Yer. 44 - Ebaibul

Kitoroniyarae ŋituŋa ŋulu ilipete neni a ŋakujo

¹ Kirwor Ekapolon neni a Yeremia aŋuna a Ŋiyudayan a daadaŋ a ŋulu eboiyete anakwap a Ijipit alo Migidol, alo Tapanes, alo Mempis ka anakwap a Pasiros,

² Tema Yeremia, “Alimu Ekapolon ŋolo a ŋajoresyo, Akuj a Ŋisirael ebe, ‘Iŋolikis iyes ŋilopeyek ŋican ŋulu abu ayoŋ oyau neni a ŋituŋa a Yerusalem ka lotuŋa ŋulu a ŋitaunio a Yudaya a daadaŋ. Kiŋolikisi ŋakiboisyo ŋun tokona, erae ŋireŋoroto, mam ituŋanan iboi alotooma kec,

³ anerae apotu ŋituŋa kec kitiyata aronis, eketoŋoa ayoŋ aŋuna aponiata toloto ainanakin ŋainakineta neni a ŋakujo a ŋace ka akitiyanakin ŋakujo ŋuna pa ayenete ikes, pa iyenete tari iyes; kori pa ayenete tari atapapaa kus.’

⁴ Kikote neni daŋ, abu ayoŋ orubak ekeyakianakini iyes ŋiketiyak kaŋ ŋikadwarak abala, ‘Ekemaimai ayoŋ iyes, nyitiyata ŋakiro ŋuna ka asiilyo ŋun ŋuna aremokino ayoŋ!’

⁵ Nai apotu ikes nyiirasi ŋakiro a ŋikadwarak kaŋ, nyepupokina daŋ ŋuna erworosi ikes, apotu nyimyekis ŋiticisyo kec ŋulu aronok ka ainanakin ŋainakineta neni a ŋakujo a ŋace.

⁶ Aŋun, abu anyunyura kaŋ ka aŋoit kaŋ toyakaun lotaunio a Yudaya daadaŋ ka lorotin a Yerusalem, apotu ŋitaunio ŋul toruworos ŋicaryo ka ŋireŋoroto lopite ŋolo eyakatar tokona.

⁷ Alimu tokona Ekapolon ŋolo a ŋajoresyo, Akuj ŋina a Ŋisirael atemar kaanukiro itiyaata iyes ŋakiro ŋuna eduporok iyes, ŋuna elemarete ŋikilyok, ŋaberu, ŋidwe ka ŋiŋwea anakwap a Yudaya, tomamukaun ŋipiya kus idoŋete?

⁸ Kaanukiro ikitoŋoeta iyes ayoŋ a ŋiticisyo a ŋulu itiyaete iyes a ŋakan kus, inanakinete ŋainanakineta neni a ŋakujo a ŋace anakwap a Ijipit aneni ipotu iyes akiboi? Icamito iyes ikimunyar, ido toruworos ŋituŋa ŋulu icenere ŋuluce ka inyasere ŋituŋa ŋulu a ŋakwapin a daadaŋ a?

⁹ Ikimuryakis iyes ŋiticisyo ŋulu aronok ŋulu etiyaete atapapaa kus, ŋiticisyo ŋulu etiyaete ŋirwosi a Yudaya ka ŋulu etiyaete ŋaberu kec, ŋiticisyo kus a ŋulu aronok ŋulu ipotu iyes kitiyata anakwap a Yudaya ka alorotin a Yerusalem a?

¹⁰ Nyekiwa ikes, kori nyebulo ikes akitodol tari nakoloŋit na, nyiricakina ikes tari ŋikisila kaŋ ka ŋakiro ŋuna atubunit ayoŋ ŋuna abu ayoŋ okoinak iyes ka oinak atapapaa kus.

¹¹ “Aŋun, alimu Ekapolon ŋolo a ŋajoresyo, Akuj a Ŋisirael ebe, ‘Emukekinit ayoŋ akisican iyes, akitoŋopiyar ŋituŋa a Yudaya daadaŋ.

¹² Amunyari ayoŋ ŋipiya a Yudaya daadaŋ ŋulu imukekinito alosit nakwap a Ijipit, akiboi a ina, etwakete ikes daadaŋ anakwap a Ijipit a ekileŋ ka akoro, ameun a ŋulucaryo tari ŋulu itopolooritae etwakete ikes a ekileŋ ka a akoro, ejamuwarete ŋituŋa ikes ka iyanyio ŋituŋa isitiyao ekiro kec, ituruworyo ekiro kec ŋolo icenere ŋuluce ka ŋolo inyasere ŋuluce.

¹³ Esicani ayoŋ ŋituŋa ŋulu iboiyete alo Ijipit, lopite ŋolo abunio ayoŋ esican ŋituŋa a Yerusalem a ekileŋ, a akoro ka a edeke,

¹⁴ ikotere emamukaunor ipei daŋ a Ŋiyudayan a ŋulu apotu toloto akiboi Ijipit ŋini ebucar, kori eiun, kori eboŋori nakwap a Yudaya. Tari kimuit ikes aboŋor Yudaya, nyeboŋorete ikes jik, alemar ŋikerimitok ŋidi bon.’ ”

¹⁵ Anen, aponi ŋikilyok daadaŋ ŋulu ayenete atemar apotu ŋaberu kec inanakis ŋainakineta neni a ŋakujo a ŋace ka ŋaberu daadaŋ ŋuna awuasi a nen ta atukot ŋina ti alalan kaapei ka ŋituŋa daadaŋ ŋulu eboiyete alo Pasiros, anakwap a Ijipit, toboŋokis Yeremia temasi,

¹⁶ “Nyikicamuni isua akiirar ŋakiro ŋuna idau iyoŋ alimokin isua alokiro ke Ekapolon.

¹⁷ Nai ikitiyae isua ŋuna adaun akikoŋ atemar ikitiyae, ikiinakini isua ŋainakineta kosi neni a arwosit a ŋina anakuj ka einakinio iŋes ŋainakineta ŋuna a ŋimaten lopite ŋolo sek etiyaere isua ka ŋolo sek etiyaata atapapaa kosi, ŋirwosi kosi ka ŋikapolok kosi alotaunio a Yudaya ka alorotin a Yerusalem. Ayakare isua akimuj ŋina alalan, ayakare abaru ka amam ŋican.

¹⁸ Nai ameun anapaki a ŋina ajoŋoere isua ainanakin ŋainakineta neni a arwosit a ŋina anakuj ka ainanakin iŋes ŋainakineta ŋuna a ŋimaten, ecanakinoi isua ŋiboro daadaŋ ka ikiari a ekileŋ ka eron.”

¹⁹ Tolimut ŋaberu temasi, “Kire jik, ikirubakini isua ikiinanakini ŋainakineta neni a arwosit a ŋina anakuj ka ainanakin iŋes ŋainakineta ŋuna a ŋimaten, itami iyoŋ atemar epoununuyo isua ŋamugati aŋuna keŋ, ŋamugati ŋuna eyekinitae etorube keŋ ka atemar ainanakinio isua ŋainakineta ŋuna a ŋimaten neni keŋ pa ecamunito ŋikilyok kosi a?”

²⁰ Tolimok nai Yeremia ŋituŋa daadaŋ ŋikilyok ka ŋaberu, ŋulu aboŋonokinete ŋakiro keŋ tema,

²¹ “Ani eruwor ŋainakineta ŋuna ipotu iyes inanakis alotaunio a Yudaya ka alorotin a Yerusalem, iyes kaapei ka atapapaa kus, ŋirwosi kus, ŋikapolok kus ka ŋituŋa ŋulu anakwap kus, pa mono abu Ekapolon totamu ŋainakineta ŋun a? Pa apotu ŋainakineta ŋun potu natameta keŋ a?

²² Abu Ekapolon nyepedo akidaŋidaŋ ŋiticisyo kus ŋulu aronok, asiilyo ŋina ipotu iyes kitiyata, aŋun, abu akwap kus toruwor ereŋorot, acaryoit ka ŋina a ŋicen tomamukaun ituŋanan eyai lopite ŋolo eyakar tari nakoloŋit na.

²³ Etiyakin ŋican ŋul neni kus aŋuna iponiata iyes kicunya ŋainakineta ka aŋuna iponiata iyes toseca aneni ke Ekapolon, nyiwuapa ŋakiro keŋ, kori kiwuapa ŋikisila keŋ ka ŋakiro ŋuna atubunit iŋes ta ŋuna elimunit iŋes.”

²⁴ Tolimok Yeremia ŋituŋa daadaŋ ka ŋaberu daadaŋ tema, “Kiirasi ŋakiro a Ekapolon, iyes Ŋiyudayan daadaŋ ŋulu iyakasi nakwap a Ijipit.

²⁵ Alimu Ekapolon ŋolo a ŋajoresyo, Akuj a Ŋisirael atemar, Itiyata iyes kaapei ka ŋaberu kus ŋakiro ŋuna ipotu iyes kiikis ibasi, ‘Ikimukekini isua akitiya ŋakiro ŋuna aponi kikoŋoi, ŋakikoŋieta ŋuna ka ainanakin ŋainakineta neni ka arwosit a ŋina anakuj ka ainanakin iŋes ŋainakineta a ŋimaten.’ Toŋirikisi akitiya ŋun, kiwuapa ŋuna idaut iyes akikoŋ ka inanakisi ŋainakineta ŋuna a ŋimaten.

²⁶ Aŋun, kiirasi ŋakiro a Ekapolon iyes Ŋiyudayan daadaŋ ŋulu iboiyete alo Ijipit. Topupokisi alimu Ekapolon ebe, ‘Ekoŋi ayoŋ a ekiro kaŋ a ŋolo apolon nooi atemar nyelimuni nabo ituŋanan a Yudaya idio ekiro kaŋ anakwap a Ijipit a daadaŋ ebala, ikwapei eyarya Ekapolon Akuj.’

²⁷ Alosi ayoŋ akitere iyes aŋuna ka awania, meere aŋuna ka ajokis, ŋituŋa daadaŋ ŋulu a Yudaya ŋulu eyakasi Ijipit earyo a ekileŋ ka eron tari ŋina emamukaunor tari ipei daŋ ŋini idoŋi.

²⁸ Ani ŋulu epuunosi alokileŋ eboŋorete anakwap a Ijipit Yudaya, erae ŋidikudyo, tosodi nai eyenunete ŋipiya a Ŋiyudayan ŋulu apotu toloto akiboi alo Ijipit ŋakiro ŋun atemar ŋakiro a ŋae eyookin aŋuna kec, kori aŋuna kaŋ.

²⁹ Ebala Ekapolon, ‘Erae akitoodikinet atemar abuni ayoŋ akisican iyes anakibois a na, ikotere iyenuniata iyes atemar iyookin kire jik ŋakiro kaŋ ŋuna alimu ayoŋ aŋuna kus:

³⁰ Ainakini ayoŋ Parao Opira erwosit a Ijipit napedor a ŋimoe keŋ, a ŋulu imanito akiyar keŋ, lopite ŋolo abunio ayoŋ oinakinia erwosit Sedekia ŋolo a Yudaya napedor a erwosit Nebukadinesar a ŋolo a Babilon a emoit keŋ a ŋolo emanit akiyar keŋ.’”