Yer. 39 - Ebaibul

Kikamarae Yerusalem

¹ Alokaru a ŋolo a ŋitomon elap ŋolo a ŋitomon ipukat erwosit Sedekia ŋolo a Yudaya, abu erwosit Nebukadinesar ŋolo a Babilon kaapei ka ŋasigarya keŋ daadaŋ potu Yerusalem kirikaut.

² Alokaru a ŋolo a ŋitomon ka epei ŋirwa ke elap ŋikanikaomwon elap ŋolo a ŋiomwon ipukat Sedekia, aponi topedoi arwatata a etaun.

³ Ani ikamario Yerusalem, apotu ŋikapolok daadaŋ ŋulu a erwosit a Babilon potu kiboikinos lopuke ŋolo alokidiŋ etaun. Ŋikapolok ŋul ikes lu: Nerigalisareser, Samirigarinebo, Sarisekim ŋolo a Rab-Saris, Nerigalisareser ŋolo a Rab-Mag ka ŋikapolok a erwosit a Babilon ŋuluce daadaŋ.

⁴ Ani iŋolikinete erwosit Sedekia ŋolo a Yudaya ka ŋasigarya a Yudaya daadaŋ ŋikapolok a erwosit a Babilon, apotu toema nakwaare alotaun, kitoro ikes lopuke ŋolo apedokinitoe kidiŋ ŋarwatatain ŋuna edunyasi ka emanikor ŋolo ke erwosit, tari daŋ ŋina erikaunitotor Ŋibabiloniyae etaun. Apotu ikes toema lowae ŋolo ka Araba.

⁵ Nai apotu ŋasigarya a Ŋibabiloniyae kiwuapakis ikes, ido toditasi Sedekia anadipoe a Yeriko. Kedaut akikamun Sedekia, kitipeunioto iŋes neni a erwosit Nebukadinesar a ŋolo a Babilon alo Ribila anakwap a ŋina ka Amas. Abu nai erwosit totubok Sedekia a nen.

⁶ Abu erwosit a Babilon toŋol ŋidwe a Sedekia ŋulusapa alo Ribila ite Sedekia, abu daŋ erwosit a Babilon toŋol ŋikapolok a akwap a Yudaya daadaŋ.

⁷ Togoro erwosit a Babilon ŋakonyen a Sedekia, ido toenae iŋes a ŋiriko yaarae Babilon.

⁸ Apotu Ŋibabiloniyae kicunyasi akai a erwosit ka ŋakais a ŋituŋa, ido toritakis ŋarwatatain a Yerusalem.

⁹ Tosodi abu Nebusaradan ekapolokiniton a ŋasigarya a Babilon toriko Babilon ŋituŋa daadaŋ ŋulu aya lotaun ŋulu apotu toriwo ka iŋes ka ŋituŋa ŋulu edoŋito lotaun.

¹⁰ Abu daŋ Nebusaradan ekapolokiniton a ŋasigarya a Babilon kimyek anakwap a Yudaya ŋituŋa ŋidi ŋulu akulyakaka ŋulu amam ŋiboro ayakatar, inak ikes ŋimanikorin a ŋikito a epiini ka ŋimanikorin a ŋikinyom daŋ.

Tolacakinae Yeremia, totamu iŋes Ebed-Melek

¹¹ Abu erwosit Nebukadinesar tolimu aŋuna a Yeremia neni a Nebusaradan a ekapolokiniton a ŋasigarya a Babilon tema,

¹² “Yau iŋes, kite iŋes ejok, nyitiya aronis adio neni keŋ, nai kitiya neni keŋ lopite ŋolo ikiŋisya iŋes iyoŋ.”

¹³ Aŋun, abu Nebusaradan ŋolo a apolokinit ŋasigarya a Babilon ka Nebusasiban ŋolo a Rab-Saris, Nerigalisareser ŋolo a Rab-Mag ta ŋikapolok a erwosit a Babilon daadaŋ kiyakiyasi ituŋanan

¹⁴ yaut Yeremia analapatu a ŋina eboiyoto ŋasigarya ŋuna eteete akai a erwosit. Apotu ŋul inakis Yeremia neni a Gadalia a lokoku ka Aikam a ŋolo arae lokoku a Sapan ikotere ya Yeremia lore keŋ. Aŋun, abu Yeremia kiboiyoto ka ŋituŋa keŋ.

¹⁵ Ani eriŋa Yeremia eyai nalapatu ŋina eboiyoto ŋasigarya ŋuna eyokiyete akai a erwosit, kirwor Ekapolon neni a Yeremia tema,

¹⁶ “Tolot, tolimok Ebed-Melek Esiopiait ebe, ‘Ebala Ekapolon ŋolo a ŋajoresyo, Akuj a Ŋisirael, alosi ayoŋ akisiyookin ŋakiro kaŋ aŋuna ke etaun a lo aŋuna ka aronis keŋ meere aŋuna ka ajokis keŋ, iyookin ŋakiro ŋun akoloŋit ŋin toyai iyoŋ.

¹⁷ Nai akaiuni ayoŋ iyoŋ akoloŋit ŋin, ido nyikiinakinio iyoŋ napedor a ŋulu ikitubulito iyoŋ,

¹⁸ anerae kire jik, akaiuni ayoŋ iyoŋ ka nyikiaryo iyoŋ a ekileŋ, nai aiuni ayoŋ akiyar kon alojie, anerae ibu iyoŋ ikikinyom ayoŋ.’”