Yer. 35 - Ebaibul

Kipuroe Ŋirekabi

¹ Alorwa a ŋulu epukator erwosit Yeoiakim lokoku a Yosia ŋolo a Yudaya, kirwor Ekapolon neni a Yeremia tema,

² “Tolot neni a ŋituŋa a ateker a Ŋirekabi, kirworo ka ikes, ido yau ikes Kai a Ekapolon nagule apei, ido inak ikes epiini tomata.”

³ Aŋun, abu ayoŋ oyau Yaasania lokoku a Yeremia a ŋolo arae lokoku ka Abasinia kaapei ka ŋikaitotoi keŋ ta ŋidwe keŋ daadaŋ ka ŋituŋa a ateker a Ŋirekabi daadaŋ.

⁴ Abu ayoŋ oya ikes Kai a Ekapolon nagule ŋina a ŋidwe ka Anan alokoku ka Igidaliaa a ŋolo arae ituŋanan ŋini ka Akuj, ayai agule ŋin diyete agule ŋina a ŋikapolok, ayai agule ŋin kidiama agule ŋina a Mesaia alokoku a Salum a ŋolo arae eketen epuke.

⁵ Ekaku, abu ayoŋ oinak Ŋirekabi epiini ŋolo ayai namoti ka lokopoi, olimok ayoŋ ikes otema, “Tomata epiini edio”

⁶ Nai toboŋokis ikes temasi, “Nyikimasi isua epiini, anerae abu papaa kosi Yonadab ikicik isua ebe, ‘Nyemaikina iyes tomata epiini, kori ŋidwe kus,

⁷ nyemaikina iyes toduko ŋakais, kori toeikis ŋikinyom, nyemaikina daŋ iyes todupa ŋikito a epiini lomanikorin, kori toyakaunotor emanikor ŋolo a ŋikito a epiini, nai emaikina iyes kiboiyoto aloeemae ŋirwa ŋulu akiyar kus daadaŋ, ikotere iboiyete ŋirwa ŋulu alalak anakwap a ŋina iboiyoto iyes.’

⁸ Ikiwuapit isua akiciket a papaa kosi Yonadab a lokoku a Rekab anakiro a daadaŋ a ŋuna ikicikit iŋes isua akitiya ebe, ‘Nyemaikina isua akimat epiini ŋirwa a akiyar kosi daadaŋ, isua ŋaberu kosi, ŋidwe kosi ŋulusapa, kori ŋulupesur

⁹ ka nyemaikina isua todukoe ŋakais ŋuna ikiboiyo.’ Emamukare isua ŋimanikorin a ŋikito a epiini, kori ŋimanikorin a ŋikinyom, kori ŋidikinyom.

¹⁰ Nai ikiboi isua aloeemae, ido ewuapi ka etiyae isua daadaŋ ŋuna ikicikit isua papaa kosi Yonadab,

¹¹ Nai apaki ŋina abunio erwosit Nebukadinesar ŋolo a Babilon akirem akwap, aponi isua temarae, ‘Potu oloto Yerusalem aŋuna a ŋasigarya a Ŋibabiloniyae ka ŋasigarya a Ŋiarameani.’ Ŋakiro ŋun iŋes ikiyakar tokona isua Yerusalem. ”

¹² Kirwor nai Ekapolon neni a Yeremia tema,

¹³ Alimu Ekapolon ŋolo a ŋajoresyo Akuj a Ŋisirael ebe, “Ape tolimok ŋituŋa a Yudaya ka ŋituŋa ŋulu iboiyete alo Yerusalem atemar, nyipedorete iyes ayenun ŋakitadapeta kaŋ, ido kiwuapa ŋakiro kaŋ a?

¹⁴ Apotu ŋituŋa kiwuapa akiciket ŋina abu Yonadab lokoku a Rekab tolimok ŋiletok keŋ atemar nyemata epiini, tari tokona nyemasete ikes epiini, anerae ewuapa ikes ŋakiro a papaa kec. Nai adau ayoŋ elope akirwor neni kus ŋarwa ŋuna alalak, ido nyiwuapa iyes ŋakiro kaŋ.

¹⁵ Adau ayoŋ akiyakuun neni kus ŋiketiyak kaŋ ŋikadwarak daadaŋ, arubakinit eyakuununui ikes neni kus abala, ‘Iyes daadaŋ kimyekisi ŋiticisyo kus ŋulu aronok, kilocokisi ŋiticisyo kus ŋulu aronok ka nyiwuapa ŋakujo ŋace, nyitiyanakis ikes, ikotere iboiyete anakwap a ŋina abu ayoŋ okoinak iyes ka atapapaa kus.’ Nai nyiirara iyes ŋakiro kaŋ ka nyiwuapa acamit kaŋ.

¹⁶ Ewuapa ŋiletok a Yonadab alokoku a Rekab ŋakiro ŋuna alimokinit papaa kec ikes, nai nyiwuapa ŋituŋa lu ŋakiro kaŋ.

¹⁷ Aŋun, ŋakiro ŋuna alimu Ekapolon Akuj ŋina a ŋajoresyo, Akuj ŋina a Ŋisirael ikes nu, ‘Alosi ayoŋ ayaun lotuŋa a Yudaya ka lotuŋa daadaŋ ŋulu iboiyete alo Yerusalem ŋican daadaŋ ŋulu adau ayoŋ alimun aŋuna kec, anerae erwor ayoŋ neni kec, nai nyiirara ikes, anyara ayoŋ ikes, nai nyeboŋokino ikes ayoŋ.’

¹⁸ “Nai abu Yeremia tolimok ŋituŋa a ateker a Rekab atemar alimu Ekapolon ŋolo a ŋajoresyo, Akuj a Ŋisirael ebe, ‘Aŋuna iwuapyata iyes ŋakiro ŋuna ikicikit papaa kus Yonadab ka aŋuna iwuapyata ŋakiro ŋuna alimuni iŋes daadaŋ ka kitiyata daadaŋ ŋuna abu iŋes ikicik iyes,

¹⁹ aŋuna a ŋakiro a ŋun, Alimu Ekapolon ŋolo a ŋajoresyo, Akuj a Ŋisirael atemar nyeŋopikini Yonadab lokoku a Rekab eletonit ŋolo itiyae neni kaŋ ŋikaru ka ŋikaru.’ ”