Yer. 7 - Ebaibul

Kiserau Yeremia epite ŋolo etubokinia Akuj ŋituŋa

¹ Abu Ekapolon kirwor neni a Yeremia tema,

² “Towo alopuke a ŋolo ka Akai ke Ekapolon, kiserau a nen ŋakiro nu tema, ‘Kiirasi ŋakiro a Ekapolon iyes ŋituŋa a Yudaya, iyes ŋulu ilomanarete alopuke alo akilip neni ke Ekapolon.’

³ Alimu Ekapolon ŋolo a ŋajoresyo, Akuj ŋina a Isirael atemar kitojokutu ŋipitesyo kus ka ŋuna itiyaete iyes, ido kimyekinae ayoŋ oruko kaapei ka iyes anakibois a na.

⁴ Nyikinyoma ŋakiro nu ŋuna amodiyo ebe, ‘Erae na Akai ke Ekapolon, Akai ke Ekapolon, Akai ke Ekapolon.’

⁵ “Anerae kire jik, ani kitojokut iyes ŋipitesyo kus ka ŋuna itiyaete iyes, ani kire kitiyata iyes ŋuna ka akiyookino neni a ŋinice,

⁶ ani pa kisicanito iyes ŋituŋa ŋulugelae, ŋikokyok ka ŋapuseru, kori pa kiar anakibois a na ituŋanan ŋini emam ŋuna aronok itiyat ka ani pa kiwuapa iyes ŋakujo ŋace kiduporos make,

⁷ ŋakiro ŋun nai abunio ayoŋ akiboi kaapei ka iyes anakibois a na, anakwap a ŋina abu ayoŋ koloŋ oinak neni atapapaa kus toruwor ŋina kec ŋikaru ka ŋikaru.

⁸ “Nai iwuakinito iyes akikinyomit kus nakiro ŋuna ka amodiyo ŋuna erae ŋacaryo.

⁹ Irubakinete mono iyes ikokoyete, ilomete, ikoŋete alyokonu, iyaanarete ŋainakineta neni a Baal ka iwuapito ŋakiro a ŋakujo a ŋuna sek pa iyenete iyes,

¹⁰ ido ipotu akiwo alokiŋaren kaŋ alo Kai a na a ŋina enyaritere a ekiro kaŋ, ido ibasi, ‘Mam isua ŋace,’ nai torubakinito itiyaete ŋakiro ŋun daadaŋ ŋuna ka asiilyo a?

¹¹ Aruwor mono itete iyes Akai na ŋina enyaritere a ekiro kaŋ neni eŋopitotor ŋikokolak a? Toyenete atemar ete ayoŋ daŋ ŋun.

¹² Toloto tokona nakibois kaŋ ŋina koloŋ ayai Silo, neni abu ayoŋ ewuak toyakaun ekiro kaŋ apaki ŋina esyaunan, ido kiŋolikis ŋuna abu ayoŋ etiya nen aŋuna ka aronis a ŋituŋa kaŋ a Ŋisirael.

¹³ Tosodi tokona, aŋuna idauniata iyes akitiya ŋakiro ŋun daadaŋ ka aŋuna abunio ayoŋ eruwor neni kus ŋarwa ŋuna alalak, nai ipotu iyes nyiirasi ŋakiro kaŋ ka ani akanyarae ayoŋ iyes, ipotu iyes nyikiboŋokis ayoŋ,

¹⁴ aŋun etiyae ayoŋ ŋuna abu etiya Silo neni ka Akai a ŋina enyaritere a ekiro kaŋ, a ŋina ikinyomito iyes ka akibois ŋina abu ayoŋ okoinak iyes ka neni atapapaa kus.

¹⁵ Ekeritari ayoŋ iyes ojoŋo akiterereŋ iyes, lopite ŋolo abunio eritarya ŋiyeneta kus daadaŋ ka ŋiletok a Epuraim daadaŋ.”

Aŋerit a ŋituŋa akiwuapit Akuj

¹⁶ Tolimu nabo Ekapolon neni a Yeremia tema, “Ani eruwor iyoŋ, nyilip aŋuna a ŋituŋa a lu, nyikeu etoil kon igworo, kori ilipi aŋuna kec ka nyikilip ayoŋ, anerae nyacamuni ayoŋ akiirar ŋakiro kon.

¹⁷ Nyite iyoŋ ŋakiro ŋuna itiyaete ikes alotaunio a Yudaya ka alorotin a Yerusalem a?

¹⁸ Ikeyenete ŋidwe ŋikito, kinokakis atapapa akim, tomunaut ŋaberu ŋakirya akipounio ŋamugati aŋuna a arwosit a ŋina alokidiama ka eyaanarete ŋainakineta ŋuna a ŋimaten neni a ŋakujo a ŋace aŋuna ka akitoŋoya ayoŋ.

¹⁹ Ayoŋ mono eketoŋoete ikes a? Meere mono ikes pei ikotere ewanatar make a?

²⁰ Aŋun, alimu Ekapolon Akuj atemar, aŋoikini ka anyunyurikin ayoŋ ikes etiyakini ŋuna aronok neni a ŋituŋa ka ŋityaŋ, neni a ŋikito a ŋulu ke emanikor ka ŋaraito ŋuna ka akwap, enokuni aŋoit kaŋ ikwa akim ka mam ituŋanan epedori akituduŋere.

²¹ “Irworo Ekapolon ŋolo a ŋajoresyo Akuj ŋina a Ŋisirael atemar kiyatakisi ŋainakineta kus namuronisya kus ka tonyama akiriŋ,

²² anerae akoloŋit ŋina ayaunia ayoŋ atapapaa kus anakwap a Ijipit, nyelimokina ayoŋ ikes, kori nyicikakina ayoŋ ikes ŋakiro ŋadi ŋuna a ŋainakineta a ŋuna epeyo ka ŋuna a ŋamuronisya.

²³ Nai abu ayoŋ oinak ikes akiciket na ebe, ‘Kiwuapa ŋakiro kaŋ, ido aruwor ayoŋ Akuj kus ka iruworosi iyes ŋituŋa kaŋ; ido kiwuapa ŋakiro kaŋ bon, ikotere ejokyata ŋakiro aneni kus.’

²⁴ Nai apotu ikes nyiwuapa ŋakiro kaŋ kori nyikatakis apupokin, nai anakisyaanu a ŋina ka acamit akitiya aronis, apotu ikes kiwuapa ŋuna acamito akitiya, ido tomitakis akitiya ŋuna alunyarosi akilo ŋuna eponito.

²⁵ Ameun anakoloŋit a ŋina aponiata atapapaa kus anakwap a Ijipit akitodol nakoloŋit na, abu ayoŋ eyakiyanak ikes jik ŋiketiyak kaŋ ŋikadwarak daadaŋ, abu ayoŋ eyakiyanak ikes ŋikadwarak aŋinakoloŋit,

²⁶ nai nyepupokina ikes ŋakiro kaŋ, kori nyemitakina, nai apotu kitogogoŋo ŋakyes kec. Apotu ikes kitiyata ŋuna aronok nooi akilo ŋuna apotu atapapaa kec kitiyata.

²⁷ “Aŋun, Yeremia ilosi iyoŋ akirwor ŋakiro nu daadaŋ neni kec, nai nyecamunete ikes apupokin iyoŋ, inyarae iyoŋ ikes, nai nyikiboŋokinete ikes iyoŋ.

²⁸ Ilimokini iyoŋ ikes atemar, erae lu ŋituŋa ŋulu apotu nyiwuapa ŋakiro ŋuna alimunit Ekapolon Akuj kec, apotu daŋ toŋero akitatamun tojokyata, aŋopiyasi ŋakiro ŋuna a kire, mam ŋakiro ŋun anakituka kec.

²⁹ Totubosi ŋitim kus tocakakis nariet; tocelutu iwololoete alokidiama ŋikamukumukui, anerae aŋer ka aesiki Ekapolon anyamet na ŋina abu kitenepu anyunyura keŋ.

³⁰ “Alimu Ekapolon atemar etiyata ŋituŋa a Yudaya ŋakiro ŋuna aronok alokiŋaren kaŋ, ewuakis ikes asiilyo kec Kai ŋina enyaritae a ekiro kaŋ, eturuwosi ŋina nyeseg

³¹ Tosodi erubakinito ikes edukete namuroet ŋina enyaritae Topes ŋina eyai nakadipaalat a lokoku a Inom, aŋuna ka apeyo ŋidwe kec ŋulusapa ka ŋulupesur anakim, erae ŋun ŋakiro ŋuna pa ecikit ayoŋ ikes akitiya, kori amam jik ŋakiro ŋun anatameta kaŋ.

³² Aŋun, kire jik, eponito ŋirwa ŋulu nyenyaraere nabo namuroet ŋin Topes, kori akadipaalat a lokoku a Inom, nai enyarao akadipaalat ŋina earere ŋituŋa, anerae enukete ikes ŋituŋa Topes tari ŋina edaunor akibois ŋina enukio ŋituŋa,

³³ eruworosi ŋawat a ŋituŋa a ŋul akimuj a ŋikyeny a ŋulu eporete ka akimuj a ŋityaŋ ka akwap, mam ituŋanan iritari ŋikyeny ka ŋityaŋ ŋul a nen.

³⁴ Tosodi, etasaluni ayoŋ ecelet ŋolo ka alelyanu ka alakara, etasaluni ayoŋ ecelet ŋolo a ateran ka eteran alotaunio a Yudaya ka alorotin a Yerusalem, anerae eruwor akwap ŋin acaryoit.