Yer. 36 - Ebaibul

Tosyomae ekitaabo alo Kai ka Akuj

¹ Alokaru a ŋolo a ŋiomwon ipukat Yeoiakim lokoku a Yosia a ŋolo a Yudaya, kirwor Ekapolon neni a Yeremia ŋakiro nu tema,

² “Tolemu ekitaabo kigir ŋakiro daadaŋ ŋuna akalimok ayoŋ iyoŋ aremokino ŋituŋa a Isirael ka ŋituŋa a Yudaya ta ŋituŋa a ŋakwapin a daadaŋ, kigir ŋakiro ameun anakoloŋit a ŋina erworor ayoŋ neni kon ka ŋuna alorwa a ŋulu a Yosia tari nakoloŋit na.

³ Acepaki ani kiirasi ŋituŋa a Yudaya ŋakiro ŋuna a ŋican a ŋulu a acamit ayoŋ ainakin ikes, epedorete ikes akimyekin ŋipitesyo kec ŋulu aronok, ikotere ayoŋ esyoni ikes aŋuna ka aronis kec ka aŋuna ka asecit kec.”

⁴ Tonyarau nai Yeremia Baruk lokoku a Neria, ido abu Baruk kigir lokitaabo ŋakiro ŋuna alimuni Yeremia, ŋakiro ke Ekapolon daadaŋ ŋuna abu iŋes tolimok Yeremia.

⁵ Tolimok Yeremia Baruk tema, “Nyakacamakinitae ayoŋ alomar Kai ka Akuj,

⁶ aŋun tolot iyoŋ elope; tosodi akoloŋit ŋina iredakinitere akiron tosyom ŋakiro ke Ekapolon alokitaabo a ŋolo igiri iyoŋ, ŋakiro ŋuna akalimonokini ayoŋ iyoŋ. Tosyom ikes alo Kai ka Akuj epupete ŋituŋa, emaikina iyoŋ tosyom ŋakiro ŋun topupete ŋituŋa a Yudaya daadaŋ ŋulu eponito alotaunio kec.

⁷ Acepaki edoli adyekitoi kec neni ke Ekapolon ka imyekinete ikes akiwuapit ŋuna aronok, anerae epol nooi aŋoit ke Ekapolon ka anyunyura keŋ ŋina alimu iŋes eremokino ŋul.”

⁸ Abu nai Baruk lokoku a Neria kitiya ŋakiro daadaŋ ŋuna alimokini ekadwaran Yeremia iŋes, ŋuna ka akisyom alo Kai ka Akuj ŋakiro ke Ekapolon ŋuna egiritae lokitaabo.

⁹ Alokaru a ŋolo a ŋikan elap ŋolo a ŋikanikaomwon ipukat erwosit Yeoiakim lokoku a Yosia ŋolo a Yudaya, apotu ŋituŋa ŋulu eboiyete alo Yerusalem ka ŋituŋa daadaŋ ŋulu aponito Yerusalem alotaunio a Yudaya kiseraut akiredakin akiron alokiŋaren Ekapolon.

¹⁰ Abu nai Baruk tosyom ŋakiro a Yeremia ŋuna egiritae lokitaabo alokiŋaren ŋituŋa daadaŋ alo Kai ke Ekapolon anagule a Gemaria a lokoku a Sapan a ŋolo arae ekegirigiran, ayai agule ŋin nalapatu ŋina alokidiama diyete neni elomarere lopuke ŋolo enyaritae Epuke ŋolokitete alo Kai ka Akuj.

Tosyomae ekitaabo alokai ka apukan

¹¹ Ani iirari Micaia lokoku a Gemaria a ŋolo arae lokoku a Sapan ŋakiro ke Ekapolon daadaŋ ŋuna asyomyo alokitaabo,

¹² abu tolot kai a erwosit, toloma nagule ŋina a ekegirigiran, eboiyete ŋikapolok daadaŋ a nen. Ŋikapolok ŋul ikes lu: Elisama ekegirigiran, Delaia lokoku a Semaia, Elinasan lokoku ka Akibor, Gemaria lokoku a Sapan, Sedekia lokoku ka Anania ka ŋikapolok ŋuluce daadaŋ.

¹³ Tolimok Micaia ikes ŋakiro daadaŋ ŋuna abu iŋes kiira apaki ŋina asyomya Baruk ekitaabo epupete ŋituŋa daadaŋ.

¹⁴ Apotu nai ŋikapolok daadaŋ kiyakiyasi Yeudi lokoku a Nesania a ŋolo arae lokoku a Semaia a ŋolo arae lokoku a Kusi alimokin Baruk ebe, “Yau ekitaabo ŋolo isyomi iyoŋ epupete ŋituŋa daadaŋ ka bua iyoŋ daŋ.” Aŋun, abu Baruk lokoku a Neria tolemu ekitaabo totiŋ, ido tolot neni aya ŋikapolok.

¹⁵ Tolimokis ŋikapolok Baruk temasi, “Kiboikin, ido itosyomak isua ŋakiro ŋun.” Aŋun, abu Baruk tosyomak ikes ŋakiro ŋun.

¹⁶ Ani iirarete ŋikapolok ŋakiro ŋun daadaŋ, kiŋolikinosi make ebulit temasi neni a Baruk, “Kire jik, emaikina isua olimokisi ŋakiro nu daadaŋ neni a erwosit.”

¹⁷ Kiŋita nai ŋikapolok Baruk temasi, “Tolimokinae tokona isua epite ŋolo igirya iyoŋ ŋakiro nu daadaŋ, arae mono ŋuna erworo Yeremia a?”

¹⁸ Toboŋok Baruk ŋikapolok tema, “Akalimonokini Yeremia ayoŋ ŋakiro nu daadaŋ, ido abu ayoŋ egir ikes a ewino lokitaabo.”

¹⁹ Temasi nai ŋikapolok neni a Baruk, “Toloto toŋopa, iyoŋ ka Yeremia, ido nyemaikina idiotuŋanan toyenu neni iyakasi iyes.”

Kicunya Yeoiakim ekitaabo

²⁰ Torotokis nai ŋikapolok a nen toloto neni a erwosit, kimyekis ekitaabo a nagule ka Elisama a ekegirigiran, apotu ŋikapolok tolimokis erwosit ŋakiro daadaŋ.

²¹ Abu nai erwosit kiyakiya Yeudi ayaun ekitaabo, tolemu Yeudi ekitaabo anagule a Elisama a ekegirigiran, tosodi Yeudi tosyomak ekitaabo neni ka erwosit ka neni a ŋikapolok a daadaŋ a ŋulu awuasi alodiyete erwosit.

²² Apaki ŋin eboi erwosit anagule keŋ a ŋina ka akiporo (arae apaki ŋin elap ŋolo a ŋikanikaomwon) ayai nen akim ŋina anoki anibore a ŋini enokakinitere akim alokiŋaren erwosit.

²³ Ani esyomi Yeudi ekitaabo edoli ŋilaino ŋiuni, kori ŋiomwon, togeu erwosit aduŋonor a ekileŋ keŋ neni edaunio akisyom kimasak nakim nibore ŋini enokakinitae akim akitodol ŋina ecunyarya iŋes ekitaabo daadaŋ anakim.

²⁴ Kikote neni daŋ, mam ekabule abu toyakaun neni a erwosit, kori neni a ŋiketiyak keŋ a idio a ŋulu apotu kiirasi ŋakiro ŋun daadaŋ, apotu ikes nyecila tari ŋilowi kec.

²⁵ Tari ŋina adyeketa Elinasan ka Delaia ta Gemaria erwosit atemar nyicuny ekitaabo, abu erwosit nyiira ŋakiro kec,

²⁶ ido abu erwosit tolimok Yeremeel lokoku a erwosit ka Seraia lokoku ka Asiriel ta Selemia lokoku ka Abideel akikamun Baruk ekegirigiran ka ekadwaran Yeremia. Nai abu Ekapolon kiwua ikes.

Kirwor nabo Yeremia ŋakiro ŋuna aponi kigirae

²⁷ Kedau erwosit akicunyar ekitaabo ŋolo abu Baruk kigir ŋakiro ŋuna alimonokini Yeremia iŋes, kirwor Ekapolon neni a Yeremia tema,

²⁸ “Tolemu ekitaabo ece ikigir ŋakiro ŋunapei egiritae lokitaabo ŋolo ke ekiŋaren ŋolo abu Yeoiakim erwosit a Yudaya kicunya.

²⁹ Kirwor nu aŋuna ke erwosit Yeoiakim a ŋolo a Yudaya: Alimu Ekapolon atemar, idau iyoŋ akiŋer ŋakiro kaŋ ka icunya ŋakiro ŋun, ido ibu iyoŋ tema, ‘Kaanukiro igirya iyoŋ atemar kire jik ebuni erwosit a Babilon akinyasun akwap na ka emunyari ŋituŋa ka ŋityaŋ anakwap a na?’

³⁰ Aŋun, alimu Ekapolon ŋakiro nu aŋuna a erwosit Yeoiakim a ŋolo a Yudaya: Nyeryamuni iŋes ituŋanan ŋini ilunyokin lokicoloŋ ŋolo ka apukan a Daudi, ido imasakinio akuwan keŋ nenilapat tonom akoloŋ naparan ka tonyam akaterot nakwaare.

³¹ Tosodi, esicani ayoŋ iŋes kaapei ka ŋiletok keŋ ta ŋiketiyak keŋ aŋuna ka asecit kec. Ayauni ayoŋ neni kec ka neni a ŋituŋa a Yerusalem ŋican daadaŋ ŋulu abu ayoŋ olimu atemar ayauni, nai apotu ikes nyiirasi ŋakiro kaŋ.”

³² Abu nai Yeremia tolemu ekitaabo ece, inak nen a Baruk alokoku a Neria, a ŋolo arae ekegirigiran, a ŋolo abu kigir lokitaabo ŋol ŋakiro daadaŋ ŋuna alimonokini Yeremia iŋes, kigir Baruk nen ŋakiro daadaŋ ŋuna sek egiritae lokitaabo ŋolo abu erwosit Yeoiakim ŋolo a Yudaya kicunya a akim, aponi daŋ kiyatakinae ŋakiro ŋace ŋuna ekwaan ka ŋunapei a ekiŋaren.