Yer. 20 - Ebaibul

Kisican Pasur Yeremia

¹ Ayai Yerusalem esacaradoti ŋolo anyaritae Pasur, ŋolo arae ekapolon ŋolo apol akilo ŋuluce daadaŋ alo Kai ka Akuj, arae iŋes lokoku a Imer, abu iŋes kiira Yeremia edwari ŋakiro ŋun.

² Abu Pasur kidic Yeremia, ido toen a ŋiriko alopuke a ŋolo ayai nenimukur, a ŋolo enyaritae epuke a Benjamin alo Kai a Ekapolon.

³ Ani iwalari akwap, apaki ŋina alacakinia Pasur Yeremia aneni aenitere a ŋiriko, tolimok Yeremia iŋes tema, “Ikilimok iyoŋ Ekapolon ekiro ‘Ekabule ŋiwaetin daadaŋ’ meere Pasur.”

⁴ Alimu Ekapolon elope ebe, “Eketuruwori ayoŋ iyoŋ ekabule aneni kon a elope ka aneni a ŋikonei kon a daadaŋ ka earyo ikes a ekileŋ a ŋolo a ŋimoe kec ite iyoŋ. Ainakini ayoŋ ŋituŋa a Yudaya daadaŋ napedor a erwosit a Babilon, erikori erwosit a Babilon ikes nakwap keŋ ka eari ikes a ekileŋ.

⁵ Ainakini ayoŋ ebari daadaŋ a etaun a lo, ŋiboro ŋulu eryamunito ŋituŋa keŋ, ŋiboro keŋ daadaŋ ŋulu epol egyelit ka abaru daadaŋ ŋina a ŋirwosi a Yudaya neni a ŋimoe kec a ŋulu eŋatarete ŋiboro ŋul, tocunakis, ido kiwokosi Babilon.

⁶ Ani eruwor iyoŋ Pasur ka ŋituŋa a ekal kon daadaŋ, ikirikoryo iyes, ikiyaaryo Babilon, itwani iyoŋ a ina ka ikinukyo iyoŋ inaa kaapei ka ŋikonei kon daadaŋ ŋulu idwarenene iyoŋ neni kec ŋuna ka alyokonu.”

Kisitak Yeremia ŋiketidiŋak keŋ

⁷ Okoe Ekapolon ikisupa iyoŋ ayoŋ ka adau ayoŋ akisuparo ikilou iyoŋ ayoŋ ka iruwor iyoŋ ekelounan. Aruwor ayoŋ ŋolo akakyenare apaaran jwii; akajamuwarito ayoŋ ŋituŋa daadaŋ.

⁸ Apaki daadaŋ ŋina alimunio ayoŋ ŋadikiro, emaikina ayoŋ ekalou, emaikina ayoŋ ocelu abala, “Aryanyeo ka akinyasuno!” Aruwor akirot a Ekapolon aneni kaŋ ibore ŋini ekeyanyere ayoŋ ka ŋini akajamuwaritere apaaran jwii.

⁹ Ani katema ayoŋ ebe, “Nyalimuni nabo ayoŋ Ekapolon, kori nyeruwori nabo ayoŋ alimit ekiro keŋ,” aryamuni ayoŋ atemar emwana akirot kon alotooma kaŋ, ikwaan ka akim ŋina emwana pe ŋina egolokino tooma ŋakoyo kaŋ. akaup ayoŋ akidaŋidaŋ iŋes, nyapedorit akililiŋiyar,

¹⁰ anerae apupi ayoŋ ŋituŋa ŋulu alalak iŋaiŋaasi ebasi, “Eyai ekabule ŋiwaetin daadaŋ, kisitakisi iŋes! Emaikina iwon esitakisi iŋes!” Idarito ŋikonei kaŋ daadaŋ atemar okokuruwo ayoŋ akitiya, ebasi ikes make, “Acepaki emodiyaryo iŋes, eloutu nai iwon iŋes, enyaŋasi ŋuna etiyat iŋes neni yok.”

¹¹ Nai ikirukit ayoŋ ka Ekapolon ikwapei ekajion ŋolo adedeŋan, aŋun, nyepedorete ŋulu ecamito akiar ayoŋ akitiya idiobore, nyeruwor ikes ŋikelounak. Isirumyo ikes ŋileec nooi, anerae nyilounete ikes, nyimuryakin ajamuwaro kec ŋina a ŋikaru ka ŋikaru.

¹² Okoe Ekapolon ŋolo a ŋajoresyo, ikatanakini iyoŋ ŋulu iyookino, ite iyoŋ ŋatameta ka ŋitai, kimyekinae ayoŋ eŋolik isicani iyoŋ ikes, anerae ainakina ayoŋ akitiya acamit kon.

¹³ Toeokisi neni ke Ekapolon, kipuro Ekapolon, anerae alaku iŋes akiyar a ŋulu eyakatar akiitanit, alaku anapedor keŋ ŋulu itiyaete aronis.

¹⁴ Icenen akoloŋit ŋina ekedounere ayoŋ, nyemaikina kiterereŋoi akoloŋit ŋina ekedounio ayoŋ toto kaŋ.

¹⁵ Icenen ekile ŋolo ayauni ŋakiro neni a papa kaŋ, tolimok iŋes ebe, “Edoun ikoku kon, ikoku ŋinisapat,” ido apotu ŋun inakis iŋes alakar.

¹⁶ Elipi kikwaanikin ekile ŋol ka ŋitaunio ŋulu abu Ekapolon kinyas emam akisyon, elipi kiira iŋes akigworo iwalari akwap ka eli kidiŋ apaaran,

¹⁷ anerae abu iŋes nyakaar ayoŋ eriŋa ayai nakook a toto kaŋ, keruworo akook a toto kaŋ alyal kaŋ, kitopolooritae akook keŋ ŋikaru ka ŋikaru.

¹⁸ Kaanukiro ekedounere ayoŋ akiŋolikin ŋican ka akiyaloloŋ, ido oyar ŋirwa ŋulu a akiyar kaŋ daadaŋ ayakar ŋileec.