Yoa. 10 - Ebaibul

Akitadapet ŋina ke ekeyokon

¹ Tolimu Yesu tema, “Akalimokini ayoŋ iyes kire atemar, ituŋanan ŋini nyelomari nanok ŋina a ŋamesekin alopuke, nai todoka tooma alowae ke ece, erae ituŋanan ŋin ekokolan ka ekademanaran.

² Nai ituŋanan ŋini elomari alopuke a ŋolo ka anok, erae iŋes kire ekeyokon ŋolo a ŋamesekin.

³ Ebuni eketen ŋolo ke epuke aŋaar iŋes, iirarete ŋamesekin etoil keŋ, enyarae iŋes ŋamesekin keŋ a ŋirorwa kec, tomia ikes kiŋa.

⁴ Ani keyau iŋes ŋamesekin keŋ daadaŋ kiŋa, iŋarenikini iŋes ikes, ido kiwuapakis ŋamesekin iŋes, anerae eyenete ikes etoil keŋ.

⁵ Nyiwuapakinete ikes ituŋanan ŋini egelaana, nai esurorosi nariet, anerae nyeyenete ikes ŋitoilon a ŋituŋa a ŋulu gelayek.”

⁶ Abu Yesu tolimok ikes akitadapet ŋin, nai nyeyenut ikes ŋuna erworo iŋes.

Yesu iŋes ekeyokon ŋolo ajokan

⁷ Aŋun, tolimok Yesu ikes nabo tema, “Akalimokini ayoŋ iyes kire atemar, Arae Ayoŋ epuke ŋolo a ŋamesekin.

⁸ Ŋituŋa daadaŋ ŋulu apote eriŋa ayoŋ, arae ikes ŋikokolak ka ŋikademanarak; nai nyiirara ŋamesekin ŋakiro kec.

⁹ Arae Ayoŋ epuke; ituŋanan ŋini elomuni kitoru neni kaŋ, eiun iŋes; elomuni iŋes tooma ka elomari kiŋa, toryamu akimuj.

¹⁰ Elomuni ekokolan akoko bon, akiar ka akinyasun ŋamesekin; nai abunit ayoŋ ainakin ikes akiyar, akiyar ŋina ka akileile.

¹¹ “Arae Ayoŋ ekeyokon ŋolo ajokan. Ejali ekeyokon ŋolo ajokan akeekiyar aŋuna a ŋamesekin keŋ.

¹² Ituŋanan ŋini etacio, nyerae iŋes ekeyokon; ka nyerae ŋamesekin ŋuna keŋ; ani kiŋolik iŋes epeot ebunit, eesikini ŋamesekin, toem; toporok nai epeot ŋamesekin, kielielaa.

¹³ Eemi iŋes, anerae erae iŋes etacat ka nyemitakinit ŋamesekin.

¹⁴ Arae Ayoŋ ekeyokon ŋolo ajokan. Ayeni ayoŋ ŋamesekin kaŋ ka akayenete ikes ayoŋ,

¹⁵ ikwapei akayenia ayoŋ Papa kaŋ ka ayeni ayoŋ daŋ iŋes. Ajali ayoŋ akiyar kaŋ aŋuna a ŋamesekin.

¹⁶ Eyakasi ŋamesekin kaŋ ŋace ŋuna emam alosipan a lo; itemokino ayoŋ ocun ikes daŋ ka iirarete ikes etoil kaŋ; toruworos nai ikes epeisipan ŋolo ke epeikeyokon.

¹⁷ “Akamina ayoŋ Papa kaŋ, anerae ajalit akiyar kaŋ oyeni atemar aryamuni nabo.

¹⁸ Emam ituŋanan ŋini akademari ayoŋ akiyar kaŋ, nai ajalit ayoŋ iŋes anacamit kaŋ a elope. Ayakar ayoŋ apedor ŋina jalet iŋes ka ayakar ayoŋ apedor ŋina ryamunet iŋes nabo. Erae ŋun ŋuna ekecikak Papa kaŋ ayoŋ akitiya.”

¹⁹ Totyakatyakas Ŋiyudayan nabo aŋuna a ŋakiro a ŋun.

²⁰ Temasi ŋulu alalak, “Eyai ekipye neni keŋ! Kiruma ŋikerep iŋes! Nyo epupere ŋakiro keŋ?”

²¹ Nai temasi ŋice, “Kire, nyepedori ituŋanan ŋini eyai ekipye neni keŋ, erwor ikona. Epedori ekipye akitekienyun emudukanot a?”

Toŋero Ŋiyudayan Yesu

²² Ani edoli ŋirwa ŋulu a ŋasuban a ŋuna eitunitere Akoloŋit ŋina eterereŋere Akai ka Akuj alo Yerusalem, torae akwap alilim.

²³ Kitor Yesu Kai ka Akuj, lobarasan a Solomon.

²⁴ Tocunakinos Ŋiyudayan kirikaut Yesu temasi, “Ikitaŋayaŋayat mono iyoŋ isua tari ori? Ani kirae iyoŋ Kristo, tolimokinae ilereete.”

²⁵ Toboŋok Yesu ikes tema, “Abu ayoŋ okolimok iyes, nai nyinupito. Ŋiticisyo ŋulu etiyae ayoŋ alokiro a Papa kaŋ, ikes eketeyenunito ayoŋ.

²⁶ Nai nyinupito iyes, anerae meere iyes ŋamesekin kaŋ.

²⁷ Epupete ŋamesekin kaŋ ekaatoil, ayeni ayoŋ ikes ka ekewuapito ayoŋ.

²⁸ Ainakini ayoŋ ikes akiyar ŋina nyedaun, nyebukorosi ikes jik, emam daŋ ŋini ekopori ikes anakan kaŋ.

²⁹ Papa kaŋ, ŋolo akainakini ayoŋ, epol iŋes akilo daadaŋ, emam idiotuŋanan ŋini epedori akopor ikes anakan a Papa.

³⁰ Ikirae ayoŋ ka Papa ŋipei.”

³¹ Kideput nabo Ŋiyudayan ŋamoru akimasya Yesu.

³² Tolimok Yesu ikes tema, “Eketoodik ayoŋ iyes ŋiticisyo ŋulu alalak ŋulu ajokak, ŋulu eponito aneni a Papa. Ali aloticisyo a ŋul icamitotor iyes akimasya ayoŋ a ŋamoru?”

³³ Toboŋokis Ŋiyudayan iŋes temasi, “Meere aŋuna ke ediotic a ŋolo ajokan ikimasere isua iyoŋ, nai aŋuna iyanyia iyoŋ Akuj! Irae iyoŋ ituŋanan, nyo nai ibaakar iyoŋ ikwaanasi ka Akuj!”

³⁴ Toboŋok Yesu ikes tema, “Igiritae Lokisila kus ebe ebala Akuj, ‘Irae iyes ŋakujo.’

³⁵ (Ikiyeni atemar iyookino Ŋakigireta kire;) ido abu Akuj tonyara ŋituŋa ŋulu alimokinio ŋakiro keŋ, ŋakujo.

³⁶ Ani nai kikote nen, ikokinete iyes ai ibasi, ‘Iyanyi iyoŋ Akuj!’ anerae abu ayoŋ olimu atemar, ‘Arae Ayoŋ Lokoku ka Akuj,’ ikwapei araakar ayoŋ abu Akuj okotyaku ekeyakuu nakwap.

³⁷ Ani pa ketiyae ayoŋ ŋiticisyo ŋulu a Papa kaŋ, nyikinupa ayoŋ.

³⁸ Nai ani ketiyae ayoŋ ikes, tonupa ikes erae tari pa kikinupito ayoŋ; ikotere toyenuniata ayenunet apei jik atemar, eyai Papa tooma kaŋ ka ayai ayoŋ tooma Papa.”

³⁹ Kikatakis nabo ikes akikamun iŋes, nai abu tobucar aneni kec.

⁴⁰ Tolot nabo Yesu ekekwaye aŋolol Yorodan, neni sek ebatisaa Yoana ŋituŋa; kiboi aina.

⁴¹ Potu ŋituŋa ŋulu alalak neni keŋ temasi, “Nyitiya Yoana adiokujuwuanut, nai ŋuna daadaŋ abu iŋes kirwor aŋuna ke ekile a lo, erae ŋuna a kire.”

⁴² Tonupa ŋituŋa ŋulu alalak iŋes aina.