Yoa. 2 - Ebaibul

Ekiitanu alo Kana

¹ Ani kelunyar ŋirwa ŋiarei, toyakaun ekiitanu lotaun ŋolo a Kana, nakwap a Galileya. Ayai toto a Yesu nasuban ŋun.

² Anyaritae Yesu daŋ ka ŋikeekasyomak lokiitanu ŋol.

³ Ani keŋobasi ŋituŋa epiini, tolimok toto a Yesu iŋes tema, “Kedaun epiini kec!”

⁴ Tolimok Yesu iŋes tema, “Okoe akimat! Kaanukiro eraakar iwon ikimitakinit? Eriŋa apaki kaŋ nyedolo.”

⁵ Tolimok nai toto keŋ ŋiketiyak tema, “Kitiyata ŋuna daadaŋ ikilimokini iŋes iyes.”

⁶ Ayakasi nen ŋamoti ŋakanikapei ŋuna etiyaunitae anamoru, ŋuna esitiyaeneneete Ŋiyudayan ŋakipi kec akitesegununuya ŋawat kec, ikwaŋina ecikikakinitotor Ŋikisila; apedori apeimot aŋobar ŋilitae ŋulu eapikinito amiat.

⁷ Tolimok Yesu ŋiketiyak tema, “Kilelebikisi ŋakipi namoti nu.” Kileleba ikes ŋamoti.

⁸ Tolimok nai ikes tema, “Tookosi tokona ŋadi, inasi ekapolokiniton ŋasuban.” Tookosi ikes, inasi iŋes.

⁹ Ani iiri ekapolokiniton ŋasuban ŋakipi ŋuna aris keruwor epiini, nyeyenu iŋes neni kebunio epiini, (nai ayenete ŋiketiyak ŋulu aokunete ŋakipi). Tonyarau nai iŋes ekeitan,

¹⁰ tolimok tema, “Jwi jwi anakisyakinet ŋasuban, itamasyo mono ŋituŋa epiini ŋolo ebob; ani nai emerakinosi, tomata ŋolo epyana. Nai kibu iyoŋ ŋinapei tete kiŋada epiini ŋolo ebob.”

¹¹ Arae ŋin akujuwuanut ŋina esyaunan ŋina etiyae Yesu alo Kana, anakwap a ŋina a Galileya. Alopite a ŋol kisileerek iŋes ikes apolou keŋ, tonupa ŋikasyomak keŋ iŋes.

¹² Kedau ŋun, tolot Yesu totiyaar lotaun a Kaperenaum, torukosi ka toto keŋ ka ŋikaitotoi keŋ ta ŋikasyomak keŋ. Kiriyata ikes aina ŋirwa ŋulu ekudyoko.

Kirita Yesu ŋikagyelanarak alo Kai ka Akuj

¹³ Aapiyarit akoloŋit ŋina a Paska, ido tolot Yesu todoka Yerusalem.

¹⁴ Toloma iŋes Kai ka Akuj, toryamu ŋituŋa ŋulu agyelanarete ŋaatuk, ŋamesekin, ŋakuryo ka ŋikesyecak ŋisiliŋa ŋulu eboiyete alomesae kec.

¹⁵ Kitiyau Yesu adaset a ŋaunoi, kiritarya ikes daadaŋ kaapei ka ŋamesekin ta ŋaatuk alo Kai ka Akuj, kielana ŋisiliŋa a ŋulu esyecak, ka tobuburiyana ŋimesae kec.

¹⁶ Tolimok ŋulu agyelanarete ŋakuryo tema, “Tolemasi ŋiboro lu a ne! Nyituruworosi Akai a Papa kaŋ ŋina kicurutaet!”

¹⁷ Totamut ŋikasyomak keŋ atemar igiritae Nakigireta ebe, “Amina kaŋ Akai kon, Akuj, enepi alotau kaŋ ikwa akim.”

¹⁸ Kiŋita ŋikarikok a Ŋiyudayan iŋes temasi, “Anikujuwuanut ipedori iyoŋ akitiya ikitoodikinia isua atemar ikicamakinitae iyoŋ akitiya nu?”

¹⁹ Tolimok Yesu ikes tema, “Tobwaŋabwaŋaasi Akai ka Akuj na; abuni ayoŋ adukokin nabo alorwa a ŋiuni bon.”

²⁰ Toboŋokis ŋikarikok a Ŋiyudayan temasi, “Abu Akai ka Akuj na ya ŋikaru ŋatomoniomwon ka ŋikanikapei edukyo, kire ipedori iyoŋ adukokin iŋes alotooma ŋirwa ŋiuni a?”

²¹ Nai arae Akai ka Akuj ŋina alimit Yesu akuwan keŋ.

²² Kedau Yesu ayarun alokatwak, apotu ŋikasyomak keŋ totamut ŋuna alimunit iŋes, tosodo tonupa Ŋakigireta ka ŋakiro ŋuna erworit Yesu.

Eyeni Yesu ŋatameta a ŋituŋa a daadaŋ

²³ Ani eriŋa Yesu eyai Yerusalem, alorwa a ŋulu a Paska, apotu ŋituŋa ŋulu alalak tonupa ekiro keŋ, anerae eteete ŋakujuwuanisya ŋuna etiyae iŋes.

²⁴ Nai pa ekinyomit Yesu ikes, anerae ayeni ŋatameta a daadaŋ.

²⁵ Pa eitanit iŋes idiotuŋanan akiteyenikin iŋes ŋuna a ŋituŋa, anerae ayeni iŋes ŋuna aya tooma lotai kec.