Yer. 33 - Ebaibul

Akitojokun kedaun akisican

¹ Kirwor Ekapolon neni a Yeremia akirworikinet ŋina a ŋaarei, eriŋa iŋes egolokinitoe nalapatu ŋina eboiyoto ŋasigarya ŋuna iyokiyete akai ŋina ka apukan.

² Ŋakiro nu ikes abu Ekapolon ŋolo asubuni akwap, Ekapolon ŋolo ayeuni akwap kiwuak lopite ŋolo eyakar, Ekapolon iŋes ekiro keŋ. Abu iŋes tema,

³ “Tonyarae ayoŋ, akaboŋokini ayoŋ iyoŋ, akalimokini ayoŋ iyoŋ ŋakiro ŋuna apolok, ŋuna imunonitae, ŋakiro ŋuna nyeyenuna iyoŋ.

⁴ Alimu ayoŋ Ekapolon, Akuj a Ŋisirael aŋuna a ŋakais a etaun a lo ka aŋuna a ŋakais a ŋirwosi a Yudaya a ŋuna aponi toritaarae aŋuna ka adukio arwatata ŋinakiretakinet ŋimoe ŋulu erikaunito etaun ka aŋuna ka ajio.

⁵ Epote ikes akitijiore Ŋibabiloniyae ka akilelebikin ŋakis ŋun ŋituŋa ŋulu aari ayoŋ anaŋoit kaŋ ka ananyunyura kaŋ. Ewua ayoŋ ereet kaŋ aneni a ŋituŋa a etaun a lo aŋuna a ŋiticisyo a daadaŋ a ŋulu aronok a ŋulu itiyaete ikes.

⁶ Kikote neni daŋ, enyakakini ayoŋ ajokis ka a ŋaleu lotuŋa a etaun a lo, etojokuni ayoŋ ikes, esileerek ikes abaru ŋina alalan ka akiboi ejok.

⁷ Enyakuni ayoŋ ŋituŋa a Yudaya ka ŋituŋa a Isirael aneni aponi torikoroe, etogogoŋ ikes lopite ŋolo ayakatar ekiŋaren.

⁸ Etaleuni ayoŋ ikes anasecit a daadaŋ a ŋina esecito ikes neni kaŋ, esyoni ayoŋ ikes aŋuna ka asecit kec a daadaŋ a ŋina aponiata okoŋeryoto ayoŋ.

⁹ Eruwor ŋituŋa a etaun a lo ŋulu eyakatar ekiro ŋolo ka alelyanu, ŋulu ipuroi ka ŋulu itopolooritae alokiŋaren ŋituŋa a ŋakwapin a daadaŋ a ŋuna iirarete ŋakiro ŋuna ajokak daadaŋ ŋuna etiya ayoŋ neni kec. Itopoloorete ŋituŋa a ŋakwapin ŋituŋa a Yerusalem ka emaranete alokiŋaren kec aŋuna ka abaru a daadaŋ a ŋina ainakini ayoŋ ŋituŋa a Yerusalem.

¹⁰ “Alimu Ekapolon atemar, anakibois a na a ŋina irworotor iyes ibasi, ‘Erae ereŋorot neni emam ŋituŋa ka ŋityaŋ’ alotaunio a Yudaya ka lorotin a Yerusalem a ŋulu tokona esilok, a ŋulu emam ŋituŋa, kori ŋityaŋ eya, iiraryo nabo,

¹¹ etoil ŋolo ka alelyanu ka ŋolo ka alakara, etoil a eteran ka etoil a ateran, ŋitoilon a ŋituŋa a ŋulu eosi eyaunete ŋainakineta ŋuna ka alakara Kai a Ekapolon ebasi, ‘Tolakaros neni ke Ekapolon a ŋolo a ŋajoresyo, anerae ejok iŋes, erae amina keŋ ŋina nyiryaŋiryaŋa ŋikaru ka ŋikaru!’ Enyakakini ayoŋ ŋarereŋisyo nakwap na lopite ŋolo sek ayakatar ekiŋaren.

¹² “Alimu Ekapolon ŋolo a ŋajoresyo atemar, eyakaun nakibois na ŋina tokona erae ereŋorot, ŋina emam ŋituŋa ka ŋityaŋ eyakasi ka lotaunio keŋ daadaŋ neni iyokiyoto ŋikeyokok ŋamesekin kec.

¹³ Eyakaun ŋamesekin ŋuna epote ŋikeyokok akimar lotaunio a akwap a ŋina a ŋikamukumukui, Sepela, Negeb, nakwap a Benjamin, nakiboisyo ŋuna alodiyete Yerusalem ka lotaunio a Yudaya.”

Ateni ŋina iyookino ka acamunet ka Daudi

¹⁴ Alimu Ekapolon ebe, “Kire jik, eponito ŋirwa ŋulu esiyookinio ayoŋ akiikinet kaŋ neni a ŋituŋa a Isirael ka ŋituŋa a Yudaya.

¹⁵ Alorwa a ŋul ka anapaki a ŋin, etolomuni ayoŋ ateni ŋina iyookino aloletok a Daudi, itiyae iŋes anakwap ŋuna ecamunitae ka ŋuna iyookino.

¹⁶ Alorwa a ŋul eiunio ŋituŋa a Yudaya ka iboiyete ŋituŋa a Yerusalem emam ŋace. Erae lo ekiro ŋolo enyaraere etaun, ‘Erae Ekapolon akiyookino kosi!’

¹⁷ “Anerae alimu Ekapolon atemar nyicanakin Daudi ituŋanan ŋini ilunyokin lokicoloŋ keŋ kipuka ŋituŋa a Isirael,

¹⁸ nyicanakinosi ŋisacaradotin ŋulu a ekabila a Lepi ituŋanan ŋini ewoi alokiŋaren kaŋ ainakin ŋainakineta ŋuna epeyo, ŋainakineta ŋuna a ŋikinyom ka ainanakin ŋamuronisya ŋirwa daadaŋ.”

¹⁹ Kirwor Ekapolon neni a Yeremia tema,

²⁰ “Ani kebil ituŋanan kus idio acamunet kaŋ ka apaaran ka acamunet kaŋ ka akuwar, nyeyakaun apaaran ŋin, kori akuwar ŋin apaki ŋina itemokino eyakar,

²¹ iŋes nai edaunor acamunet kaŋ ka eketiyan kaŋ Daudi, ikotere nai iŋes emamukaunor ikoku ŋinisapat ŋini ilunyokin lokicoloŋ keŋ kipuka, iŋes daŋ edaunor acamunet kaŋ ka ŋituŋa a Lepi ŋisacaradotin ŋulu itiyaete alokiŋaren kaŋ.

²² Ikwaŋina nyepedorotor ŋiboorei ŋulu alokidiama akimarun ka nyepedorere asinyon ŋina ka anam akipimun neni etya, ikwaŋinapei etalalauni ayoŋ ŋiletok a eketiyan kaŋ a Daudi ka ŋilepi ŋulu eketiyanakinete ayoŋ.”

²³ Kirwor Ekapolon neni a Yeremia ebe,

²⁴ “Nyeyenuna iyoŋ atemar irworosi ŋituŋa lu ebasi, ‘Aŋer Ekapolon ŋikalya ŋuluarei ŋulu abu iŋes toseu,’ nyeyenuna iyoŋ epite ŋolo ejamuwaritotor ŋituŋa ikes, ido nyeriŋa ikes iteete ikes ikwapei ŋituŋa ka akwap kec a?

²⁵ Nyaŋeri ayoŋ acamunet kaŋ ka apaaran ka akuwar ta epite ŋolo eyakatar ŋisubuna alokidiama ka alokwap,

²⁶ Ikwaŋinapei, nyaŋeri ayoŋ acamunet kaŋ ka ŋiletok a Yakob ka ŋiletok a eketiyan kaŋ a Daudi, ido aseuni ayoŋ epei a ŋiletok a Daudi kipuka ŋiletok ka Aburaam, Isaka ka Yakob, anerae enyakakini ayoŋ ikes ŋarereŋisyo kec ka esyoni ayoŋ ikes.”