Yer. 26 - Ebaibul

Ŋakiro ŋuna adwari Yeremia alo Kai ka Akuj

¹ Apaki ŋina esyakinia erwosit Yeoiakim lokoku a Yosia akipuka Yudaya, abu Ekapolon

² tolimok Yeremia tema, “Towo analapatu a ŋina alokiŋaren Akai ke Ekapolon, ido kirwor neni a ŋituŋa a daadaŋ a ŋulu iboiyete alotaunio a Yudaya, ŋituŋa ŋulu eponeneete akilip alo Kai ke Ekapolon, tolimok ikes daadaŋ ŋakiro ŋuna ekeciki ayoŋ iyoŋ, nyimunon ŋakiro ŋadi.

³ Acepaki iirarete ikes daadaŋ ŋakiro ŋuna ilimuni iyoŋ, ido toesikis akiwuapit ŋuna aronok, ikotere elocok ayoŋ ŋatameta kaŋ, nyayau neni kec akisicanet ŋina acamit ayoŋ akisicania ikes aŋuna a ŋiticisyo kec a ŋulu aronok.

⁴ Tolimok ikes ebe, ‘Ŋakiro ŋuna irworo Ekapolon ikes nu: Ani pa kiirasi iyes ŋakiro kaŋ, pa kiwuapa ŋikisila kaŋ ŋulu akainak ayoŋ iyes,

⁵ pa kiirasi ŋakiro a ŋiketiyak kaŋ a ŋikadwarak a ŋulu eyakuununui ayoŋ neni kus atipei, a ŋulu nyiirara iyes ŋakiro kec,

⁶ esikwaanikini nai ayoŋ Akai na ka Silo ka eturuwori ayoŋ etaun lo ŋolo icenen aŋuna a ŋituŋa a ŋakwapin a daadaŋ anakwap.’ ”

⁷ Apotu ŋisacaradotin ka ŋikadwarak ta ŋituŋa daadaŋ kiirasi Yeremia irworo ŋakiro ŋun alo Kai ka Akuj.

⁸ Ani kedau Yeremia akirwor ŋakiro daadaŋ ŋuna ecikit Ekapolon iŋes alimokin ŋituŋa daadaŋ, apotu ŋisacaradotin, ŋikadwarak ka ŋituŋa daadaŋ kikamut Yeremia temasi, “Emaikina iyoŋ totwan!

⁹ Kaanukiro idwarya iyoŋ alokiro ke Ekapolon atemar ikwaanikin Akai na ka Silo ka eruwor etaun lo ereŋorot ŋolo emam ŋituŋa iboiyete alotooma?” Tosodi apotu ŋituŋa daadaŋ tocunun, kirimokis Yeremia kidiŋ alo Kai ka Akuj.

¹⁰ Ani iirarete ŋikapolokinitok ŋituŋa a Yudaya ŋakiro ŋun, apotu ikes kitipeiyosi alokai ka apukan toloto Kai ka Akuj, kiboikinos lopuke ŋolo enyaritae Epuke ŋolo Kitete alo Kai ka Akuj.

¹¹ Temasi nai ŋisacaradotin ka ŋikadwarak neni a ŋikapolok ka ŋituŋa daadaŋ, “Emaikina ekile lo totubokinae atwanare, anerae adau iŋes akidwar ŋuna aronok aŋuna a etaun a lo, lopite ŋolo iiraryata iyes a ŋaki kus.”

¹² Abu nai Yeremia kirwor neni a ŋikapolok ka neni a ŋituŋa a daadaŋ tema, “Erae Ekapolon ekeyakuuni ayoŋ akidwar ŋakiro daadaŋ ŋuna iirasi iyes aŋuna a Akai a na ka aŋuna a etaun a lo.

¹³ Aŋun tokona, kilocokisi ŋipitesyo kus ka ŋiticisyo kus, ido kiwuapa ŋakiro ŋuna irworo Ekapolon Akuj kus, tosodi ebuni Ekapolon akilocokin ŋatameta keŋ, nyeyau neni kus akisicanet ŋina adau iŋes alimun aŋuna kus.

¹⁴ Nai ani eruwor ayoŋ, ayoŋ lo ayai napedor kus, kitiyata neni kaŋ ŋuna itamete iyes atemar ejok ka iyookino aneni kus.

¹⁵ Nai toyenete kire jik atemar, kikiar iyes ayoŋ, eyakaun ekaile ŋolo ka akiar ituŋanan ŋini nyesecit neni kus ka neni a etaun a lo ta neni a ŋituŋa a daadaŋ a ŋulu iboiyete alotaun a lo, anerae ŋuna a kire ikes nu, erae Ekapolon iŋes ekeyakuunit ayoŋ neni kus alimokin iyes ŋakiro ŋun kiirasi iyes.”

¹⁶ Tolimokis nai ŋikapolok ka ŋituŋa daadaŋ ŋisacaradotin ka ŋikadwarak temasi, “Nyemaikina totubokinae ekile lo atwanare, anerae erwor iŋes neni yok alokiro a Ekapolon a Akuj yok.”

¹⁷ Tonyout nai ŋikasikou a akwap a ŋin ŋice, tolimokis atukot a ŋituŋa daadaŋ temasi,

¹⁸ “Abu koloŋ Mika ŋolo abunit alo Moreses, ŋolo adwarenene alorwa a ŋulu epukator erwosit Esekia ŋolo a Yudaya, tolimok ŋituŋa a Yudaya daadaŋ tema, ‘Ŋakiro ŋuna irworo Ekapolon ŋolo a ŋajoresyo ikes nu: Eruwor Sion neni itao ikwa emanikor, eruwor Yerusalem neni etukotor ŋamoru ŋuna eritakina kwap ka eruwor emukura ŋolo ka Akai ka Akuj amoni.’

¹⁹ Abu mono erwosit Esekia ŋolo a Yudaya ka ŋituŋa a Yudaya daadaŋ toara Mika a? Pa mono abu Esekia kitopoloo Ekapolon ka todyek Ekapolon kitiya ajokis neni keŋ, ido pa abu Ekapolon kilocok ŋatameta keŋ, kimyek akisican ikes a akisicanet a ŋina sek aris iŋes kelimu aŋuna kec a? Nai tokona, edikino iwon ikiyauni akisicanet ŋina apolon neni yok!”

²⁰ Ayai daŋ ekile ece ŋolo adwarenene alokiro ke Ekapolon, arae ekile ŋol Uria lokoku a Semaia ŋolo abunit alo Kirias-Yearim. Abu iŋes todwar ŋuna aronok aŋuna a etaun a lo ka aŋuna a akwap a na, erworo iŋes ŋakiro ŋuna ikwaan jik ka ŋuna alimu Yeremia.

²¹ Apaki ŋina eiraryata erwosit Yeoiakim ka ŋikajiok keŋ ta ŋikapolok daadaŋ ŋulu epukatotor iŋes, abu erwosit totamu akiar iŋes, nai ani iirari Uria ŋakiro ŋun, abu tokuryaniar, ido tosi Ijipit.

²² Abu nai erwosit Yeoiakim kiyakiya Elinasan lokoku ka Acibor kaapei ka ŋikilyok ŋice, toloto Ijipit ayaun Uria.

²³ Apotu ŋituŋa ŋul torikut Uria neni a erwosit Yeoiakim, abu nai Yeoiakim toar Uria a ekileŋ, kimasak akuwan keŋ nakibois ŋina enukio ŋituŋa.

²⁴ Nai ayakar Yeremia ekaiunan keŋ, iŋes Aikam lokoku a Sapan, aŋun, aponi nyipotokin iŋes neni a ŋituŋa ikotere earyata iŋes.