Yer. 24 - Ebaibul

Ŋaboboryo ŋuna ajokak ka ŋuna aronok

¹ Abu Ekapolon eketoodik ayoŋ ŋaditae ŋaarei ŋuna aya ŋaboboryo tooma, ewuakinitae ŋaditae ŋun kiŋaren Akai ka Akuj. Etiyakin ŋakiro ŋun ekaku keriko alo Yerusalem erwosit Nebukadinesar ŋolo a Babilon erwosit Yekonia lokoku a Yeoiakim a ŋolo a Yudaya kaapei ka ŋikapolok a Yudaya ŋulu epukatotor iŋes, ŋikeciak ŋabaoi ka ŋiketyakak ŋasuwa, ya ikes Babilon.

² Aya nadita apei ŋaboboryo ŋuna ajokak, ikote ŋaboboryo ŋuna esyaunak akokore, nai aya nadita ŋinace ŋaboboryo ŋuna aronok nooi, ŋuna pa apedori ituŋanan akinyam.

³ Tosodi Ekapolon okolimok ayoŋ tema, “Yeremia, nyo ite iyoŋ?” oboŋok ayoŋ otema, “Ete ayoŋ ŋaboboryo; ejokak jik ŋaboboryo ŋuna ajokak ka eroko nooi ŋaboboryo ŋuna aronok, eroko jik nyepedori ituŋanan akinyam.”

⁴ Abu nai Ekapolon kirwor neni kaŋ tema,

⁵ “Ŋakiro ŋuna alimu ayoŋ Ekapolon Akuj a Ŋisirael ikes nu, ‘Lopite ŋolo eyakatar ŋaraito ŋuna ajokak, lopite ŋol iŋes eteo ayoŋ ŋituŋa a Yudaya ŋulu aponi torikoroe anakwap kec, ŋituŋa ŋulu abu ayoŋ erita anakibois a na nakwap a Ŋibabiloniyae.

⁶ Abuni ayoŋ akiyoki ikes jik ka enyakuni ayoŋ ikes nakwap na. Etojokuni nabo ayoŋ ikes ka nyamunyari ikes nabo, adupakini ayoŋ ikes nyealari ikes.

⁷ Ainakini ayoŋ ikes etau ŋolo eyeniata ikes atemar ayoŋ arae Ekapolon ka eruworosi ikes ŋituŋa kaŋ, ido aruwor ayoŋ Akuj kec, anerae eboŋunete ikes neni kaŋ a ŋitai kec a daadaŋ.

⁸ “‘Tosodi lopite ŋolo eyakatar ŋaboboryo ŋuna aronok, ŋuna aronok nooi ŋuna nyepedori ituŋanan akinyam, epite ŋol iŋes esicania ayoŋ erwosit Sedekia ŋolo a Yudaya, ŋikapolok ŋulu ipukatotor iŋes ka ŋipiya a ŋituŋa a Yerusalem ŋulu idoŋete nakwap na ka ŋulu eya nakwap a Ijipit.

⁹ Eturuwori ayoŋ ikes ŋulu inyasuna, ibore ŋini aronon alotuŋa a ŋakwapin a daadaŋ, ŋulu nyejokak, ŋulu irworore, ŋulu eŋoito ka ŋulu icenen anakiboisyo a daadaŋ a ŋuna eritari ayoŋ ikes,

¹⁰ ido eyakikini ayoŋ ikes ejie, akoro ka edeke, akitodol ŋina emunyarotor ikes jik anakwap a ŋina abu ayoŋ oinak neni kec ka neni atapapaa kec.’ ”