Yer. 28 - Ebaibul

Kitepeg Anania Yeremia, ido totwan

¹ Ekaru ŋolopei, apaki ŋina esyakinia erwosit Sedekia ŋolo a Yudaya akipuka, elap ŋolo a ŋikan alokaru a ŋolo a ŋiomwon ipukat Sedekia, abu ekadwaran Anania lokoku ka Asur ŋolo abunit alo Gibeon kirwor neni kaŋ alo Kai ka Akuj, toyakas nen ŋisacaradotin ka ŋituŋa daadaŋ, tema iŋes neni kaŋ,

² “Alimu Ekapolon ŋolo a ŋajoresyo, Akuj a Ŋisirael ebe, ‘Adau ayoŋ alemar apedor a erwosit a Babilon,

³ alotooma ŋikaru ŋiarei, enyakuni ayoŋ nakibois na ŋiboro daadaŋ ŋulu ka Akai ka Akuj, ŋulu abu erwosit Nebukadinesar ŋolo a Babilon ya anakibois a na kiwoko Babilon.

⁴ Enyakuni daŋ ayoŋ nakibois na erwosit Yeoiakim lokoku a Yeoiakim a ŋolo a Yudaya ka ŋituŋa a Yudaya daadaŋ ŋulu aponi torikoroe Babilon, anerae alemari ayoŋ apedor a erwosit a Babilon.’ ”

⁵ Abu nai Yeremia ekadwaran kirwor neni ka Anania a ekadwaran alokiŋaren ŋisacaradotin ka ŋituŋa daadaŋ ŋulu awuasi alo Kai ka Akuj.

⁶ Kirwor ekadwaran Yeremia tema, “Amen! Elipi kitiya Ekapolon ŋun, elipi kisiyook Ekapolon ŋakiro ŋuna idwar iyoŋ, ido kinyaku nakibois na alo Babilon ŋiboro ŋulu ka Akai ka Akuj ka ŋituŋa daadaŋ ŋulu aponi torikoroe.

⁷ Nai kiira tokona ŋakiro nu ŋuna alosi ayoŋ alimun topupi iyoŋ kaapei ka ŋituŋa daadaŋ.

⁸ Apotu ŋikadwarak daadaŋ ŋulu aya ekiŋaren eriŋa iyoŋ ka ayoŋ alorwa a ŋulu a koloŋ todwara ŋuna ke ejie, eron ka edeke aŋuna a ŋakwapin ka aŋuna a ŋapukasinei a ŋuna agogoŋok.

⁹ Nai ekadwaran ŋolo edwari ŋuna ke ekisil, eyenunio atemar erae Ekapolon kire iyakuunit ekadwaran ŋol erae kiyookin ŋakiro ŋuna edwari iŋes.”

¹⁰ Abu nai ekadwaran Anania tolema ayokot alomosiriŋ a ekadwaran Yeremia, tobil ayokot ŋin.

¹¹ Kirwor Anania alokiŋaren ŋituŋa daadaŋ tema, “Alimu Ekapolon ŋakiro ebe, ‘Epite ŋolopei ŋol iŋes alemarya ayoŋ apedor a erwosit Nebukadinesar a ŋolo a Babilon alotuŋa a ŋakwapin a daadaŋ eriŋa nyelunyara ŋikaru ŋiarei.’ ” Ekaku ŋun abu ekadwaran Yeremia torotok tolot a akeŋ.

¹² Kelunyar apaki adio anapaki a ŋina abilya ekadwaran Anania ayokot alomosiriŋ a ekadwaran Yeremia, kirwor Ekapolon neni a Yeremia tema,

¹³ “Tolot tolimok Anania atemar ebala Ekapolon ebe, ‘Ibil iyoŋ ŋayokoi ŋuna itiyaunitae a ŋakito, nai ilunyokinio neni kon ŋayokoi ŋuna itiyaunitae a ŋasuwa.’

¹⁴ Aŋuna alimunio Ekapolon ŋolo a ŋajoresyo Akuj a Ŋisirael ebe, ‘Ewuak ayoŋ ayokot ŋina itiyaunitae a ŋasuwa lomosiriŋin a ŋituŋa a ŋakwapin a nu a daadaŋ, ikotere ikes itiyanakinete erwosit Nebukadinesar ŋolo a Babilon, ido itiyanakinete ikes iŋes kire, ainak ayoŋ iŋes tari ŋityaŋ ŋulu ka ariet.’ ”

¹⁵ Tolimok nai ekadwaran Yeremia ekadwaran Anania tema, “Kiira Anania, nyiyakuuna Ekapolon iyoŋ ka ibu iyoŋ inak ŋituŋa lu akigeno ŋuna ka alyokonu.

¹⁶ Aŋun, alimu Ekapolon ebe, ‘Akalemari ayoŋ iyoŋ anakwap ekaru lopei lo, itwani iyoŋ; anerae irworo iyoŋ itepegit Ekapolon.’ ”

¹⁷ Ekaru ŋolopei ŋol, elap ŋolo a ŋikanikaarei, abu ekadwaran Anania totwan.