Yoa. 13 - Ebaibul

Kilot Yesu ŋakejen a ŋikasyomak keŋ

¹ Ani eapuuni apaki ŋina a ŋasuban a Paska, toanyu Yesu atemar kedol apaki ŋina esikinet akwap na, toboŋo neni a Papa. Amina jwi jwi Yesu ŋulu keŋ ŋulu ayakasi nakwap, akitodol tari natwanare.

² Ani imujete ikes eboŋ, keris Satan, aŋuna ka alukinio Yesu, keloma lotau a Yuda Isikariot, a ŋolo arae lokoku a Simoni.

³ Ayeni Yesu atemar abu Papa kiwuak ŋiboro daadaŋ nakan keŋ; ayeni daŋ iŋes atemar abuni aneni ka Akuj, ido eboŋori nabo nenipei keŋ.

⁴ Tonyou nai Yesu alomesa, tolaca ekaaso, toenik ataulo nacir.

⁵ Tobukok ŋakipi nakalaat, kisyak akilot ŋakejen a ŋikasyomak, toninaiya ka ataulo a ŋina anapit iŋes anacir.

⁶ Ani edoluni iŋes neni a Simoni Petero, kiŋit Petero Yesu tema, “Ekapolon, iyoŋ ilotari ŋakejen kaŋ a?”

⁷ Toboŋok Yesu iŋes tema, “Nyiyeni iyoŋ tokona ŋuna etiyae ayoŋ, nai ibuni iyoŋ ayenun ekaku.”

⁸ Tolimok Petero Yesu tema, “Mam jik nyilotari iyoŋ ŋakaakejen!” Toboŋok Yesu iŋes tema, “Ani pa kelota ayoŋ ŋakejen kon, nyikiruki iyoŋ ka ayoŋ nabo.”

⁹ Tolimok Simoni Petero Yesu tema, “Ekapolon, ani kikote neni, meere ŋakaakejen bon, ŋakan ka akou daŋ!”

¹⁰ Tolimu Yesu tema, “Ŋini adau akiloŋari, eseg iŋes; nyiitanit akiloŋa nabo, mati ŋakejen bon. Isegak iyes, nai meere daadaŋ.”

¹¹ (Anerae ayeni Yesu ŋini alukinon iŋes; iŋes alimunio atemar, “Isegak iyes, nai meere daadaŋ.” )

¹² Kedau Yesu akilotar ŋakejen kec, tonap ekaaso keŋ, toboŋo lomesa. Kiŋit ikes tema, “Iyenete iyes apolou a ŋuna adau ayoŋ akitiya neni kus a?

¹³ Ikinyarito iyes ayoŋ Eketataman ka Ekapolon. Ee, iyookinito iyes, anerae arae kire ayoŋ.

¹⁴ Ikwapei elotarya ayoŋ ŋolo arae Ekapolon ka Eketataman ŋakejen kus, itemokino iyes daŋ kilosete ŋakejen a ŋuluce.

¹⁵ Adau ayoŋ ainakin iyes akitaanyikinet, ikotere kitiyata iyes daŋ ikwaŋina adaunia ayoŋ akitiya neni kus.

¹⁶ Akalimokini ayoŋ iyes kire atemar, emam epito ŋolo epol akilo ekeekapolon, nabo daŋ emam ekiyakitono ŋolo epol akilo ŋolo iyakit iŋes.

¹⁷ Ani kiyenete iyes nu, irereŋ iyes erae kitiyata nu.

¹⁸ Nyerworo ayoŋ aŋuna kus a daadaŋ, ayeni ŋulu adau ayoŋ aseun; nai ikotere kiyookinotor ŋuna igiritae Nakigireta ebe, ‘Abu ituŋanan ŋini ikimori ka ayoŋ okoluki ayoŋ.’

¹⁹ Akalimokini ayoŋ iyes nugu eriŋa nyetakanuna, ikotere ani etakanunete, tonupyata atemar, ‘Arae Ayoŋ ŋolo Arae Ayoŋ!’

²⁰ Akalimokini ayoŋ iyes kire atemar, ŋini ijauni ituŋanan ŋini eyakit ayoŋ, ekejauni ayoŋ, nabo ituŋanan ŋini ekejauni ayoŋ, ijauni ŋolo ekeyakuunit ayoŋ.”

Todwar Yesu ŋuna ka alukino keŋ

²¹ Kedau Yesu alimun ŋun, kiyaloloŋ nooi alotau keŋ, kiteyenu ŋakiro nu pa imunonit tema, “Akalimokini ayoŋ iyes kire atemar, ebuni ipei alokidiŋ kus alukin ayoŋ.”

²² Kiŋolyanakinos ŋikeekasyomak make eumokinito, pa ayenete ŋolo erworor Yesu.

²³ Eboi epeikasyoman, ŋolo amina iŋes, alodiyete keŋ.

²⁴ Aŋun, toketu Simoni Petero ekasyoman ŋol tema, “Kiŋit iŋes ŋini irworor iŋes?”

²⁵ Tosodi ekasyoman ŋol kiyoto diyete Yesu, kiŋit iŋes tema, “Ekapolon, ŋae ŋini irworor iyoŋ?”

²⁶ Tolimok Yesu iŋes tema, “Ekile ŋol, iŋes ŋolo ainakini ayoŋ amugati kelumok loboka.” Kedau Yesu akilumokin, inak Yuda, lokoku a Simoni Isikariot.

²⁷ Ani kedau Yuda akinyam amugati, toloma Satan lotau keŋ. Tolimok Yesu Yuda tema, “Kiburuburak akitiya ibore ŋini ilosi akitiya!”

²⁸ Amam alokidiŋ ŋituŋa ŋulu eboiyete alomesa ŋini ayeni apolou a ŋakiro a ŋuna erworo iŋes.

²⁹ Atamete ŋice atemar kori aŋina eŋadaa Yuda ecwee ŋolo a ŋisiliŋa, alimokinit Yesu iŋes alosit agyelun ŋiboro ŋulu eitanitae aŋuna a ŋasuban. Abasi ŋice kori kelimokini Yesu iŋes ainar ŋikulyak idiobore.

³⁰ Kedau Yuda akijaar amugati, toloma kiŋa atipei. Arae akuwar akwap.

Akiciket ŋina kitete

³¹ Keloma Yuda kiŋa, tema Yesu, “Tokona, etopoloor Lokoku a Ituŋanan, ka etopoloor Akuj aŋuna keŋ.

³² Ani nai kitopoloor Akuj aŋuna keŋ, itopoloori Akuj daŋ Lokoku a Ituŋanan ka apolou keŋ ka alope, kitopoloo iŋes atipei.

³³ Ŋikaadwe, eriŋa ayoŋ ikirukit ka iyes adiouriyen. Ipote iyes akiwar ayoŋ, nai ikwapei abunio ayoŋ olimokinia Ŋiyudayan, akalimokini iyes daŋ tokona atemar, ‘Nyipedorete iyes aponare neni alosi ayoŋ.’

³⁴ Akainakini tokona akiciket ŋina kitete: tominin make; ikwaŋina akaminar ayoŋ iyes, iyes daŋ tominin make.

³⁵ Ani kitiyata iyes ikoŋina, eyenunete ŋituŋa atemar irae iyes ŋikasyomak kaŋ, erae kiminin iyes make.”

Tolimu Yesu atemar epegi Petero atemar ayeni iŋes

³⁶ Kiŋit Simoni Petero Yesu tema, “Ekapolon, ai ilosi iyoŋ?” Toboŋok Yesu iŋes tema, “Nyikitupakini iyoŋ ayoŋ neni alosi tokona, nai ikitupuni iyoŋ ayoŋ ekaku.”

³⁷ Kiŋit nabo Petero Yesu tema, “Ekapolon, kaanukiro nyakatupakinia ayoŋ iyoŋ tokona? Ajali ayoŋ akiyar kaŋ aŋuna kon.”

³⁸ Toboŋok Yesu iŋes tema, “Ijali kire iyoŋ akiyar kon aŋuna kaŋ a? Akalimokini ayoŋ iyoŋ kire atemar, eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.”