Yoa. 11 - Ebaibul

Atwanare a Lasaro

¹ Todyakakin ecekile ŋolo anyaritae Lasaro ŋolo alo Betania, alore a Maria ka nakaato keŋ Marita.

² (Arae Maria na ŋina eosakini akimyet ŋina akukunyon nakejen a Yesu, ido toninaiya a ŋitim keŋ. Lokaato keŋ Lasaro iŋes adyaka).

³ Apotu ŋakaitotoi keŋ kiyakiyasi ŋakiro neni a Yesu temasi, “Ekapolon, edyak lokone kon!”

⁴ Ani iirari Yesu ŋakiro ŋun, tolimu tema, “Ekaku, nyerae edeke ŋol ŋolo aaran, nai erae ŋolo itoodiuni apolou ŋina ka Akuj ka ikotere etakanunia apolou ŋina a Lokoku ka Akuj.”

⁵ Amina Yesu Marita ka Maria ta lokaato kec Lasaro.

⁶ Kedau iŋes tari akiirar atemar edyak Lasaro, kiriya nabo ŋirwa ŋiarei aneni alimokinere.

⁷ Ani ekaku, tolimok ŋikasyomak keŋ tema, “Apena oboŋosi Yudeya.”

⁸ Toboŋokis ŋikasyomak temasi, “Eketataman, ŋirwa ŋulupei ŋoon lu, acamito Ŋiyudayan akimas iyoŋ a ŋamoru, icamit nabo iyoŋ aboŋor inaa a?”

⁹ Toboŋok Yesu ikes tema, “Nyerae mono ŋisaae ŋulu ka apaaran ŋitomon ka ŋiarei a? Ani elosi ituŋanan naparan, nyigukini, anerae ite iŋes akica ŋina ka akwap a na.

¹⁰ Ani elosi ituŋanan nakwaare, igukini, anerae emam akica aneni keŋ.”

¹¹ Tolimok nabo ikes tema, “Ejotoe lokone yok Lasaro, alosi ayoŋ akitekienyun iŋes.”

¹² Tolimokis ŋikasyomak iŋes temasi, “Ani kejotoe iŋes, Ekapolon, eŋaleuni.”

¹³ Erworo Yesu atemar atwana Lasaro, nai abasi ikes kori ejotoe kire.

¹⁴ Aŋun, kisileerek Yesu ikes tema, “Adau Lasaro atwanare,

¹⁵ nai aŋuna kus, alakara ayoŋ aŋuna pa ikirukitor ayoŋ ka iŋes, ikotere iyes inupyata. Nai apena oanyutu iŋes.”

¹⁶ Abu Tomas (ŋolo anyaritae Emuut) tolimok ŋikasyomak ŋuluce tema, “Apena iwon daŋ orukosi ka Eketataman, otwaka kaapei.”

Yesu iŋes erae ayarun ka akiyar

¹⁷ Ani edoluni Yesu, toryamu Lasaro kenuki ka kelunyar daŋ ŋirwa ŋiomwon.

¹⁸ Aapikina Betania ka Yerusalem, arae ŋakilomitae ŋauni,

¹⁹ ido aponito Ŋiyudayan akimaima Marita ka Maria aŋuna ka atwanare a lokaato kec.

²⁰ Ani iirari Marita atemar ebunit Yesu, tolot akisiryam iŋes, nai edoŋit Maria kai.

²¹ Tolimok Marita Yesu tema, “Ekapolon, kerae toyai iyoŋ nege, pa ketwanit lokaato kaŋ.

²² Nai tokona daŋ ayeni atemar, epedori Akuj ainakin iyoŋ ibore daadaŋ ŋini iŋita iyoŋ.”

²³ Tolimok Yesu iŋes tema, “Eyaruni lokaato kon!”

²⁴ Tolimok Marita iŋes tema, “Ayeni ayoŋ atemar iteyarunio iŋes Akoloŋit ŋina esidyon.”

²⁵ Tolimok Yesu iŋes tema, “Arae Ayoŋ ayarun ka akiyar, ŋinituŋanan akanupi ayoŋ, eyaruni tari ketwana daŋ.

²⁶ Nabo ŋini eyari, okonupite ayoŋ, nyetwani jik. Inupit iyoŋ nu a?”

²⁷ Tolimok Marita iŋes tema, “Ee, Ekapolon, anup ayoŋ atemar irae iyoŋ Kristo, Lokoku ka Akuj, ŋolo etemokino bu nakwap.”

Kigwor Yesu aŋuna a Lasaro

²⁸ Ani kedau Marita alimun ŋun, tolot neni a nakaato keŋ Maria, tolimok aneni keŋ bon tema, “Eyai Eketataman nege, ikinyarit iyoŋ.”

²⁹ Ani iirari Maria ŋakiro ŋun, tonyou atipei, tolot neni a Yesu.

³⁰ (Ariŋa Yesu nyelomuna lore, ayai neni kisiryamia Marita iŋes.)

³¹ Ani iŋolikinete Ŋiyudayan ŋulu emaimayete Maria alokai iŋes enyouni atipei, totupakis iŋes ebasi kori elosi iŋes nalyal akigworo.

³² Todol nai Maria neni ayai Yesu, toryedik alokiŋaren keŋ, tolimok iŋes tema, “Okoe Ekapolon, kerae toyai iyoŋ nege, pa ketwanit lokaato kaŋ.”

³³ Ani iŋolikini Yesu Maria igworo ka igworosi tari Ŋiyudayan ŋulu arukito ka iŋes, tonomosi iŋes ŋakiro etau, kiyaloloŋ,

³⁴ kiŋit ikes tema, “Ai inukakis iyes iŋes?” Tolimokis ikes iŋes temasi, “Ekapolon, bua toanyu.”

³⁵ Kigwor Yesu.

³⁶ Temasi Ŋiyudayan, “Kiŋolikisi, kemina iŋes Lasaro!”

³⁷ Nai temasi ŋice, “Okoe, abu iŋes kitekienyu emudukanot! Pa mono kepedorit iŋes akiretakin atwanare a Lasaro a?”

Kiteyarunae Lasaro

³⁸ Tolot nai Yesu nalyal emarani ekeetau nooi. Arae alyal aturukan, togolokinitetei amoru lopuke.

³⁹ Tolimok Yesu ikes tema, “Tolemasi amoru alopuke.” Tolimok Marita, nakaato keŋ ke ekatwan Yesu tema, “Ekapolon, abosu tokona iŋes, anerae adau akiriya analyal ŋirwa ŋiomwon.”

⁴⁰ Tolimok Yesu iŋes tema, “Pa akalimokinit ayoŋ iyoŋ atemar ani kinup, iŋolikini apolou ŋina ka Akuj a?”

⁴¹ Tolemasi nai ikes amoru analyal. Kireo Yesu kidiama nakuj tema, “Alakara ayoŋ neni kon Papa, anerae ikiira iyoŋ ayoŋ.

⁴² Ayeni ayoŋ atemar ikiiranari iyoŋ ayoŋ jwi jwi; nai alimunit ayoŋ ŋakiro nu, ikotere tonupyata ŋituŋa lu ŋulu ewuasi a nege daadaŋ atemar, iyoŋ kire ikiyakit ayoŋ.”

⁴³ Kedau alimun ŋun, tocelu nooi tema, “Lasaro! Tolomu kiŋa!”

⁴⁴ Tolomu ekatwan ŋol analyal, ilogilogakinitae ŋanaŋgae ŋuna nuket nakejen ka nakan keŋ; ereet daŋ aenen. Tolimok nai Yesu ikes tema, “Tolacasi ŋanaŋgae, toesikis tolot.”

Totukut ŋituŋa akiar Yesu

⁴⁵ Aŋun, apotu Ŋiyudayan ŋulu alalak ŋulu arukunete ka Maria, ido kiŋolikis ŋuna etiyae Yesu, tonupa iŋes.

⁴⁶ Nai apotu ŋice alokidiŋ kec toloto neni a Ŋiparisayon, tolimokis ŋuna abu Yesu kitiya.

⁴⁷ Tocunakinos nai ŋisacaradotin ŋulu apolok ka Ŋiparisayon Natukot kec temasi, “Okoe, ikikokini ai? Kire itiyae ekile lo ŋakujuwuanisya ŋuna alalak.

⁴⁸ Ani kikilakak iwon iŋes itiyae jik ikona, epote ŋituŋa daadaŋ akiwuapakin iŋes, potu nai Ŋiromanin akinyasun Akai ka Akuj kaapei ka akwap yok.”

⁴⁹ Nai abu epei alokidiŋ kec ŋolo anyaritae Kaipa, ŋolo arae Esacaradoti ŋolo Apolon nooi alokaru a ŋol tema, “Emam ibore iyenete iyes ipei daŋ!

⁵⁰ Nyiyenete iyes atemar ejok epeikile totwan aŋuna a ŋituŋa akilo abukor akwap daadaŋ a?”

⁵¹ Nyelimuno iŋes ŋakiro nu erae ŋuna keŋ, nai aŋuna araakar iŋes Esacaradoti ŋolo Apolon nooi alokaru a ŋol, adwari iŋes atemar etwani Yesu aŋuna ka akwap a ŋina a Ŋiyudayan.

⁵² Meere aŋuna ka akwap a ŋin bon, nai ikotere ecunakini iwapei ŋidwe ŋulu ka Akuj, ŋulu ielara.

⁵³ Ameun akoloŋit ŋin, totukut ikes epite ŋoloaret Yesu.

⁵⁴ Aŋun, nyitor nabo Yesu nakwap a Ŋiyudayan ileere, nai tolot nakwap ŋina aapi analoŋisat, lotaun ŋolo anyaritae Epuraim, kiboiyoto ka ŋikeekasyomak aina.

⁵⁵ Aapuunito ŋasuban ŋuna a Paska. Aponito Yerusalem ŋituŋa ŋulu alalak alorerya akiteseguno, ikwapei icikakinitotor Ŋikisila, eriŋa nyedolo Paska.

⁵⁶ Ewarito ikes Yesu, kirworos ewuasi alo Kai ka Akuj ebasi, “Anu itamete iyes? Ebuni iŋes nasuban kori mam?”

⁵⁷ Aris nai ŋisacaradotin ŋulu apolok ka Ŋiparisayon kicika ŋituŋa atemar, ani ŋini eyeni neni eyai Yesu, itemokino kitaanyu ikes, ikotere kikamunae iŋes.