŋinituŋanan adio cici”

⁸ Abu epei alokasyomak keŋ, ŋolo anyaritae Anderia, lokaato a Simoni Petero, tolimok Yesu tema,

⁹ “Eyai nege edya ŋolo eyakar ŋamugati ŋakan ka ŋikolya ŋiarei. Nai epedori mono akimuj ŋin akiryam ŋituŋa lu daadaŋ a?”

¹⁰ Tolimok Yesu ŋikasyomak tema, “Kisiboikisi ŋituŋa!” (Alibit nen asebuk ŋinya.) Kiboikinos ŋituŋa daadaŋ; arae ŋikilyok ŋalipyo ŋakan.

¹¹ Tolemu nai Yesu ŋamugati, tolakar neni ka Akuj, tokorak ŋituŋa ŋulu eboiyete, tokorarae ŋikolya daŋ; toryamu a ŋinituŋanan etyae ŋolo eitanit iŋes.

¹² Ani kimwoko ŋituŋa, tolimok Yesu ŋikasyomak keŋ tema, “Tocunutu ŋapiyanunet daadaŋ, ikotere nyicanicanaar.”

¹³ Kiriraut nai ikes ŋapiyanunet ŋuna apotu kilelebun ŋaditae ŋatomon ka ŋaarei, anamugati a ŋunakan a ŋuna emujete ŋituŋa.

¹⁴ Ani iŋolikinete ŋituŋa akujuwuanut ŋina abu Yesu kitiya, kisyakis atemar, “Kire erae lo ekadwaran ŋolo itemokino bu nakwap!”

¹⁵ Ayeni Yesu atemar acamito ŋituŋa areikin iŋes ka agogoŋu aruwor erwosit kec, aŋun abu tosi tolot lokamukumukui.

Torotok Yesu alokidiama nakipi

¹⁶ Ani ewari, toloto ŋikasyomak a Yesu nanam,

¹⁷ todoka ataker toloto ekekwaye tari lotaun a Kaperenaum. Kiryoniar akwap eriŋa Yesu nyebuno neni kec.

¹⁸ Tokut ekuwuam ŋoloti agogoŋon ananam, kilolik ŋakipi.

¹⁹ Kedaut ŋikasyomak amiar ataker ŋakilomitae ŋuna aapiyarito ŋakan kori ŋakanikapei, apotu kiŋolikis Yesu elosi alokidiama nakipi, ebunit keapuu nataker, ido tobul ikes nooi.

²⁰ Nai tolimok Yesu ikes tema, “Nyikibul, erae ayoŋ.”

²¹ Tocamut nai ikes, kitodokut iŋes nataker, todolo atipei neni alosete.

Kiwara ŋituŋa Yesu

²² Taparacu keŋ, apotu ŋituŋa ŋulu aya ekekwaye anam toanyut atemar apeitaker bon ayai nen. Ayenete ikes atemar pa abu Yesu todoka nataker, nai ŋikeekasyomak bon adokarito.

²³ Kepotu ŋatakerin ŋuna alo Tiberia todolut diyete neni emuja asepic ŋina a ŋituŋa ŋamugati, kedau Yesu alakar neni ka Akuj.

²⁴ Ani iŋolikinete ŋituŋa emam Yesu ka ŋikeekasyomak a nen, todoka ŋatakerin ŋun, toloto Kaperenaum akiwarit Yesu.

Yesu iŋes erae akimuj ŋina ka akiyar

²⁵ Ani eryamunete ŋituŋa Yesu alokekwaye anam, kiŋita iŋes temasi, “Eketataman, ori idolunio iyoŋ nege?”

²⁶ Toboŋok Yesu ikes tema, “Akalimokini ayoŋ iyes kire atemar, ikiwarito iyes ayoŋ meere aŋuna iponiata toyenut apolou a ŋakujuwuanisya, nai erae aŋuna iponiata kimuja ŋamugati, kimwoko.

²⁷ Nyitiyata aŋuna ka akimuj a ŋina ebosiyari, nai kitiyata toryamut akimuj ŋina eropari tari nakiyar ŋina nyedaun, ŋina ikiini iyes Lokoku a Ituŋanan. Anerae neni keŋ iwuakinit Akuj Papa emacar ŋolo eminar iŋes.”

²⁸ Kiŋita nai ikes Yesu temasi, “Ikikokini isua ai, ikotere kitiyaere etic ŋolo ka Akuj?”

²⁹ Toboŋok nai Yesu ikes tema, “Etic ŋolo ka Akuj iŋes lo: itemokino tonupa ŋolo iyakuunit iŋes.”

³⁰ Kiŋita ŋituŋa Yesu temasi, “Anikujuwuanut ibuni iyoŋ akitiyakin, eŋolikisi isua, ido onupa ŋakiro kon?

³¹ Apotu koloŋ atapapaa kosi kimuja Manna analoŋisat ikwapei igiritere Nakigireta ebe, ‘Abu iŋes inak ikes akimuj ŋina anakuj kimuja.’ ”

³² Tolimok Yesu ikes tema, “Akalimokini ayoŋ iyes kire atemar, pa arae Moses ikiini iyes akimuj ŋina anakuj, nai Papa kaŋ ikiinakini iyes akimuj ŋina a kire ŋina anakuj.

³³ Anerae akimuj ŋina ka Akuj iŋes ŋina ebunit anakuj ainakin akwap akiyar.”

³⁴ Temasi ikes iŋes, “Ekapolon, inanakinetei isua jwi jwi akimuj ŋin.”

³⁵ Tolimok Yesu ikes tema, “Arae Ayoŋ akimuj ŋina ka akiyar. Ŋini enyami akimuj ŋin, nyenyami akoro jik ka ŋini akanupi ayoŋ, nyenyami akure jik.

³⁶ Aris ayoŋ kakalimok iyes atemar tari daŋ kikianyunito ayoŋ, nyenupa iyes ayoŋ.

³⁷ Ituŋanan daadaŋ ŋini akainit ayoŋ Papa kaŋ ebuni neni kaŋ, nyeritari jik ayoŋ iŋes ebuni neni kaŋ;

³⁸ anerae nyabunit ayoŋ anakuj akitiya acamit kaŋ, nai akitiya acamit a ŋolo ekeyakuunit ayoŋ.

³⁹ Acamit a ŋolo ekeyakuunit ayoŋ, iŋes na: nyitemokino ayoŋ etooliyo idiotuŋanan ŋini akainaki iŋes ayoŋ; nai akilo, eteyaru ikes Akoloŋit ŋina esidyon.

⁴⁰ Ŋuna ecamit Papa kaŋ ikes nu: ŋini eanyuni ka tonup Lokoku, eryamuni akiyar ŋina nyedaun. Eteyaruni ayoŋ iŋes Akoloŋit ŋina esidyon.”

⁴¹ Kisyakis Ŋiyudayan akiŋuruŋura aŋuna a Yesu, anerae abu iŋes tema, “Arae Ayoŋ akimuj ŋina abuni anakuj.”

⁴² Kirworikinos ikes make temasi, “Meere lo lokoku a Yosepu a? Nyikiyeni mono iwon papa keŋ ka toto keŋ a? Ikokini iŋes elimuni ebe ebunit iŋes anakuj ai?”

⁴³ Tolimok Yesu ikes tema, “Tojoŋoto alokidiŋ kus akiŋuruŋura.

⁴⁴ Emam idiotuŋanan ŋini ebuni neni kaŋ, mati keyau Papa ŋolo ekeyakuunit ayoŋ iŋes neni kaŋ, eteyaru iŋes Akoloŋit ŋina esidyon.

⁴⁵ Igirit ekadwaran epei ebe, ‘Ebuni Akuj akitatam ŋituŋa daadaŋ.’ Ŋulu iirarete Papa, toyenut aneni kaŋ, epote neni kaŋ.

⁴⁶ Nyabala ayoŋ aanyu idiotuŋanan Papa, nai ŋolo ebunit aneni ka Akuj, iŋes bon aanyu Papa.

⁴⁷ Akalimokini ayoŋ iyes kire atemar, ŋini enupi, eryamuni akiyar ŋina nyedaun.

⁴⁸ Arae Ayoŋ akimuj ŋina ka akiyar.

⁴⁹ Tari koloŋ kimujito atapapaa kus Manna analoŋisat, apotu totwaka ekaku.

⁵⁰ Nai ŋini imuji akimuj ŋina ebunit anakuj, nyetwani.

⁵¹ Arae Ayoŋ akimuj ŋina ka akiyar a ŋina ebunit anakuj; ŋini imuji akimuj ŋin, eyari iŋes jik. Akimuj ŋina ainakini ayoŋ toyarya akwap, erae akuwan kaŋ.”

⁵² Topegakinos nai Ŋiyudayan make temasi, “Ikokini ekile lo ikiinakini iwon akuwan keŋ kimujae ai?”

⁵³ Aŋun, tolimok Yesu ikes tema, “Akalimokini ayoŋ iyes kire atemar, ani pa kimuja iyes akuwan a Lokoku a Ituŋanan ka tomata ŋaokot keŋ, nyiyakaunotor akiyar tooma kus.

⁵⁴ Ŋini imuji akaakuwan, tomat ŋaokot kaŋ, eyakar iŋes akiyar ŋina nyedaun, abuni ayoŋ akiteyarun iŋes Akoloŋit ŋina esidyon.

⁵⁵ Anerae erae akaakuwan akimuj kire ka ŋaokot kaŋ ŋamatan kire.

⁵⁶ Ŋini imuji akaakuwan ka tomat ŋaokot kaŋ, iboi alotooma kaŋ, ayoŋ daŋ eboi alotooma keŋ.

⁵⁷ Ikwaŋinapei ekeyakuunia ayoŋ Papa ŋolo eyari, nabo ayoŋ daŋ oyari aŋuna a Papa, ikwaŋinapei, ŋini ekemuji ayoŋ, eyari aŋuna kaŋ.

⁵⁸ Erae ŋin akimuj ŋina ebunit anakuj; nyikoni iŋes akimuj ŋina apotu atapapaa kus kimuja, nai apotu totwaka ekaku. Kire, ŋini imuji akimuj ŋin, eyari jik.”

⁵⁹ Alimuni Yesu ŋakiro ŋun alosinagoga itatami ŋituŋa alo Kaperenaum.

Ŋakiro ŋuna ka akiyar a ŋina nyedaun

⁶⁰ Ani iirarete ŋikasyomak a Yesu ŋulu alalak ŋakiro ŋun, temasi, “Egogoŋ ekitatame lo! Ŋae epedori akiirar?”

⁶¹ Ikwaŋina ayenia Yesu elope atemar eŋuruŋurasi ikes aŋuna a ŋakiro a ŋun, abu kiŋit ikes tema, “Ekoto ŋakiro ŋun akiteesikin iyes etic lo a?

⁶² Ani bo nai kiŋolikis iyes Lokoku a Ituŋanan edokari neni ebunitor iŋes?

⁶³ Erae Etau ŋolo ka Akuj iŋes ikiini akiyar; ecaryono apedor ŋina a ituŋanan. Ŋuna akalimok ayoŋ iyes erae ŋuna ileleba Etau tooma kec ka eyaunete akiyar.

⁶⁴ Nai alokidiŋ kus eyakasi ŋulu nyenupito.” (Anakisyakinet, ayeni Yesu ŋulu pa anupito iŋes ka ayeni daŋ ekalukinon keŋ.)

⁶⁵ Tolimu nabo Yesu tema, “Ikes ŋakiro ŋuna abunio ayoŋ okolimok iyes atemar, emam ŋini ebuni neni kaŋ, mati kecamaki Papa iŋes.”

⁶⁶ Ani iirarete ikes ŋun, apotu ŋikasyomak keŋ ŋulu alalak tojamakis, tojoŋoto arukit ka iŋes.

⁶⁷ Kiŋit Yesu ŋikasyomak ŋulutomon ka ŋiarei tema, “Icamito iyes daŋ arotokin a?”

⁶⁸ Toboŋok Simoni Petero iŋes tema, “Ekapolon, neni a ŋae ikilosi? Iyakar iyoŋ ŋakiro ŋuna ka akiyar a ŋina nyedaun.

⁶⁹ Ikinup ka ikiyenu daŋ atemar irae iyoŋ ŋolo donupei, ŋolo ka Akuj.”

⁷⁰ Toboŋok Yesu ikes tema, “Nyeseuna ayoŋ iyes ŋulutomon ka ŋiarei a? Nai, eyai kidiŋ kus ŋolo erae ŋolo a Satan!”

⁷¹ Erworo iŋes aŋuna a Yuda, alokoku a Simoni Isikariot. Anerae, tari ŋina araakar epei alokidiŋ ŋulutomon ka ŋiarei, aapi iŋes alukin Yesu.