Yer. 51 - Ebaibul

¹ Alimu Ekapolon ebe, “Eyakuuni ayoŋ ekuwuam ŋolo enyasan Babilon ka lotuŋa ŋulu iboiyete alo Leb-Kamai.

² Eyakuuni ayoŋ ŋimoe ŋulu inyasunete Babilon, alemar ŋulu aronok a nen ka akinyasun akwap a Ŋibabiloniyae. Elemarete ikes ibore daadaŋ anakwap a ŋin, Apaki ŋina eponeta akirem Babilon alowaetin a daadaŋ, itiyaete ikes ŋun akoloŋit ŋina a ŋican a Babilon.

³ Nyimyekis ŋikajiok keŋ kiketakis ŋakawo a ŋikaleŋeleŋe kec ka nyimyekis ikes icodorete ka enapete ŋiboro kec ŋulu ke ejie. Tomunyasi ŋisorok a Babilon nyidoŋ tari ipei. Tomunyasi jik ŋasigarya keŋ daadaŋ.

⁴ Earakinio ikes nakwap a Ŋibabiloniyae ka ewanawanaryo ikes alorotin a etaun Babilon.

⁵ Nyimyekina Akuj kec Ekapolon ŋolo a ŋajoresyo ŋituŋa a Isirael ka ŋituŋa a Yudaya. Tari kelalak anakwap kec ŋasecisya alokiŋaren ŋolo asegan ŋolo a Isirael.

⁶ “Toema alokidiŋ Babilon, iyoŋ ŋinituŋanan, toiu akiyar kon, nyimunyarosi aŋuna ka asecit a ŋituŋa a Babilon, anerae erae na apaki ŋina inyaŋarya Ekapolon ŋakiro kec, inyaŋi Ekapolon ŋakiro ŋuna itiyato ŋituŋa a Babilon.

⁷ Ekwaan sek Babilon aneni kaŋ ka ekopo ŋolo eyai nakan kaŋ, ekopo ŋolo itiyaunitae a egolid, abu iŋes kitemerak ŋituŋa a akwap a daadaŋ apotu ŋituŋa a ŋakwapin tomata epiini keŋ aŋun, abu kimatimataa ŋituŋa a ŋakwapin nooi.

⁸ Alotooma apaki ŋina euruwuana, amunaar Babilon ka enyasun jik, kiwololoto aŋuna keŋ, yautu ekitoe ŋolo enyaritae Balam kiwuakis najemei keŋ, acepaki epedori iŋes aŋaleun.

⁹ Aponi isua kikatakinae akitaŋaleun Babilon, nai nyeŋaleuno iŋes. Emaikina iŋes kimuryakin aneni yok, emaikina iwon oloto, torotok ŋinituŋanan nakwap keŋ, anerae esican Ekapolon Babilon a apedor keŋ a daadaŋ, amunya iŋes ikes jik.

¹⁰ Adau Ekapolon akisyon iwon; potu olimosi alo Sion ŋiticisyo ŋulu etiya Ekapolon Akuj yok.

¹¹ “Kipenasi ŋikaleŋeleŋe, tosubakisi ŋaupala kus! Etonyou Ekapolon ŋitai a ŋirwosi a Medes, anerae elosikinit iŋes akinyasun Babilon. Erae ŋin akinyaŋa ŋina ebunit aneni ke Ekapolon, akinyaŋ Akai ka Akuj.

¹² Kikyasii abendera ŋina itijikinere Babilon, ŋina ebwaŋere ŋarwatatain keŋ. Kitogogoŋo ŋulu iyokiyete akwap, kiwuakisi ŋikererok kitemonokis ŋikadapitok, anerae abu Ekapolon toyeu ka esiyook, ŋakiro ŋuna alimunit iŋes aŋuna a Babilon.

¹³ Iyes ŋulu iboiyete alodiyete ŋakipi ŋuna alalak, iyes ŋulu elal abaru, adolu adaunet kus, atubo eitanit a akiyar kus.

¹⁴ Ekoŋ Ekapolon ŋolo a ŋajoresyo aŋuna keŋ atemar, kire jik, ekeyakikini ayoŋ iyes ŋasigarya ŋuna alalak, ŋuna etya emaase iworounete ikes ecelasi aŋuna ikilouniata iyoŋ.

¹⁵ “Ekapolon koloŋ asubi akwap a apedor keŋ, iŋes ewuakini akwap a aosou keŋ, ka iŋes abu topetak kidiama anayenut keŋ.

¹⁶ Ani irworikini iŋes, kiguryakin ŋakipi alokidiama ido bu ekuno anakisaleta a akwap. Iŋes iwuakini akimilya toyakaun apaki ŋina ka akiru ka iŋes eyaununui ekuwuam tokut aneni sek eyai.

¹⁷ Ebaŋaaka ŋituŋa daadaŋ ka emamukatar ayenut isirumete ŋakujo ŋulu eyeete ikes a egolid ŋileec, anerae erae ŋitorubei kec ŋicaryo, emamukatar ŋitorubei ŋul ekieŋanu.

¹⁸ ecaryooko ikes, erae etic ŋolo ejamuwaritae, emunyaryo ikes apaki ŋina ka atubokino kec.

¹⁹ Nyikoni Ekapolon Akuj a Yakob neni, anerae iŋes etiyauni ŋiboro daadaŋ, ido erae Isirael ekabila ŋolo a ŋituŋa keŋ a ŋulu abu iŋes toseu. Erae ekiro keŋ Ekapolon ŋolo a ŋajoresyo.”

Erae ŋituŋa a Isirael ŋulu itiyaete aŋuna ke Ekapolon

²⁰ “Irae iyes Ŋisirael abiro kaŋ ŋinajiet, iborosit kaŋ ŋini ke ejie. Ekesitiyae ayoŋ iyes amunyarya ŋituŋa a ŋakwapin, ekesitiyae ayoŋ iyes amunyarya ŋapukasinei;

²¹ ekesitiyae ayoŋ iyes amunyarya aŋole ka ekameton keŋ; ekesitiyae ayoŋ iyes amunyarya ŋagaari ŋuna iritae a ŋaŋolei ka ŋikametok kec;

²² ekesitiyae ayoŋ iyes aarya ekile ka aberu; ekesitiyae ayoŋ iyes aarya ekasikout ka edya; ekesitiyae ayoŋ iyes aarya esorokit ka apese;

²³ ekesitiyae ayoŋ iyes aarya ŋikeyokok ka ŋamesekin kec; ekesitiyae ayoŋ iyes aarya ŋiketak ka ŋimoŋin ŋulu itaata ikes; ekesitiyae ayoŋ iyes aarya ŋikepukak ka ŋulu iwuapito ikes anapukan.”

Akinyasuno a Babilon

²⁴ “Alimu Ekapolon atemar isicani iŋes Babilon ka ŋituŋa ŋulu iboiyete alo Babilon iteete iyes, esicani ayoŋ ikes aŋuna ka aronis a ŋina apotu ikes kitiyata Sion.

²⁵ Okoe iyes ŋituŋa a Babilon, ikwaan iyes ka emoru ŋolo ikimunyari, emoru ŋolo emunyari akwap daadaŋ. Eopeuni ayoŋ akan kaŋ ekemanit iyes, ekeriu iyes anaŋici a ŋatabab, ekesikwaanik ka emoru ŋolo anomiya akim.

²⁶ Mam amoru elemunio alotaun kus aŋuna ke ekoona, mam amoru kus elemunio tari aŋuna ka akisyakin aduketait, nai eruwor Babilon etaun ŋolo enyasun jik ŋikaru ka ŋikaru.

²⁷ Kikiasi abendera anakwap, tokutakisi amomwara a amesek alokidiŋ ŋakwapin, kitemokisi ŋituŋa a ŋakwapin aŋuna ka akitijikin Babilon, tonyarautu aŋuna keŋ ŋituŋa a ŋapukasinei a nu: Ararat, Mini ka Asikenas. Toseutu aŋuna keŋ ekarikon a ŋajorei; tocunutu aŋuna keŋ ŋaŋolei ŋuna alalak ŋuna etya emaase.

²⁸ Kitemokisi ŋituŋa a ŋakwapin aŋuna ka akitijikin Babilon, tonyarautu ŋirwosi a Medes ka ŋikepukak kec ta ŋulu iwapito ikes anapukan; tonyarautu ŋituŋa a ŋakwapin a daadaŋ a ŋuna ipukato ŋikepukak ŋul.

²⁹ Emarani akwap ka iryaŋiryaŋa aŋuna a ŋakiro a ŋuna aseu Ekapolon akitiya nakwap a Babilon, akituruwor akwap a Babilon ereŋorot, neni emam ŋituŋa iboiyete alotooma keŋ.

³⁰ Emyekis ŋikajiok a Babilon ajiore arubakis iboiyete anaduketa a ŋunajiet adaun agogoŋu kec ekwaanikin ikes ka ŋaberu, ecunyakin ŋakais a Babilon, abilibilaar ŋakito ŋuna egolitere ŋipukei keŋ.

³¹ Ekeri ekakeran epei akisiryam ŋinice ka elosi ekiyakitono epei akisiryam ŋinice, ekerete ikes alimokin erwosit a Babilon atemar, ekamar etaun alowae ke epei tari ŋoloce.

³² Ekamar ŋidoketa a ŋaŋololin ka ecunyakin ŋaduketa ŋunajiet. ka abul ŋasigarya.

³³ Alimu Ekapolon ŋolo a ŋajoresyo, Akuj a Ŋisirael ebe, ‘Ekwaan ŋituŋa a Babilon ka ŋikinyom apaki ŋina eramere analos, kikote neni daŋ, alotooma apaki ŋina euruwuana, emunyaryo ikes.’

³⁴ “Ikimunya isua erwosit Nebukadinesar ŋolo a Babilon, ikiar iŋes isua, eturuwo iŋes etaun kosi ŋolo emam ŋituŋa. Ikiliko iŋes isua lopite ŋolo ilikorya emorotot ibore. Aŋata iŋes ŋiboro kosi ŋulu ajokak daadaŋ, emasa nariet ŋulu nyecamit.

³⁵ Etemarete ŋituŋa a Sion, ‘Ikilipi kinyaŋarae ŋican kosi aneni a Babilon.’ Etemarete ŋituŋa a Yerusalem, ‘Ikilipi kinyaŋarae ŋaokot a ŋituŋa a Babilon.’

³⁶ Aŋun, alimu Ekapolon ŋakiro nu, Alosi ayoŋ akiyok iyes enyaŋa aronis ŋina etiyae neni kus, etooni ayoŋ anam kec, eokete tari ŋilelyan kec,

³⁷ ido eruwor Babilon ŋatukon a ŋamoru a ŋuna eritakinitae kwap ka neni iboiyoto ŋikweei, akibois ŋina ikitubuli iŋolikini ka ŋina ejutuwanaryo, ŋina emam ŋituŋa iboikin tooma keŋ.

³⁸ “Irurumaete ŋituŋa a Babilon kaapei ikwa ŋiŋatunyo, eruunete ikwa ŋitak a eŋatuny.

³⁹ Ani imuete ikes ŋagwe, ainakini ayoŋ ikes ŋagwe etemerak ikes, tari ŋina elakarator, tosodi tojotooros ŋajo ŋuna a jik, nyekyenyut nabo.

⁴⁰ Arikori ayoŋ ikes neni eŋolere, lopite ŋolo erikorere ŋikaalei akiŋol, lopite ŋolo erikorere ŋimeesekin ka ŋamee akiŋol.

⁴¹ Ekamar Babilon etaun ŋolo sek iturito ŋituŋa daadaŋ. Aruwor Babilon etaun ŋolo itubuli ŋituŋa daadaŋ iŋilikinete.

⁴² Alelekis ŋakipi a anam Babilon, ebwaliyasi iŋes ŋikaguragurae a ŋakipi ŋulu erwosi.

⁴³ Aruwor ŋitaunio keŋ ŋulu itubulete ŋituŋa iŋolikinete, aruwor Babilon akwap ŋina eonit ka aloŋisat, akwap ŋina emam ituŋanan iboiyo ka neni emam ituŋanan itorenene.

⁴⁴ Esicani ayoŋ Bel akuj ŋina a Babilon, etelekuni ayoŋ ŋituŋa keŋ ŋiboro ŋulu apotu ikes todemasi ŋituŋa, nyeriŋa nabo ŋituŋa a ŋakwapin eropiyete akilip neni keŋ, aritakin arwatata a Babilon.

⁴⁵ “Okoe ŋituŋa kaŋ, tolomutu kiŋa alo Babilon, iyes a ŋinituŋanan emaikina toiu akiyar keŋ, anaŋoit a Ekapolon a ŋina apolon.

⁴⁶ Nyicamut ŋitai iyalaar, ekuryaketa aŋuna a ŋakiro car a ŋuna irworosi ŋituŋa anakwap, a ŋolokaru eya ŋakiro ŋuna irworosi ŋituŋa, ani ebuni ekaru ŋoloce toyenut ŋakiro ŋace, irworosi ŋituŋa ŋakiro car ŋuna ka aryenyeo anakwap, irworosi ŋuna a ekepukan a epei a ŋolo eremokino ŋoloce.

⁴⁷ “Kire jik, eponito ŋirwa ŋulu esicania ayoŋ ŋakujo a Babilon, isirumyo akwap a Babilon daadaŋ ŋileec, earyo ŋituŋa daadaŋ alotooma keŋ.

⁴⁸ Ekaku ŋun, ecelunete ka alelyanu, ŋisubuna daadaŋ ŋulu alokwap ka ŋulu alokidiama, aŋuna ka akinyasuno a Babilon, anerae epote ŋikenyasak alo Kuju akitijikin Babilon.

⁴⁹ “Emaikina Babilon kinyasunae aŋuna a ŋituŋa a Isirael, a ŋulu apotu ŋituŋa a Babilon toara, ka aŋuna a ŋituŋa a akwap a daadaŋ a ŋulu apotu ŋituŋa a Babilon toara.

⁵⁰ Iyes ŋulu iunosi alokileŋ toloto, nyirimirimo. Totamutu Ekapolon anakwap a ŋina alwanan, ka emaikina Yerusalem eyai natameta kus.

⁵¹ Ibasi iyes, ‘Ikisurumi isua ŋileec, anerae ikiyanyo isua ikijamwari isua, elelebun ŋileec loreetin kosi, anerae apotu ŋituŋa ŋulugelae, nakiboisyo ŋuna asegak alo Kai ke Ekapolon.’

⁵² “Aŋun, alimu Ekapolon atemar, kire jik, ebunit apaki ŋina esicania ayoŋ ŋakujo a Babilon. Igworete ŋituŋa ŋulu ewanan anakwap a Babilon a daadaŋ.

⁵³ Tari kedokasi ŋituŋa a Babilon neni aoyan, tari keduko ikes ŋaduketa ŋunajiet neni eyakasi ikes alokidiama, eyakuuni ayoŋ ŋikenyasak ŋulu epote amunaar iŋes.

⁵⁴ “Kiirasi, eyai akigworo Babilon! Eyai akiyaloloŋ ŋina apolon aŋuna enyasunere akwap a Ŋibabiloniyae!

⁵⁵ Enyasu Ekapolon Babilon, eturuwo iŋes ereŋorot, esililiŋ Ekapolon ecelet a Babilon. Ekerete ŋasigarya Babilon erwosi ŋakejen esibit akiruruma a anam, epupyo ecelet kec ŋolo apolon,

⁵⁶ anerae apotu ŋikenyasak Babilon, ekamar ŋikajiok a Babilon, abilibilaar ŋakawo a ŋikaleŋeleŋe kec, anerae erae Ekapolon Akuj ŋina enyaŋan inyaŋari iŋes ŋakiro a ŋimoe keŋ lotyae ŋolo itiyatotor ikes.

⁵⁷ Etemerakini ayoŋ ŋikapolok a Babilon ka ŋikasikou keŋ, kaapei ka ŋikepukak keŋ ka ŋulu iwuapito ŋul anapukan ta ŋikajiok keŋ; ejotoorosi ikes ŋajo ŋuna nyekyenyuniata nabo jik ŋikaru ka ŋikaru.” Erwosit, ŋolo erae ekiro keŋ Ekapolon ŋolo a ŋajoresyo, iŋes alimu ŋakiro ŋun.

⁵⁸ “Alimu Ekapolon ŋolo a ŋajoresyo ebe, ‘Eritakinio kwap arwatata a Babilon ŋina aburon kiriyanikin neni daadaŋ ka akwap neni ce, ido icunyaryo ŋipukei keŋ ŋulu aoyak. Ituupasi ŋituŋa koŋin ka iteŋedara ŋituŋa a ŋakwapin ŋiticisyo ŋulu icunyaryo.’ ”

Ŋakiro ŋuna alimokini Yeremia Seraia

⁵⁹ Alokaru a ŋolo a ŋiomwon ipukat Sedekia Yudaya, tolimok ekadwaran Yeremia Seraia lokoku a Neria a ŋolo arae lokoku a Mesaia ŋakiro nu apaki ŋina alosyoto iŋes ka erwosit Sedekia ŋolo a Yudaya Babilon. Arae Seraia eketiyan a Sedekia.

⁶⁰ Abu Yeremia kigir lokitaabo ŋakiro daadaŋ ŋuna emaikina kitiyakin Babilon, arae ŋakiro ŋun daadaŋ ŋuna a Babilon.

⁶¹ Tolimok Yeremia Seraia tema, “Ani idoli iyoŋ Babilon, emaikina iyoŋ tosyom ŋakiro nu daadaŋ,

⁶² itema, ‘Okoe Ekapolon, ibu iyoŋ elope tolimu atemar inyasuni akibois na, ikotere nyeyar ŋituŋa, kori ŋityaŋ anakibois a na ka ikotere eruwor iŋes ereŋorot ŋikaru ka ŋikaru.’

⁶³ Ani irikakini akisyom ekitaabo lo, toenik amoru lokitaabo lo, tosodi kimasak kidiŋ aŋolol Eupurate,

⁶⁴ ido tolimu tema, ‘Esipori Babilon lopite ŋolo asiporor ekitaabo ŋol, nyetakanuni nabo aŋuna a ŋican a ŋulu ayauni ayoŋ neni keŋ.’” Ŋakiro ŋuna abu Yeremia tolimok Seraia ikes ŋun.