Yer. 37 - Ebaibul

Akigeno a Sedekia ŋina a ikoŋin

¹ Abu Sedekia lokoku a Yosia ŋolo abu erwosit Nebukadinesar ŋolo a Babilon kituruwo erwosit a Yudaya kilunyokin neni a Yooakin a lokoku a Yeoiakim kipuka Yudaya.

² Nai nyiwuapa iŋes, kori ŋiketiyak keŋ, kori ŋituŋa a akwap a ŋin ŋakiro ŋuna erworo Ekapolon aneni a ekadwaran Yeremia.

³ Abu Sedekia kiyakiya Yeukal lokoku a Semaia ka esacaradoti Sepania lokoku a Mesaia neni a ekadwaran Yeremia tema, “Okoe, kilip kareca aŋuna kosi neni a Ekapolon Akuj yok.”

⁴ Apaki ŋin ariŋa Yeremia irimit edolonokini ŋituŋa, anerae ariŋa nyiwuakina iŋes mabus.

⁵ Apaki ŋinapei, aris ŋasigarya a Parao kepotu alo Ijipit, ani iirarete Ŋibabiloniyae ŋulu aris kirikaut Yerusalem ŋakiro a ŋasigarya a Parao, apotu toboŋosi alo Yerusalem.

⁶ Abu nai Ekapolon kirwor neni a Yeremia tema,

⁷ “Alimu Ekapolon Akuj ŋina a Ŋisirael ebe, ‘Tolimokisi iyes ŋiarei erwosit a Yudaya ŋolo ikiyakuunit iyes akiŋit ayoŋ ŋuna emaikina kitiya, atemar eboŋorete nakwap kec Ijipit ŋasigarya a Parao ŋuna eponito akiŋarakin iyoŋ.

⁸ Nai eboŋunete Ŋibabiloniyae akitijiore ŋituŋa a etaun a lo, ikimarete ikes etaun kicunyakis a akim.’

⁹ Aŋun, nyimodikinosi bon ibasi, ‘Kire jik eakarete Ŋibabiloniyae aneni kosi,’ anerae nyeakarete ikes jik.

¹⁰ Tari kilout iyes ŋasigarya a Ŋibabiloniyae daadaŋ ŋuna ikitijiete iyes, ido kidoŋo alotooma kec ŋikilyok ŋulu ewanitae loeemae kec, epedorete ŋikilyok ŋul anyoun kicunyakis etaun lo a akim.”

Toenae Yeremia alo mabus

¹¹ Kedaut ŋasigarya a Ŋibabiloniyae aboŋor alo Yerusalem aŋuna aponiata ŋasigarya a Parao,

¹² abu Yeremia torotok alo Yerusalem ecamit alosit nakwap a Benjamin aŋuna ka aryamun ŋiboro ŋulu emaikina iŋes toryamu alotuŋa keŋ.

¹³ Ani edoli iŋes lopuke ŋolo enyaritae Epuke a Benjamin, abu ekile ŋolo ete epuke, ekile ŋolo anyaritae Irija lokoku a Selemia a ŋolo arae lokoku ka Anania kikamu ekadwaran Yeremia ebala, “Icamit iyoŋ akisii neni a Ŋibabiloniyae.”

¹⁴ Tolimok Yeremia iŋes tema, “Erae ŋun alyokonu, nyasiit ayoŋ neni a Ŋibabiloniyae.” Nai towou Irija akiirar ŋakiro a Yeremia, tosodi kikamu Yeremia toriko iŋes neni a ŋikapolok.

¹⁵ Toŋoikis ŋikapolok Yeremia, kidica iŋes, tosodi toroca iŋes alokai a Yonasan a ekegirigiran, anerae aponi kituruworoe akai ŋin ejera.

¹⁶ Aŋun, aponi kiwuakinae Yeremia kai ŋina abokitae akare, nagule ŋina ayai tooma akai neni abu iŋes kiboiyo ŋirwa ŋulu alalak.

¹⁷ Abu nai erwosit Sedekia kiyakiya tonyaraunae Yeremia, ido abu iŋes kijau iŋes. Abu erwosit kiŋitiŋit Yeremia alokai keŋ anakimunono tema, “Eyai akirot adio aneni ke Ekapolon a?” Toboŋok Yeremia tema, “Eyai!” Tolimok erwosit iŋes tema, “Aŋun, ikiinakinio iyoŋ neni a erwosit a Babilon.”

¹⁸ Tolimok Yeremia daŋ erwosit Sedekia tema, “Anukiro ŋuna aronok ŋuna etiyat ayoŋ neni kon, kori neni a ŋiketiyak kon, kori neni a ŋituŋa a lu ŋuna ikiwuakinitor iyoŋ ayoŋ lojera?

¹⁹ Ai eya ŋikadwarak kon ŋulu adwarete aŋuna kon ebasi, ‘Nyebuni erwosit a Babilon akitijiore iyoŋ ka ŋituŋa a akwap a na?’

²⁰ Ekelipi tokona, kiirarae ŋakiro kaŋ erwosit, tojokyar kiira adyekitoi kaŋ ka nyikinyaka kai a Yonasan a ekegirigiran atwanare a nen.”

²¹ Aŋun, abu erwosit Sedekia tolimu atemar yae Yeremia nalapatu ŋina eboiyoto ŋasigarya ŋuna iyokiyete akai a erwosit ka aponi a ŋinakoloŋit inakinae iŋes amugati ŋina ayaununuyo alorot a ŋolo aya ŋikepok ŋamugati, akitodol neni adaunotor ŋamugati alotaun. Aŋun, abu Yeremia kiboi analapatu a ŋina eboiyoto ŋiketeok akai a apukan.