Yer. 6 - Ebaibul

Ŋuna eapi akitiyakin ka ŋinyas ŋulu eremere Yerusalem

¹ Okoe ŋituŋa a Benjamin toema ikotere iunosi, toema alotooma Yerusalem! Tokutakisi amomwara a emesek alo Tekoa ka kikyaasi alo Bes-Akerem ibore ŋini itoodikini ŋituŋa atemar totena, anerae ebunit aronis alo Kuju ileere nooi, ebunit akinyasuno ŋina apolon nooi.

² Esikwaani ayoŋ Sion ka neni ejok neni edakasi ŋibaren,

³ Epote ŋikeyokok ka ŋamesekin kec, imanito Sion. Edukokinete ikes ŋiemae kec kiryama Sion; iyokiyete ikes daadaŋ ŋibaren kec a ŋinituŋan nakibois keŋ.

⁴ Etemarete ikes, “Kitemonokinos aŋuna ka akirem Yerusalem, tonyoutu, oremo iŋes kidiŋ apaaran.” Nai etemarete ikes, “Okoe, keŋeli iwon, anerae awaiyasi ŋitolimon ŋulu ka ataboŋ!

⁵ Tonyoutu, emaikina iwon oremo iŋes nakwaare, ido omunaasi ŋaduketa keŋ ŋuna ka apukan.”

⁶ Alimu Ekapolon ŋolo a ŋajoresyo ebe, “Toyepakisi ŋikito keŋ kwap, todukokisi akititis ŋina elomarere akitijikin Yerusalem, Erae Yerusalem etaun ŋolo emaikina kisicanae, emam ibore ice eyai tooma keŋ mati akisicanit ŋuluce bon.

⁷ Erubakinito ŋituŋa a Yerusalem itiyaete aronis kec erae ŋina ejok aneni kec, lopite ŋolo erubakinitor akare eyakar ŋakipi ŋuna ajokak. Epupio ŋuna ka aronis ka ŋinyas bon alotooma keŋ, eyakasi neni jik ŋikadyakak ka ŋulu ewanan.

⁸ Okoe ŋituŋa a Yerusalem, tocoikisi ŋuna itiyaete iyes, ani pa kilocokis iyes ŋipitesyo kus, ekemyekini ayoŋ iyes, eturuwo etaun kus aloŋisat neni emam ŋituŋa eya.

⁹ Alimu Ekapolon ŋolo a ŋajoresyo ŋakiro nu ebe, ‘Kisokataasi ibore daadaŋ ŋini idoŋit Isirael, kikwaanikin ke emanikor a ŋikito a epiini ŋolo elemaritae ŋaraito a epiini daadaŋ. Toboŋokisi nabo alemar ibore ŋini idoŋit lopite ŋolo isokataa ituŋanan ŋaraito a epiini. ’”

¹⁰ Kiŋit Yeremia Ekapolon tema, “Ŋae emaikina ayoŋ olimok tocoik ŋakiro nu? Ŋae iirari ŋakiro kaŋ? Agol ikes ŋaki kec, aŋun, nyepedorete akiirar. Ejamuwarito ikes akirot ŋina ke Ekapolon, nyitojokito ikes akirot a Ekapolon.

¹¹ Nai ileleba anyunyura ŋina ke Ekapolon tooma kaŋ, akaburu ayoŋ akidaŋidaŋ iŋes.” Tolimu nai Ekapolon tema, “Tolimok ŋuna ka anyunyura kaŋ neni a ŋidwe alorotin ka tolimok neni a ŋatukon a ŋisorok daŋ eyaaryo ŋaberu ka ŋikilyok, eyaaryo tari ŋituŋa ŋulu emojoŋito.

¹² Eruworosi ŋakais kec ŋuna a ŋituŋa a ŋice, ŋimanikorin kec daŋ eruworosi ŋulu a ŋituŋa a ŋice, ŋaberu kec daŋ eruworosi ŋuna a ŋituŋa a ŋice, anerae esicani ayoŋ ŋituŋa ŋulu ka akwap a Isirael.

¹³ Ameun aneni a ŋulu itopolooritae ka ŋulucaryo, ecamit ŋinituŋanan akitiya ŋuna nyiyookino, ido ameun aneni a ŋikadwarak ka ŋisacaradotin itiyae ŋinituŋanan ŋuna ka alyokonu.

¹⁴ Nyimadete ikes ŋajemei a ŋituŋa pa emisito akitojokun, ido ebasi, ‘Emam ŋace, emam ŋace,’ tomam bo ŋuna ejokak.

¹⁵ Apotu ikes kitiyata ŋuna a ŋileec, apotu ikes kitiyata ŋakiro ŋuna asiilyanak. nai nyiruma ikes ŋileec, pa ayenete ikes epite ŋolo irumyata ikes ŋileec nooi. Aŋun, etwakete ikes daŋ lopite ŋolo atwakyata ŋuluce, apaki ŋina esicania ayoŋ ikes, eruwor ŋin adaunet kec.”

¹⁶ Alimu Ekapolon ŋakiro nu, “Towua anakiryamiryamet a ŋirotin, ido kiŋolikis, kiŋita neni eya ŋirotin ŋuluŋorok, neni eyai erot ŋolo ajokan, ido tomekisi iŋes, iryamunete akieŋun ŋina a ŋitai kus ŋina a ajokan. Nai apotu ŋituŋa temasi, ‘Nyikimekini isua erot ŋol.’

¹⁷ Abu daŋ ayoŋ oseu aŋuna kus ŋiketeok akwap okolimok iyes ebe, ‘Totenito akiirar eruye amomwara a emesek!’ Nai apotu ŋituŋa temasi, ‘Nyetenio isua.’

¹⁸ Aŋun, kiirasi okoe ŋituŋa a ŋakwapin, toyenutu okoe ŋatukon a ŋituŋa, ŋakiro ŋuna etakanunuyete neni kec.

¹⁹ Tolimu nai Ekapolon tema, ‘Okoe ŋituŋa a akwap, kiirasi, ayauni ayoŋ ŋican neni a ŋituŋa a lu, ŋakiro ŋuna a eropit aŋuna eyete ikes akitiya, anerae awout ikes akiirar ŋakiro kaŋ ka aŋero akitatam kaŋ.’”

²⁰ Ekainyo kaŋ ekinyate ŋolo eyaunitae alo Seba, kori akasirimaete ŋina abobon ŋina eyaunitae anakwap a ŋina alwanan? Nyacamit ayoŋ ŋainakineta kus ŋuna epeyo, kori nyeketalakarito ayoŋ tari ŋamuronisya kus.

²¹ Aŋun, alimu Ekapolon ŋakiro nu, “Kiirasi ewuak ayoŋ aŋuna a ŋituŋa a lu, akigukinet ŋina isibusokini ikes, isibusokini akigukinet ŋin ŋikauruunak ka ŋidwe, emunyarosi ŋikidunyet ka ŋikonei.

²² “Kiirasi, eponito ŋituŋa anakwap a ŋina alo Kuju, ecunasi ŋituŋa a ŋakiboisyo a ŋuna alwanak nooi anakwap.

²³ Etiŋito ikes ŋakwaaras ka ŋakawo a ŋikaleŋeleŋe, ededeŋ ikes nooi, nyisyoniyoko, epol eruye a ŋakejen kec ikwaan ka eruye a ŋakipi anam, emeto ikes ŋaŋolei ka eyakatar ŋiboro daadaŋ ŋulujiet, okoe ŋituŋa a Sion eponito ikes akirem iyes!”

²⁴ “Irworosi ŋituŋa a Yerusalem ebasi, ‘Eirar isua ŋakiro a ŋimoe kosi a ŋulu eponito, alilimiyosi ŋakan kosi; ikikamu ekabule isua, aryebakinoi isua lopite ŋolo eryabakinor aberu ŋina eapi akidoun.

²⁵ Nyilot lomanikorin, kori nyilot alorotin, anerae eyakatar ŋimoe yok ŋiboro ŋulujiet, eyai ekabule lowaetin yok daadaŋ.’

²⁶ “Irworo Ekapolon neni a ŋituŋa keŋ ebala, ‘Okoe ŋituŋa kaŋ, tonapa ŋiguniyae, kipunupunakinosi lokurono, kigworo lopite ŋolo igworore aŋuna a ikoku a ŋinidonupei, kiwololoto akiwolol ŋina apipilan nooi; anerae ebuni neni kus ekenyasan pa iyenete iyes.’

²⁷ “Yeremia, eketuruwo ayoŋ iyoŋ aneni a ŋituŋa kaŋ ŋolo ipedori akitojokun ka aliiun ŋituŋa kaŋ alopitesyo kec, ikotere nai iyoŋ iyenuni ka ikatakini akitojokun ŋuna iwuapito ikes.

²⁸ Erae ikes daadaŋ ŋituŋa ŋulu isyaaka ka eŋeroko, erukito ikes ka ŋikeyanyak, egogoŋ ŋakyes kec ikwaan ka eburonis ka asuwat, itiyaete ikes daadaŋ ka atuna.

²⁹ Epedoryo asuwat ŋina enyaritae led, aliun alokitet nai eroko nooi ŋituŋa kaŋ, nyepedoryo aliun, anerae nyelemara ŋikaronok.

³⁰ Enyarao ikes, esilipa ŋolo eŋeritoe, anerae adau Ekapolon akiŋer ikes.”