Yer. 27 - Ebaibul

Akitoodikinet ŋina ka ayokot

¹ Ani isyakini erwosit Sedekia lokoku a Yosia ŋolo a Yudaya akipuka, abu Ekapolon tolimok Yeremia atemar,

² ŋakiro nu ikes akalimoki ayoŋ Ekapolon, “Kitiyau aŋuna kon ayokot ŋina itiyaunitae a ŋarukanes ka ŋasuwa, tosodi kiwuak lomosiriŋ kon.

³ Kiyakiya ŋituŋa ŋulu apotu Yerusalem neni a erwosit Sedekia neni a erwosit a Edom, a erwosit a Moab, a erwosit a Ŋiamoni, a erwosit a Tiro ka neni a erwosit a Sidon.

⁴ Tolimok ikes toloto alimokin ŋikapolok kec ŋakiro nu atemar alimu Ekapolon ŋolo a ŋajoresyo, Akuj a Ŋisirael ebe, ‘Tolimokisi ŋakiro nu neni a ŋikapolok kus.

⁵ Erae ayoŋ asubuni akwap a apedor kaŋ a ŋina apolon ka a agogoŋu kaŋ, ayoŋ asubuni ŋituŋa ka ŋityaŋ ŋulu eya nakwap, ido ainakini ayoŋ neni a ŋini acamit ainakin.

⁶ Adau ayoŋ ainakin ŋakwapin nu daadaŋ napedor a erwosit Nebukadinesar a ŋolo a Babilon a ŋolo erae eketiyan kaŋ ka adau ayoŋ ainakin iŋes tari ŋityaŋ ŋulu ka ariyet akitiyanakin iŋes.

⁷ Itiyanakinete iŋes ka lokoku keŋ ta lopapait keŋ ŋituŋa a ŋakwapin a daadaŋ akitodol apaki ŋina ilounere akwap keŋ, ido nai kituruwosi iŋes ŋakwapin ŋuna alalak ka ŋirwosi ŋulu apolok epito kec.’

⁸ “Nai ani kewou akwap adio, kori apukan adio akitiyanakin erwosit Nebukadinesar ŋolo a Babilon, kori nyecamu akidaŋidaŋ ŋakiro keŋ, esicani ayoŋ akwap ŋin a ejie, a eron ka a edeke tari ŋina amunyarya ayoŋ akwap ŋin a apedor a Nebukadinesar.

⁹ Aŋun, nyemaikina iyes kiirasi ŋakiro ŋuna irworosi ŋikadwarak kus, ŋimurok kus, ŋikerujak kus, ŋituŋa kus ŋulu irworosi ŋuna eponito, ŋikekukujak kus ŋulu ebasi neni kus ebe ‘Nyitiyanakis erwosit a Babilon,’

¹⁰ anerae edwarete ikes alyokonu neni kus, ŋuna ikilemarete iyes anakwap kus, ekeritari ayoŋ iyes anakwap kus, ido tomunyaros.

¹¹ Nai ani kitiditeunosi ŋituŋa a akwap a adio kitopoloosi erwosit a Babilon ka kitiyanakis iŋes, emyekini ayoŋ ikes kiboiyoto anakwap kec kitata ka toyara anakwap kec.”

¹² Abu ayoŋ erwor ŋakiro ŋunapei ŋun neni a erwosit Sedekia a ŋolo a Yudaya, olimok iŋes ebe, “Kitopoloosi erwosit a Babilon, kitiyanakisi iŋes ka ŋituŋa keŋ, irubakinete iyarete.

¹³ Kaanukiro icamitor iyoŋ ikiari kaapei ka ŋituŋa kon a ekileŋ, a eron ka a edeke, lopite ŋolo adaunia Ekapolon alimun aŋuna a ŋituŋa a akwap a daadaŋ a ŋulu nyitiyanakinete erwosit a Babilon?

¹⁴ Nyiwuapa ŋakiro a ŋikadwarak a ŋulu ikilimonokinete iyes atemar nyitiyanakis erwosit a Babilon, anerae edwarete ikes neni kus ŋuna ka alyokonu.

¹⁵ Nyiyakuuna ayoŋ ikes, nai edwarete ikes ŋuna ka alyokonu alokiro kaŋ ecamito atemar ekerita ayoŋ iyes, ido tomunyaros iyes kaapei ka ŋikadwarak ŋulu edwareneete neni kus.”

¹⁶ Abu nai ayoŋ erwor neni a ŋisacaradotin ka neni a ŋituŋa a ŋul a daadaŋ otema, “Alimu Ekapolon atemar nyiwuapa ŋakiro a ŋikadwarak kus a ŋulu edwarete neni kus ebasi ‘Alotooma apaki ŋina euruwuana, inyakunio alo Babilon ŋiboro ŋulu isitiyao alo Kai ka Akuj,’ adwarete ikes ŋuna ka alyokonu neni kus.

¹⁷ Nyiwuapa ŋakiro kec, nai kitiyanakisi erwosit a Babilon ikotere iyarete. Kaanukiro eruworor etaun lo ereŋorot?

¹⁸ Ani kire kerae ikes ŋikadwarak ka ani kire keya ŋakiro a Ekapolon neni kec, emaikina ikes kilipa Ekapolon ŋolo erae Ekapolon ŋolo a ŋajoresyo ikotere nyimyek yaarae Babilon ŋiboro ŋulu idoŋito Kai ka Akuj ka kai a erwosit a Yudaya ta Yerusalem;

¹⁹ anerae alimu Ekapolon ŋolo a ŋajoresyo ŋakiro nu aŋuna a ŋipirin, a etorube a anam, a ŋawoeta ka ŋiboro ŋuluce daadaŋ ŋulu idoŋito lotaun lo,

²⁰ ŋulu abu erwosit Nebukadinesar ŋolo a Babilon nyeya apaki ŋina arikorya iŋes alo Yerusalem tari Babilon erwosit Yekoia lokoku a Yeoiakim a ŋolo a Yudaya kaapei ka ŋikapolok daadaŋ ŋulu a Yudaya ka a Yerusalem.

²¹ Topupokisi ŋakiro ŋuna alimu Ekapolon ŋolo a ŋajoresyo, Akuj a Isirael aŋuna a ŋiboro a ŋulu idoŋito Kai ka Akuj, kai a erwosit a Yudaya ka Yerusalem;

²² Eyaaryo ŋiboro ŋul Babilon, ido erubakinete eya nen, akitodol akoloŋit ŋina atamunia ayoŋ ikes. Enyakuni nai ayoŋ ikes enyakak ikes nakibois na.”