Yoa. 17 - Ebaibul

Kilipak Yesu ŋikasyomak keŋ

¹ Kedau Yesu akirwor ŋakiro ŋun, kireo nakuj, kilip tema, “Papa, adolu apaki, kitopoloo Lokoku kon, ikotere ikitopoloo Lokoku kon iyoŋ.

² Anerae iinak iyoŋ Lokoku apedor ŋinakipukaet ŋituŋa daadaŋ, ikotere iinakini akiyar ŋina nyedaun neni a ŋulu daadaŋ ibu iyoŋ inak iŋes.

³ Erae na akiyar ŋina nyedaun, itoyenete ikes iyoŋ, Akuj ŋina erae apei bon ŋina a kire ka Yesu Kristo ŋolo ibu kiyaku iyoŋ.

⁴ Etoodik ayoŋ apolou kon nakwap anakirikakin etic ŋolo ikiinakinit iyoŋ ayoŋ akitiya.

⁵ Papa, inakinae ayoŋ apolou tokona alokiŋaren kon, apolou ŋinapei ikiyakar ayoŋ ka iyoŋ eriŋa tari akwap nyesubuna.

⁶ “Adau ayoŋ akisileerekin ekiro kon lotuŋa ŋulu ibu iyoŋ ikiinak ayoŋ anakwap a na. Arae ikes ŋulu kon, ibu iyoŋ ikiinak ayoŋ ka ericakis ikes akirot kon.

⁷ Tokona eyenete ikes atemar, ibore daadaŋ ŋini ikiinak iyoŋ ayoŋ, ebunit aneni kon.

⁸ Anerae alimok ayoŋ ikes ŋakiro ŋuna ikilimokini iyoŋ ayoŋ, ka acamut ikes. Ayenut ikes atemar, abunit ayoŋ kire aneni kon, ka anupa atemar, iyoŋ ikiyakuuni ayoŋ.

⁹ “Elipi ayoŋ aŋuna kec; nyelipi ayoŋ aŋuna ka akwap a daadaŋ, nai elipi aŋuna a ŋulu ikiinak iyoŋ ayoŋ, anerae erae ikes ŋulu kon.

¹⁰ Ŋini erae ŋini kaŋ erae ŋini kon ka ŋini erae ŋini kon erae ŋini kaŋ, itoodiunitae apolou kaŋ aneni kec.

¹¹ Abunit ayoŋ neni kon; nyeriŋa ayoŋ ayai nakwap, nai eriŋa ikes eyakasi nakwap. Papa ŋolo Asegan, kiyok iyoŋ ikes ka apedor a ŋina ke ekiro kon, ekiro ŋolo ikiinakinit iyoŋ ayoŋ, ikotere eruworosi ikes ŋipei, ikwaŋina ikiraakar iwon ŋipei.

¹² Ani eriŋa ayoŋ ikirukit ka ikes, abu eyok ikes ka apedor a ŋina ke ekiro kon, ekiro ŋolo ikiinakinit iyoŋ ayoŋ. Eyok ayoŋ ikes, emam ŋini aoliyo, mati ipei ŋini etemokino tooliyo--ikotere kiyookinotor Ŋakigireta.

¹³ Nai tokona abunit ayoŋ neni kon, adau ayoŋ akirwor ŋakiro ŋun anakwap, ikotere eryamunete ikes alelyan kaŋ ilelebikina alotai kec.

¹⁴ Ainak ayoŋ ikes akirot kon; etidiŋa ŋituŋa ŋulu ka akwap ikes, anerae nyerae ikes ŋulu ka akwap, ikwaŋinapei nyaraakar ayoŋ daŋ ŋolo ka akwap.

¹⁵ Nyekelipit ayoŋ iyoŋ atemar tolema ikes anakwap, nai ekelipit ayoŋ iyoŋ atemar, kiyok iyoŋ ikes aneni a ŋolo Aronon.

¹⁶ Nyerae ikes ŋulu ka akwap, ikwaŋinapei nyaraakar ayoŋ daŋ ŋolo ka akwap.

¹⁷ Kituruwo ikes ŋulu etyakunitae nakirot ŋina a kire; akirot kon iŋes erae ŋina a kire.

¹⁸ Ikwaŋinapei ibunio iyoŋ ikiyakiya ayoŋ nakwap, eyakiyarit ayoŋ daŋ ikes nakwap.

¹⁹ Aruwor ayoŋ ŋolo akatyakunitae aŋuna kec, ikotere toruworos ikes daŋ ŋulu seuna anakirot a ŋina a kire.

²⁰ “Nyelipakinit ayoŋ ikes make, nai elipakinit tari ŋulu akanupete ayoŋ aŋuna ka akitatam kec.

²¹ Elipit ayoŋ atemar toruworos ikes daadaŋ ŋipei. “Papa! [Ikwaŋinapei iyakar iyoŋ tooma kaŋ, ka ayoŋ daŋ tooma kon,] pena ikes tooma yok, ikotere enupi akwap atemar, ikiyakuunit iyoŋ ayoŋ.

²² Ainak ayoŋ ikes apolou ŋinapei ikiinit iyoŋ ayoŋ, ikotere eruworosi ikes ŋipei, ikwaŋinapei ikiraakar iwon ŋipei.

²³ Ayai ayoŋ tooma kec, iyai iyoŋ tooma kaŋ, ikotere toruworos ikes ŋipei jik, ikotere nai toyenu akwap atemar ikiyakuunit iyoŋ ayoŋ ka atemar imina iyoŋ ikes, ikwaŋinapei ikiminar iyoŋ ayoŋ.

²⁴ “Papa! Acamit ayoŋ ŋulu ikiinakinit iyoŋ ayoŋ, oruko ka ayoŋ aneni ayai ayoŋ, ikotere eanyunete ikes apolou kaŋ, ŋina ikiinakinit iyoŋ ayoŋ; anerae ikimina iyoŋ ayoŋ eriŋa tari akwap nyesubuna.

²⁵ Okoe Papa ŋolo ka akiyookino! Nyikiyeni iyoŋ akwap kire, nai akayeni ayoŋ iyoŋ; eyenete lu atemar ikiyakuunit iyoŋ ayoŋ.

²⁶ Eketeyenu ayoŋ iyoŋ ikes ka arubakini ekoni nenipei, ikotere min amina ŋina ikiminar iyoŋ ayoŋ tooma kec ka ayoŋ daŋ tooma kec.”