Yer. 16 - Ebaibul

Araakau a Yeremia ŋolo amam aberu ka ŋakiro ŋuna erworo iŋes

¹ Abu Ekapolon kirwor neni kaŋ tema,

² “Nyiisi iyoŋ aberu, kori nyiyakaunor iyoŋ ŋidwe ŋulusapa, kori ŋulupesur anakibois a na;

³ anerae alimu Ekapolon ŋakiro nu aŋuna a ŋidwe a ŋulusapa ka ŋulupesur a ŋulu idounitoe anakibois a na ka aŋuna a ŋaberu a ŋuna idounete ŋidwe ŋul ka ŋikilyok ŋulu euruunete ŋidwe ŋul anakwap a na:

⁴ Etwakete ikes a ŋidekesyo a ŋulu aarak, nyigworo ikes, kori nyenukyo ikes, ikokinete ikes aoret eperete alokidiama akwap. Earyo ikes a ekileŋ, etwakete ikes aŋuna a akoro ka eruworosi ŋawat kec akimuj a ŋikyeny ka ŋina a ŋityaŋ a ŋulu a ariet.

⁵ “Nyiloma kai ŋina igworore ituŋanan ŋini etwanit, kori nyilot nen akiwolol, kori akigwor aŋuna kec, anerae alema ayoŋ ekisil kaŋ aneni a ŋituŋa a lu, alema ayoŋ aneni kec amina kaŋ ŋina nyiryaŋiryaŋa ka akisyon kaŋ.

⁶ Etwakete ŋituŋa daadaŋ a akwap a na, ŋikapolok ka ŋulucaryo. Nyenukyo ikes, mam ituŋanan iwololoe aŋuna kec, mam ŋini egeri akuwan, mam akibany ŋitim aŋuna kec.

⁷ Mam ituŋanan elemuni akimuj aŋuna ka akisirworiun ŋini igworo; kori mam ŋini einakini idiobore ŋinimatat aŋuna ka akisirworiun ikes aŋuna ka atwanare a papa, kori a toto kec.

⁸ Nyilot kai ŋina itiyaere ŋasuban kiboikinos kaapei ka ikes kimuja ka tomata,

⁹ anerae alimu Ekapolon ŋolo a ŋajoresyo Akuj a Ŋisirael atemar, alorwa kon, alemari ayoŋ anakibois a na ite iyoŋ ecelet ŋolo ka alelyanu ka ŋolo ka alakara, ecelet ŋolo a ekeitan ka ŋolo a ateran.

¹⁰ “Kidau iyoŋ alimokin ŋituŋa lu ŋakiro ŋun, ido ikiŋita ikes iyoŋ ebe, ‘Kaanukiro alimunio Ekapolon ŋakiro ŋuna aronok nooi ŋun ikimanit isua? Nyo erae asecit kosi? Anisecit etiyae isua ikimania Ekapolon Akuj kosi?’

¹¹ Iboŋokini iyoŋ ikes tema, ‘Erae ŋun, anerae apotu atapapaa kus okoŋero ayoŋ, aloto akiwuap ŋakujo ŋace ka etiyanakis ŋakujo ŋun, elipa neni kec, ido akaŋero ayoŋ ka nyiwuapa ŋikisila kaŋ

¹² ka aŋuna itiyaata iyes erono nooi akilo atapapaa kus, anerae iyes lu, iyes daadaŋ lu, ŋinituŋanan kus iwuapit akisyanu a acamit kus a ŋina aronon, iwounito akiirar ŋakiro kaŋ!

¹³ Aŋun, ekeritari ayoŋ iyes anakwap a na nakwap ŋina sek nyiyenete iyes, kori atapapaa kus, ido kitiyanakis a nen ŋakujo ŋace naparan ka nakwaare, anerae mam akisyon eketoodikini ayoŋ iyes.’ ”

Inyakakini Akuj Isirael nabo

¹⁴ Aŋun, adau Ekapolon alimun ŋakiro nu atemar eponito kire ŋirwa ŋulu nyikoŋioto nabo ŋituŋa a ekiro kaŋ ebasi, “Ikwapei eyarya Ekapolon ŋolo etipeunio ŋituŋa a Isirael anakwap a Ijipit,”

¹⁵ nai etemarete ikes ikoŋote ebe, “Ikwapei eyarya Ekapolon ŋolo ayauni ŋituŋa a Isirael anakwap a ŋina alo Kuju ka anakwapin a daadaŋ a ŋuna abu iŋes kirita ikes,” anerae enyakuni ayoŋ ikes nakwap kec a ŋikulepek, nakwap ŋina abu ayoŋ oinak atapapaa kec.

¹⁶ Eyakiyari tokona ayoŋ ŋituŋa ŋulu alalak toloto kiriut ikes aneni eya a daadaŋ, ido ekaku, eyakiya ŋikerikak toloto tocunut ikes alomoru a daadaŋ, alokamukumukui a daadaŋ ka anaŋiceta a ŋatabab,

¹⁷ anerae ete ayoŋ daadaŋ ŋuna iwuapito ikes; nyeŋopito ikes aneni ayai ayoŋ, ŋiticisyo kec daŋ ŋulu aronok nyililiŋiyaritae, ayeni ayoŋ.

¹⁸ Aboŋokini ayoŋ akisican ikes nabo aŋuna ka aronis kec ka aŋuna ka asecit kec, anerae apotu ikes kitoroniyasi akwap kaŋ a ŋalyalin, a ŋamuja, a ŋakujo kec a ŋuna nyeyarete, ido elelebikis nakwap kaŋ asiilyo.

¹⁹ Okoe Ekapolon, agogoŋu kaŋ ka aduketait kaŋ ŋina ajio alotooma, neni aŋopya ayoŋ akoloŋit ŋina a ŋican. Epote neni kon ŋituŋa a ŋakwapin anakisaleta a akwap. Elimunete ebe, “Mam ibore aryamut atapapaa kosi, nai amodiyo bon, aryamut ikes ŋiboro ŋulucaryo ŋulu emam akiŋarakinet iryamunia.

²⁰ Epedorete mono ŋituŋa akitiyaun ŋakujo aŋuna kec a? Meere ibore ŋini itiyaunete ikes Akuj.

²¹ “Aŋun, alosi ayoŋ kire jik akitatam ikes, apaki na alosi ayoŋ akitatam ikes apedor kaŋ ka agogoŋu kaŋ, ido eyenunete ikes atemar erae ekiro kaŋ Ekapolon.”