Yer. 34 - Ebaibul

Todwarae atwanare a Sedekia anakwap a ŋina arikoritae

¹ Erae nu ŋakiro ŋuna abu Ekapolon kirwor neni a Yeremia apaki ŋina etijio erwosit Nebukadinesar ŋolo a Babilon kaapei ka ŋasigarya keŋ daadaŋ ka ŋituŋa a ŋakwapin a daadaŋ a ŋuna epukat iŋes ŋituŋa a Yerusalem ka ŋituŋa a ŋitaunio a Yerusalem daadaŋ.

² Tolimok Ekapolon Akuj a Ŋisirael Yeremia tema, “Tolot, kirwor neni a erwosit Sedekia a ŋolo a Yudaya ebe, ‘Alosi ayoŋ ainakin etaun lo napedor a erwosit a Babilon ka icunyakini iŋes a akim,

³ ido nyibucar iyoŋ anapedor keŋ, nai ikikamunio iyoŋ ikiyai neni eyai erwosit a Babilon, iŋolikini iyoŋ erwosit a Babilon, irworikinosi ka iŋes iteosi, tosodi ilosi iyoŋ Babilon.’

⁴ Kikote neni daŋ, okoe erwosit Sedekia ŋolo a Yudaya, kiira ŋakiro ŋuna ke Ekapolon! Alimu Ekapolon ŋakiro nu aŋuna kon atemar, nyikiaryo iyoŋ a ekileŋ,

⁵ itwani iyoŋ a ekisil. Ikwaŋina ecunyere ŋikito ŋulu akukunyok enukio atapapaa kon ŋulu arae ŋirwosi eriŋa iyoŋ, ikwaŋinapei icunyo ŋikito ŋulu akukunyok aŋuna kon daŋ, iololoete ŋituŋa aŋuna kon ebasi, ‘Atwana Bareca erwosit kosi!’ Itiyakin ŋun, anerae adau ayoŋ alimun.”

⁶ Abu nai ekadwaran Yeremia tolimok alo Yerusalem Sedekia erwosit a Yudaya ŋakiro ŋun daadaŋ,

⁷ apaki ŋina etijioto ŋasigarya a Babilon ŋituŋa a Yerusalem ka ŋitaunio a Yudaya daadaŋ ŋulu edoŋito, Lakis ka Aseka, anerae ŋitaunio ŋul bon alo Yudaya edoŋito aŋuna adukitere ŋaduketa ŋunajiet.

Kisicanae Ŋipi erono nooi

⁸ Erae nu ŋakiro ŋuna abu Ekapolon kirwor neni a Yeremia kedau erwosit Sedekia acamun ka ŋituŋa ŋulu eboiyete alo Yerusalem akiseraun alacakino a ŋituŋa.

⁹ Anacamunet a ŋin, amaikina Ŋiburaniyae tolacakis Ŋiburaniyae ŋulu arae ŋipi, ŋikilyok ka ŋaberu, tomamukaun ituŋanan ituruworit Iburaniyat ŋinice ipito.

¹⁰ Apotu ŋituŋa tocamut ŋakiro ŋun, apotu ŋikapolok ka ŋituŋa daadaŋ ŋulu acamunosi anakiro a ŋun kiikis atemar tolacakis ŋituŋa daadaŋ ŋipi kec, ŋikilyok, kori ŋaberu, ido nyeboŋokin nabo akituruwor ikes ŋipi. Apotu ikes kiwuapa ŋun, tolacakis ŋipi kec.

¹¹ Nai ekaku apotu ŋituŋa kilocokis ŋatameta kec, kinyakanasi ŋipi ka ŋapi kec, toreikis ikes akitiya erae ŋapi, kori ŋipi kec nabo.

¹² Kirwor Ekapolon neni a Yeremia tema,

¹³ “Alimu ayoŋ Ekapolon Akuj a Ŋisirael atemar, abu ayoŋ elope ocamunos ka atapapaa kus apaki ŋina ayaunia ayoŋ ikes anakwap a Ijipit, anakwap a ŋina ka apitoonut, abu ayoŋ otema,

¹⁴ ‘Ani edolete ŋikaru ŋikanikaarei, emaikina ituŋanan ŋini erae Iburaniyat daadaŋ ŋini keponi ikigyelakin iyes ka ŋini adau akitiyanakin iyes alotooma ŋikaru ŋikanikapei, tolacakinae anakitiyanakin iyes.’ Nai apotu atapapaa kus nyiwuapa ŋakiro kaŋ kori nyepupokis daŋ ŋakiro kaŋ.

¹⁵ Ipotu iyes ŋikulepek alorwa a ŋidi a ŋulu alunyarosi tokiwa, kitiyata ŋuna ajokak alokiŋaren kaŋ anakisera alacakino neni a ŋiyeneta kus, ipotu iyes tocamunos alokiŋaren kaŋ alo Kai a ŋina enyaritae a ekiro kaŋ.

¹⁶ Nai ipotu iyes kilocokis ŋatameta kus tojamuwasi ekiro kaŋ apaki ŋina inyakaryata iyes ŋipi, kori ŋapi kus ŋituŋa ŋulu sek ipotu iyes tolacakis ikwapei eitanitotor ikes, ipotu iyes kituruwosi ikes nabo ŋiketiyak kus.

¹⁷ Aŋun, alimu ayoŋ Ekapolon atemar, nyiwuapa iyes ŋakiro kaŋ, nyelacakina ŋikidunyet ka ŋikonei kus, emyekini ayoŋ ikilacakin iyes, alacakinio ŋina ikiyai iyes lokileŋ, lodeke ka loron. Eketuruwori ayoŋ iyes ŋulu inyasuna aneni a ŋituŋa a ŋakwapin a daadaŋ anakwap.

¹⁸ Ani eruwor ŋulu apotu toŋero acamunet kaŋ ka nyiwuapa ŋakiro ŋuna ka acamunet a ŋina apotu ikes tocamunotor alokiŋaren kaŋ, esikwaanikini ayoŋ ikes ka itaok ŋini etubete ikes alokidiŋ, ido kitoro ikes kidiŋ ŋatutubeta a etaok a ŋin,

¹⁹ ŋikapolok a Yudaya, ŋikapolok a Yerusalem, ŋikapolok ŋulu ka akai ka apukan, ŋisacaradotin ka ŋituŋa a akwap a daadaŋ ŋulu apotu kitoro kidiŋ ŋatutubeta a itaok,

²⁰ einakinio ikes napedor a ŋimoe kec ka neni a ŋulu imanito akiyar kec. Eruworosi ŋawat kec akimuj a ŋikyeny ka ŋina a ŋityaŋ a ŋulu ka ariet.

²¹ Ani eruwor erwosit Sedekia ŋolo a Yudaya kaapei ka ŋikapolok ŋulu ipukatotor iŋes, ainakini ayoŋ ikes lomoe kec, neni a ŋulu imanito akiyar kec, ainakini ayoŋ ikes neni a ŋasigarya a erwosit a Babilon a ŋulu aboŋosi aneni kus.

²² Alimokini ayoŋ ikes toboŋut lotaun lo, itijikinete ikes ŋituŋa a etaun a lo, ido kikamasi etaun ka kicunyakis a akim. Eturuwori ayoŋ ŋitaunio a Yudaya ŋireŋoroto, neni emam ŋituŋa eya.”