Yer. 17 - Ebaibul

Asecit a ŋituŋa a Yudaya ka akisicanio kec

¹ Igiritae asecit a ŋituŋa a Yudaya ka akalamu a ŋina erae asuwat, igirakinitae lotai kec a akou a akalamu a ŋina erae asuwat ŋina enyaritae diamon ka igirakinitae namomwar a ŋamuroeta kec.

² Etamunito tari ŋidwe kec ŋamuroeta kec ka ŋipirin ŋulu italetoe ŋulu eyakasi diyete ŋikito ŋulu alibak daadaŋ ka lokamukumukui ŋulu aoyak,

³ ta lomoru ŋulu eya nakwap neni emam ŋirerya. Epotori ayoŋ abaru kus ka ŋiboro ŋulu iŋadato iyes anakwap kus a daadaŋ, toŋatarae erae etacit aŋuna ka asecit kus.

⁴ Aŋuna a ŋiticisyo kus, itwaniyarete iyes akwap kus ŋina abu ayoŋ okoinak iyes toruwor ŋina kus, ekemyekini ayoŋ iyes kitiyanakis ŋimoe kus anakwap a ŋina nyiyenete iyes, anerae ekwaanikin aŋoit ka akim, ido enepi ŋikaru ka ŋikaru.

⁵ Ŋakiro ŋuna irworo Ekapolon ikes nu, “Icenen daadaŋ ŋulu ikinyomito ŋituŋa koŋin, ŋulu ituruworito ŋituŋa koŋin agogoŋu kec, ŋulu nyikinyomito alotai kec Ekapolon.

⁶ Ikwaanikinosi ikes ka ikitoe ŋini erupunit analoŋisat, nyeanyunete ikes apaki ŋina ebunio akiŋarakino kec. Epote ikes akiboi anakiboisyo a ŋuna aonok analoŋisat, epote ikes akiboi anakwap a ŋina emam ituŋanan eyai, a ŋina esasam.

⁷ “Erereŋ ŋituŋa ŋulu ikinyomito Ekapolon, ŋulu eyai akikinyomit kec neni ke Ekapolon.

⁸ Ikwaanikin ikes ka ekitoe ŋolo edupakinitae diyete ŋakipi, ekitoe ŋolo eremorit ŋataagor keŋ nayonae. nyekuryana iŋes apaki ŋina emwanunia akwap, erubakinete ŋakwii keŋ elibak; nyebulit iŋes ekaru ŋolo emamukar akiru, erai iŋes ŋaraito keŋ jik.

⁹ “Emodiyana etau akilo ŋiboro daadaŋ, nyepatana akitojokun, ŋae epedori ayenun iŋes?

¹⁰ Ayoŋ ŋolo arae Ekapolon ekatanakini ŋatameta a ŋituŋa ka aripiripi ŋitai kec, ikotere ainakini ŋinituŋanan ikwapei eyakatar ŋipitesyo keŋ, lopite ŋolo emaikina ŋinituŋanan eyakar aŋuna a ŋiticisyo keŋ.

¹¹ Ikwaan ŋini ecuni abaru alorotin a ŋulu nyiyookino ka ikenyit ŋini ebekuni ŋabeyei ŋuna pa arae iŋes auruuni, edaun abaru ŋin apaki ŋina eapuunia iŋes amojoŋ, ani ekaku, eruwor ituŋanan ŋin ibaŋaanot.

¹² “Okoe Akai ka Akuj ŋina erae ekicoloŋ ŋolo ka apolou a Ekapolon, ikitopolooritae iyoŋ ŋinapei anakisyakinet, iyoŋ irae akibois kosi ŋina asegan!

¹³ Okoe Ekapolon! okoe akigeno a Isirael! Irumete ŋileec daadaŋ ŋulu ikiŋerito iyoŋ; imarakinio daadaŋ ŋulu ikiŋerete iyoŋ nakibois ŋina a ŋikatwak, anerae aŋero ikes eitanit a ŋakipi a ŋuna ka akiyar, iŋes Ekapolon.”

Kilip Yeremia aŋuna ka akiyookino

¹⁴ Okoe Ekapolon, kitaŋaleunoe, ido aŋaleuni ayoŋ, toiunae ayoŋ, ido aiun ayoŋ; anerae irae iyoŋ akipuro kaŋ.

¹⁵ Kiira, epite ŋolo irworotor ikes neni kaŋ ebe, “Ai eyai akirot a Ekapolon? Kimyek akirot ŋin bu!”

¹⁶ Nai nyimyekina ayoŋ araakau ekeyokon alotic kon, kori nyiitana ayoŋ aneni kon ainakin ayoŋ apaki ŋina ka akisicanio. Iyeni iyoŋ ŋakiro ŋuna abu ayoŋ olimu, eleereete ŋakiro kaŋ alokiŋaren kon.

¹⁷ Nyiruwor eketukuryanan ayoŋ; irae iyoŋ neni aŋopya ayoŋ anapaki a ŋina a ŋican.

¹⁸ Kimyek ŋikesicanak kaŋ kiruma ŋileec, nai nyikimyek ayoŋ ekeruma ŋileec. Kimyek ikes tokadak, nai nyikimyek ayoŋ okokadak, yau aŋuna kec akoloŋit ŋina ka akisicanio, tomunya ikes iryenyaana nooi.

Akitopoloorit akoloŋit ŋina a Sabato

¹⁹ Ŋakiro nu ikes abu Ekapolon okolimok ayoŋ ebe, “Tolot towo alopuke a etaun, alopuke a ŋolo enyaritae Epuke ŋolo a ŋituŋa, alopuke a ŋolo elomanaryata ka elomununiata ŋirwosi a Yudaya, towo daŋ alopukei a Yerusalem a ŋuluce a daadaŋ,

²⁰ ido tolimok ŋituŋa tema, ‘Iyes ŋirwosi a Yudaya ka ŋituŋa a Yudaya daadaŋ ka ŋituŋa daadaŋ ŋulu iboiyete alo Yerusalem, iyes ŋulu ilomanarete alopukei a lu.’

²¹ Alimu Ekapolon ŋakiro nu; ‘Aŋuna ka akiyar kus, tocoito, nyiwok idiobore akoloŋit ŋina a Sabato, nyitorunioto daŋ idiobore lopukei a Yerusalem.

²² Nyiwoko idiobore anakais kus akoloŋit ŋina a Sabato, kori kitiyata etic edyo, nai kitopoloosi akoloŋit ŋina a Sabato erae akoloŋit ŋina asegan, kitopoloosi lopite ŋolo ecikitor ayoŋ atapapaa kus.

²³ Nai apotu ikes nyiwuapa ŋakiro kaŋ, kori topupokis ŋuna erworo ayoŋ, apotu ikes kitogogoŋo ŋakyes kec, towout akiirar ka acamun ŋuna etatami ayoŋ ikes.’

²⁴ “Nai ani kiirasi iyes ŋakiro kaŋ, nyiwokut idiobore kitorunioto lopukei a etaun a lo akoloŋit ŋina a Sabato, nai kitopoloosi akoloŋit ŋina a Sabato erae akoloŋit ŋina asegan, ido nyitiyata etic edio akoloŋit ŋin,

²⁵ iŋes nai elomuniata alopukei a etaun a lo ŋirwosi ŋulu icoloŋete ekicoloŋ ŋolo ka apukan a Daudi, edokito ŋagaari ŋuna iritae a ŋaŋolei ka edokito ŋaŋolei, ikes kaapei ka ŋikapolok ŋulu ipukatotor ikes, ŋituŋa a Yudaya ka ŋituŋa ŋulu iboiyete alo Yerusalem. Iboikinosi nai ŋituŋa lotaun lo ŋikaru ka ŋikaru.

²⁶ Epote nai ŋituŋa alotaunio a Yudaya ka anakiboisyo a ŋuna eya diyete Yerusalem, anakwap a Benjamin, alo Sepela, anakwap a ŋina a ŋikamukumukui ka alo Negeb, eyaunito Kai a Ekapolon ŋainakineta ŋuna epeyo, ŋamuronisya, ŋainakineta ŋuna a ŋikinyom ka ekinyate ka ŋainakineta ŋuna ka alakara.

²⁷ Nai pa kipupokis iyes ŋakiro kaŋ, pa kitopoloosi akoloŋit ŋina a Sabato erae akoloŋit ŋina asegan ka pa kiwoko ibore idio akoloŋit ŋina a Sabato tolomuniata lopukei a Yerusalem, ecunyakini ayoŋ akim alopukei a Yerusalem, enomiyari akim ŋin ŋakais ŋuna ka apukan ŋuna eya Yerusalem ka nyituduŋeo akim ŋin.”