Yer. 18 - Ebaibul

Ecoto ka ekayan ŋamoti

¹ Erae nu ŋakiro ŋuna abu Ekapolon kirwor neni a Yeremia tema,

² “Bua, totiyaar kai a ekayan ŋamoti, ido akalimokini ayoŋ iyoŋ a nen ŋakiro kaŋ.”

³ Aŋun, abu ayoŋ otiyaar kai a ekayan ŋamoti, oryamu ayoŋ iŋes itiyae etic keŋ.

⁴ Abu eborosit ŋolo aye iŋes a ecoto tomunaar anakan keŋ, ido abu iŋes kitiyau nabo eborosit ece, ŋolo ajok aneni keŋ.

⁵ Abu nai Ekapolon kirwor neni kaŋ tema,

⁶ “Okoe ŋituŋa a Isirael, nyapedori mono ayoŋ akitiya neni kus lopite ŋolo etiyaa ekayan ŋamoti locoto ŋolo eyai nakan keŋ a? Nyiyakasi mono iyes nakan kaŋ, okoe ŋituŋa a Isirael a?

⁷ Ani mono kapedori ayoŋ apaki daadaŋ alimun atemar tolemarae, toritakinae kwap ka tomunaarae ŋituŋa a akwap, kori a apukan a adio,

⁸ ani kimyekis ŋituŋa a akwap a ŋin akitiya aronis, ekaku kalimok ayoŋ ikes akimyekin, emyekini ayoŋ akisican ikes nyedolokis ikes ŋican ŋulu sek atubunit ayoŋ atemar toryamut ikes.

⁹ Ani kalimu ayoŋ apaki ace atemar adukokini akwap, kori apukan ka adupakini,

¹⁰ nai kitiyata ikes ŋuna aronok alokiŋaren kaŋ, nyiwuapa ŋakiro kaŋ, ŋun nai atamya nabo ayoŋ erae kacamit akitiya ŋuna ajokak ŋuna sek acamunit ayoŋ akitiyakin.

¹¹ Aŋun tokona, tolimok ŋituŋa a Yudaya ka ŋulu iboiyete alo Yerusalem ebe, ‘Alimu Ekapolon atemar, kiirasi, ikikwaan ayoŋ ka ekayan ŋamoti, aye ayoŋ akisicanet aŋuna kus ka etemonokini ŋuna ekemania iyes. Tokona kilocokisi iyes daadaŋ ŋipitesyo kus ŋulu aronok ka kitojokutu ŋipitesyo kus ka ŋiticisyo kus.’ ”

Torubakis Ŋisirael ilipeneneete neni a ŋakujo

¹² Nai ebasi Ŋisirael irworosi, “Mam ajokis eyai! Iwuapyo isua ŋayeuniata kosi ka itiyae isua ŋinituŋanan ŋuna aronok iwuapitae acamit kosi ŋina aronon.”

¹³ Aŋun, alimu Ekapolon ebe, “Kiŋita ŋituŋa a ŋakwapin, ŋae iirarit ŋakiro ŋuna ikote nu? Etiyata ŋituŋa a Isirael ibore ŋini aronon nooi.

¹⁴ Edaunun mono ŋakako a Lebanon anatabab a ŋuna etiyaunere a? Ejoŋoeneneete mono ŋakipi ŋuna alilimok ŋuna eponito aneni alwanan alel a?

¹⁵ Nai, emuryakin ayoŋ aneni a ŋituŋa kaŋ, icunyanakinete ikes ekinyate nakujo ŋunacaryo, ŋuna ainakis ikes akiwuapit ŋuna pa amaikina kiwuapa, nyeriŋa iwuapito ŋuna a akoloŋ sek; iwuapito ikes ŋirotin ŋulu nyemaikinae amet, nyiwuapito ŋolo etakani.

¹⁶ Aŋun, eturuwosi ikes akwap kec ŋina a ŋinyas, ibore ŋini epedori ituŋanan ajamuwar ŋikaru ka ŋikaru. Ŋituŋa daadaŋ ŋulu itorete nen, ebulit ka imuŋumuŋete ŋakyes kec aŋuna a ŋinyas keŋ.

¹⁷ Ealari ayoŋ ikes alokiŋaren ŋimoe kec, lopite ŋolo ielarya ekuwuam ŋolo ekutunit alo Kide apuwa. Amuleni ayoŋ ikes, nyetoodikini ayoŋ ikes ereet kaŋ, akoloŋit ŋina eyakaunotor locan kec.”

Totukunoe akiar Yeremia

¹⁸ Apotu nai ikes temasi, “Potu, oyeutu ŋarurumae emana Yeremia, anerae nyedaunun ŋakitatameta aneni a esacaradoti, kori ŋakiro ŋuna ajokak aneni a ŋikaosok, kori akirot aneni a ekadwaran. Potu esitakisi iŋes a ŋakiro a ŋadi, nyikiwuap ŋakiro keŋ ŋadi daŋ.”

¹⁹ Abu nai ayoŋ elip otema, “Okoe Ekapolon, topupokinae ayoŋ, kiira ŋakiro ŋuna irworosi ŋimoe kaŋ.

²⁰ Erae mono aronis eropit a ajokis a? Nai acamunosi ikes akikamun ayoŋ. Totamunite epite ŋolo awuar ayoŋ alokiŋaren kon, akirwor ŋuna ajokak aŋuna kec, ikotere iyoŋ ijoŋoe anyunyurikina ikes.

²¹ Aŋun, kimyek akoro tomunya ŋidwe kec, kimyek ŋituŋa ŋul tomunyarae a ekileŋ, kimyek ŋaberu kec tomamukaun ŋidwe ka toruworos ŋapuseru. Elipi tomunya edeke ŋikilyok kec, toarae ŋisorok kec a ekileŋ alojie.

²² Elipi kiirarae akigworo anakais kec, apaki ŋina iyaunia iyoŋ ŋimoe neni kec, anerae acamunosi ikes akikamun ayoŋ ka ayeununut ŋirotin ŋululokunet ayoŋ.

²³ Okoe Ekapolon, iyeni iyoŋ atemar atukut ikes akiar ayoŋ. Nyisyon ikes anasecit kec, nyiesik akisican ikes aŋuna ka asecit kec. Kimyek kilounae ikes alokiŋaren kon; kisican ikes apaki ŋina iŋoitor iyoŋ.”