Yer. 30 - Ebaibul

Kiik Ekapolon akinyakakin nabo ajokis Yudaya ka Isirael

¹ Erae nu ŋakiro ŋuna abu Ekapolon kirwor neni a Yeremia, ido abu Yeremia tema,

² “Ŋakiro ŋuna alimu Ekapolon Akuj a Ŋisirael ikes nu ebe, ‘Kigir lokitaabo ŋakiro daadaŋ ŋuna adau ayoŋ alimokin iyoŋ,

³ anerae eponito kire jik ŋirwa ŋulu enyakakinia ayoŋ ŋarereŋisyo neni a ŋituŋa kaŋ ŋulu a Isirael ka Yudaya, ido aŋauni ayoŋ ikes nakwap ŋina abu ayoŋ oinak atapapaa kec ka ituruworete ikes akwap ŋin ŋina kec.’ ”

⁴ Erae nu ŋakiro ŋuna abu Ekapolon kirwor aŋuna a Isirael ka Yudaya.

⁵ Abu Ekapolon tema, “Adau akiirar akigworo ŋina ka amaran, ŋina a ekabule ka mam ekisil.

⁶ Kiŋitae ayoŋ, iŋolikinete iyes, epedori mono ekile akidoun ikoku a? Kaanukiro nai eteo ayoŋ ŋikilyok daadaŋ idokokinito ŋakan kec nakookyes, esibito ŋaberu ŋuna eryebasi aŋuna ka akidoun? Kaanukiro esiliyoritotor ŋireetin a ŋituŋa a daadaŋ?

⁷ Ekaŋ iyes! Ebunit akoloŋit ŋina apolon nooi, mam akoloŋit ace ikwaanatar, erae apaki ŋina ka akiyaloloŋ a ŋiletok a Yakob; nai eiunio ikes alocan a ŋul.”

⁸ Alimu Ekapolon ŋolo a ŋajoresyo ebe, “Akoloŋit ŋin alemari ayoŋ ayokot alomosiriŋin a ŋituŋa kaŋ, olema ŋiriko ŋulu eenitere ikes, nyerubakinete nabo ŋigelaanotin ituruworito ikes ŋiketiyak kec.

⁹ Nai epote ikes akitiyanakin Ekapolon Akuj kec ka eletonit a Daudi ŋolo aseuni ayoŋ aŋuna kec.

¹⁰ “Nai ani eruwor iyes, nyikuryaketa iyes ŋiletok a Yakob, iyes ŋiletok a Isirael, nyikikadak, anerae alosi ayoŋ aiun iyes anakwapin a ŋuna alwanak, aiuni ayoŋ ŋiletok kus anakwap a ŋina aponi torikoroe ikes. Eboŋunete ŋiletok a Yakob kiboikinos a ekisil emam ŋace, ido mam ituŋanan itukuryani ikes.

¹¹ Ikirukit ayoŋ ka iyes ikotere akaiuni iyes. Amunyari ayoŋ ŋituŋa a ŋakwapin a ŋuna abu ayoŋ ekeelak iyes, nai nyakamunyari ayoŋ iyes. Ekesicani ayoŋ iyes alotooma akiyookino, nai nyekemyekini ayoŋ iyes nyisicana.”

¹² Alimu Ekapolon ŋakiro nu ebe, “Nyepedor akitiiyor ŋajemei kus, nyiŋaleunete iyes anawananu kus.

¹³ Mam ituŋanan epedori akiŋarakin iyes, mam ekitoe epedori akitaŋaleun ŋajemei kus, nyeŋaleunete ŋawat kus.

¹⁴ Imuryakinosi iyes aneni a ŋulu ikiminasi iyes nyeriŋa ikes ikimisito iyes, anerae ekesican ayoŋ iyes lopite ŋolo isicanere emoit, ekesican ayoŋ iyes lopite ŋolo isicanere emoit ŋolo nyisyoniono anerae epol nooi aronis kus ka elalak nooi ŋasecisya kus.

¹⁵ Kaanukiro igworotor iyes aŋuna ka awananu kus? Nyelemar apipilu ŋina iyakatar iyes, anerae epol nooi aronis kus ka elalak nooi ŋasecisya kus, ayoŋ adau akitiya neni kus.

¹⁶ Aŋun, emunyaryo daadaŋ ŋulu apotu itomunyasi iyes, tosodi erikoryo ŋimoe kus daadaŋ erae ŋirikon, eŋataryo ŋiboro a ŋulu apotu toŋatasi ŋiboro kus, esicani ayoŋ ŋulu apotu ikisicana iyes.

¹⁷ Eketojokuni ayoŋ iyes nabo, ka etiiyori ayoŋ ŋajemei kus, anerae ikinyarata ŋimoe kus iyes ebe, ‘Erae ikes ŋulu ilamitae, ilamitae Sion, mam ituŋanan emisit iŋes.’ ”

¹⁸ Alimu Ekapolon ŋakiro nu ebe, “Enyakari ayoŋ ŋituŋa kaŋ nakwap kec, ido esyoni ŋikalya daadaŋ, edukokinio Yerusalem nabo, inyakakinio akai ŋina ka apukan nakibois ŋina pei sek ayai.

¹⁹ Epote ŋituŋa ŋul aeore ŋieosyo ŋulu ka alakara ka ecelunete elelyanete, eterereŋi ayoŋ ikes tolalata, nyekudyokunete ikes; ainakini ayoŋ ikes kitopolooroe, nyejamuwaryo ikes nabo.

²⁰ Iboiyete ŋidwe kec lopite ŋolo koloŋ sek eboiyoto, etogogoŋi ayoŋ atukot kec alokiŋaren kaŋ, ido esicani ayoŋ ŋulu isicanete ikes.

²¹ Ebuni erwosit kec alotuŋa kec pei, ebuni ekepukan kec alotuŋa kec pei. Ebuni iŋes neni kaŋ apaki ŋina anyaraa ayoŋ iŋes, anerae mam ituŋanan ebuni neni kaŋ pa kenyaritae.

²² Iruworosi nai iyes ŋituŋa kaŋ ka aruwor ayoŋ Akuj kus.”

²³ Kiŋolikisi, aŋoit a Ekapolon, anyunyura a Ekapolon ebunit ikwaan ka ekuwuam ŋolo ekusi nooi, emunyari aŋoit a Ekapolon ŋulu itiyaete aronis.

²⁴ Nyedaun aŋoit ke Ekapolon ŋina aryenyaanan, akitodol ŋina edaunia iŋes akitiya ŋuna ecamit iŋes akitiyakin. Alorwa a ŋulu eponito, iyenunete iyes ŋakiro ŋun.