Yer. 21 - Ebaibul

Ikamari Nebukadinesar Yerusalem

¹ Erae nu ŋakiro ŋuna apote aneni a Ekapolon neni a Yeremia apaki ŋina eyakiunia erwosit Sedekia ŋituŋa lu: Pasur lokoku a Malakia ka esacaradoti Sepania lokoku a Maaseia ebala,

² “Ekelipit ayoŋ iyoŋ kiŋit Ekapolon aŋuna kosi, anerae ikirikau iwon erwosit Nebukadinesar ŋolo a Babilon, acepaki epedori Ekapolon akitiya aumokinet aŋuna yok lopite ŋolo sek etiyaenenia, ido inak Nebukadinesar toboŋo aneni yok.”

³ Tolimok nai Yeremia ikes tema,

⁴ “Toloto tolimokis Sedekia ebe, ‘Alimu Ekapolon Akuj a Ŋisirael atemar, eapi ayoŋ akitoboŋokin iyes ŋiboro kus ŋulujiet ŋulu eya nakan kus, ŋulu itijiyoto iyes erwosit a Babilon ka Ŋibabiloniyae ŋulu irimokinito etaun kus kidiŋ alokiŋa arwatata. Acununi ayoŋ ikes tooma etaun.

⁵ Ayoŋ elope eketiji iyoŋ a agogoŋ kaŋ ka apedor kaŋ, anaŋoit, anadedeŋu ka ananyunyura a ŋina apolon.

⁶ Aari ayoŋ ŋituŋa ŋulu iboiyete alotooma etaun lo, ŋituŋa ka ŋityaŋ daŋ, etwakete daadaŋ a edeke.

⁷ Ekaku, ainakini ayoŋ erwosit Sedekia kaapei ka ŋiketiyak keŋ ka ŋituŋa ŋulu a etaun a lo ŋulu epuun alodeke, alokileŋ ka anakoro napedor a erwosit Nebukadinesar a ŋolo a Babilon, ainakini ayoŋ ikes napedor a ŋimoe kec ka napedor a ŋulu iwarito akiar ikes. Eari Nebukadinesar ikes a ekileŋ, nyisyoni iŋes ikes, kori nyimyekini ikes, kori nyiŋarakini ikes.’

⁸ “Ilimokini nai iyoŋ ŋituŋa ŋul atemar alimu Ekapolon ebe, ‘Topupokisi, ewuakini ayoŋ kiŋaren kus erot ŋolo ka akiyar ka ŋolo ka atwanare.

⁹ Ŋituŋa daadaŋ ŋulu erubakinete eya lotaun lo, etwakete a ekileŋ ka akoro ta edeke, nai ŋituŋa ŋulu elomarete kiŋa tocamut akilouno aneni a Ŋibabiloniyae a ŋulu irikaunito etaun, imyekinio toyara, nai egyelunete ikes akiyar kec aŋuna ka acamun aruwor ŋirikon.

¹⁰ Aŋoik ayoŋ ŋituŋa a etaun a lo aŋuna ka aronis, meere aŋuna ka ajokis. Einakinio iŋes napedor a erwosit a Babilon, ido icunyari iŋes etaun lo a akim.’ ”

Akirot neni a ŋiletok a Daudi

¹¹ Tolimok ŋiletok a erwosit a Yudaya ebe, “Kiirasi akirot a Ekapolon.

¹² Okoe ŋituŋa a ekal a Daudi; alimu Ekapolon ebe, ‘Kitiyata ŋuna iyookino a ŋinataparacu, toiutu ŋulu edemaritae ŋiboro kec, toiutu ikes anapedor a ŋulu isicanete ikes; ani pa kitiyata iyes ŋun, erirauni anyunyura kaŋ ikwa akim, ido ikinomiya, emam ituŋanan ŋini ituduŋe aŋoit kaŋ aŋuna a ŋiticisyo kus a ŋulu aronok.’ ”

¹³ “Kiirasi, akaremokino ayoŋ iyes, okoe iyes ŋituŋa ŋulu iboiyete alokidiama akadipaalat, okoe iyes ŋituŋa ŋulu iboiyete alokamukumukut a ŋolo elalak ŋamoru. Iyes ŋulu irworosi ibasi, ‘Ŋae epedori akitijikin iwon, kori ŋae epedori alomun nakais kosi ŋuna eŋopitere?’

¹⁴ Ekesicani ayoŋ iyes erono lopite ŋolo eroketa ŋiticisyo kus, enokakini ayoŋ akim namon kus ka enomiari ibore daadaŋ ŋini eyai diyete kus.”