Yer. 41 - Ebaibul

Toarae Gedalia

¹ Ani edoli elap ŋolo a ŋikanikaarei, abu Isimael lokoku a Nesania a ŋolo arae lokoku a Elisama a ŋolo anateker a erwosit, epei a ŋikapolok a ŋulu epukatotor erwosit, abu iŋes torukut ka ŋikilyok ŋitomon neni a Gedalia alokoku ka Aikam potu Misipa. Apaki ŋina emujata ikes ŋamugati kaapei alo Misipa,

² Tonyout Isimael lokoku a Nesania ka ŋikilyok ŋulutomon toara a ekileŋ Gedalia lokoku ka Aikam a ŋolo arae lokoku a Sapan, anerae kebu erwosit a Babilon toseu iŋes akipuka ŋituŋa alo Yudaya.

³ Abu daŋ Isimael toar Ŋiyudayan daadaŋ ŋulu arukito ka Gedalia alo Misipa ka ŋasigarya a Ŋibabiloniyae ŋuna ayakasi nen.

⁴ Akoloŋit ŋina atupakini akoloŋit ŋina aarere Gedalia, eriŋa idiotuŋanan nyeyanyuna ŋakiro ŋun,

⁵ todolut ŋikilyok ŋatomonikanikauni alo Sekem, Silo ka Samaria ebanyaritae ŋipeneka kec, tonapito ŋilowi ŋulu acilicilya toduŋuduŋo ŋawat kec, ayaunito ikes ŋainakineta ŋuna a ŋikinyom ka ekinyate ainakin neni ke Ekapolon alo Kai ka Akuj.

⁶ Tolomu Isimael lokoku a Nesania kiŋa alo Misipa akisiryam ŋikilyok ŋul, egworo iŋes ebunit. Ani iryamun iŋes ka ikes, tolimok ikes tema, “Potu neni a Gedalia a lokoku a Aikam.”

⁷ Ani edolete ŋikilyok ŋul kidiŋ etaun, apotu Isimael lokoku a Nesania ka ŋikilyok ŋulu arukitotor iŋes toara ŋikilyok ŋul a ekileŋ, kimasakis ŋawat kec tooma akare.

⁸ Nai aya alokidiŋ kec ŋikilyok ŋitomon ŋulu apotu tolimokis Isimael temasi, “Nyikiar kare ca isua, anerae ikiyakar isua ŋisitowae a ŋikinyom a ŋaganoi, a ŋikinyom a ŋulu esibito erau ka akimyet ta ao, iwuaitae isua ŋiboro ŋul alomanikor.” Aŋun, abu Isimael nyear ikes kaapei ka ŋirukitos kec.

⁹ Arae akare ŋina emasakini Isimael ŋawat daadaŋ ŋuna a ŋikilyok a ŋulu abu iŋes toar, akare ŋina apolon, ŋina koloŋ keboki erwosit Asa aŋuna ka akiuryarya erwosit Baasa ŋolo a Isirael nyerem iŋes. Abu Isimael kilelebik akare ŋin ŋawat a ŋikilyok a ŋulu abu iŋes toar.

¹⁰ Toriko nai Isimael ŋituŋa ŋuluce daadaŋ ŋulu aya Misipa, ŋidwe a erwosit ŋulupesur ka ŋituŋa daadaŋ ŋulu edoŋito Misipa ŋulu kebu Nebusaradan ekapolokiniton a ŋasigarya a Babilon kicikak neni a Gedalia alokoku a Aikam. Abu Isimael toriko ŋituŋa ŋul daadaŋ erae ŋirikon totuboror nakwap a Ŋiamoni.

¹¹ Nai ani iirarete Yonasan lokoku a Karea ka ŋikarikok a ŋajoresyo ŋulu arukitotor iŋes ŋakiro daadaŋ ŋuna kebu Isimael lokoku a Nesania kitiya,

¹² tocunakis ŋikilyok ŋulu arukitotor ikes daadaŋ toloto akitijiore Isimael lokoku a Nesania. Kisiiryakis ikes iŋes anabwal a ŋina apolon a ŋina ayai Gibeon.

¹³ Ani iŋolikinete ŋituŋa ŋulu arukito ka Isimael Yoanan lokoku a Karea ka ŋikarikok a ŋajorei erukito ka iŋes, tolakar.

¹⁴ Aŋun, apotu ŋituŋa daadaŋ ŋulu abu Isimael torik erae ŋirikon alo Misipa toboŋosi toloto neni a Yoanan alokoku a Karea.

¹⁵ Nai abu Isimael lokoku a Nesania tosi aneni a Yoanan kaapei ka ŋikilyok ŋikanikauni, toloto neni a Ŋiamoni.

¹⁶ Apotu nai Yoanan lokoku a Karea ka ŋikarikok a ŋajorei ŋulu arukitotor iŋes yaasi ŋituŋa ŋulu edoŋito ŋulu kebu Isimael lokoku a Nesania toriko alo Misipa erae ŋirikon kedau akiar Gedalia lokoku ka Aikam, ŋasigarya, ŋaberu, ŋidwe, ŋikolupanotin ŋulu sek kebu Yoanan yau alo Gibeon.

¹⁷ Torotokis nai ikes, ido kieŋut alo Gerus-Kimiam alodiyete Betelem ecamito alosit Ijipit,

¹⁸ akisii aneni a Ŋibabiloniyae a ŋulu etubulito ikes, anerae abu Isimael lokoku a Nesania toar Gedalia lokoku ka Aikam ŋolo abu erwosit a Babilon kituruwo ekepukan a Yudaya.