Yer. 43 - Ebaibul

Yaarae Yeremia Ijipit, tolimok iŋes ŋituŋa ŋuna ka atubokino

¹ Kedau Yeremia alimokin ŋituŋa daadaŋ ŋakiro ŋun ŋuna ke Ekapolon Akuj kec, ŋakiro ŋuna eyakit Ekapolon Akuj kec iŋes alimokin ŋituŋa,

² toloto Asaria lokoku a Osaia ka Yoanan lokoku a Karea ta ŋituŋa ŋulu aosok daadaŋ tolimokis Yeremia temasi, “Irworo iyoŋ alyokonu. Nyiyakuuna Ekapolon iyoŋ alimokin isua ebe, ‘Nyiloto Ijipit kiboiyoto a ina;’

³ Nai Baruk lokoku a Neria iŋes ikicocoi iyoŋ aŋuna kosi akipotokin isua neni a Ŋibabiloniyae, ikotere ikes ikiarete isua, kori itorikosi isua ikirae ŋirikon Babilon.”

⁴ Aŋun, apotu Yoanan lokoku a Karea ka ŋikapolokinitok a ŋajoresyo daadaŋ ta ŋituŋa daadaŋ towout akiwuap ŋakiro a Ekapolon akiboi anakwap a Yudaya.

⁵ Nai abu Yoanan kaapei ka ŋikapolokinitok a ŋajoresyo yaasi ŋipiya a ŋituŋa a Yudaya daadaŋ ŋulu apotu toboŋut akiboi anakwap a Yudaya anakwapin a daadaŋ a ŋuna sek aponi ikes kielarae,

⁶ ŋituŋa ŋulu ikes ŋikilyok, ŋaberu, ŋidwe, ŋidwe a erwosit ŋulupesur ka ŋituŋa daadaŋ ŋulu abu Nebusaradan ekapolokiniton a ŋasigarya a Babilon kimyek ka Gedalia lokoku ka Aikam a ŋolo arae lokoku a Sepan, yaasi tari ekadwaran Yeremia ka Baruk lokoku a Neria.

⁷ Toloto ikes nakwap a Ijipit, anerae apotu ikes toŋero ŋakiro ke Ekapolon, todolo tari Tapanes.

⁸ Kirwor nai Ekapolon neni a Yeremia alo Tapanes tema,

⁹ “Tolemu ŋamoru ŋuna aburok ŋaarei todak a ŋakan kon, ido tonukak ŋamoru ŋun nalup diyete neni elomarere kai ŋina a Parao ŋina ka apukan alo Tapanes. Kimyek Ŋiyudayan ikiŋolikis iyoŋ itiyae ŋun,

¹⁰ tosodi tolimok ikes ebe, ‘Alimu Ekapolon ŋolo a ŋajoresyo, Akuj a Ŋisirael atemar; alosi ayoŋ eyakuu ka oyau eketiyan kaŋ erwosit Nebukadinesar ŋolo a Babilon, iwuakini ekicoloŋ keŋ ŋolo ka apukan kidiama ŋamoru nu ŋuna anukak ayoŋ kwap ka epetakini iŋes eema ŋolo ka apukan keŋ kidiama kec.

¹¹ Ebuni iŋes akinyasun akwap a Ijipit, inak ŋulu etubokinitae atwanare a edeke toryamut edeke, ŋulu etubokinitae arikor erae ŋirikon torikoroe ka ŋulu etubokinitae atwanare a ekileŋ toarae a ekileŋ.

¹² Inokakini iŋes akim nakais a ŋakujo a Ijipit, icunyakini iŋes ŋakais ŋun toriko ŋituŋa erae ŋulu ikamaritae, epyaari iŋes akwap a Ijipit lopite ŋolo elemarya ekeyokon ŋilac alolou keŋ, toboŋo a nen emam ŋace.

¹³ Eritakini iŋes kwap ŋipirin a Eliopolis ŋulu a etal ŋulu eya Ijipit ka icunyakini ŋakais a ŋakujo a Ijipit.’ ”