Yer. 15 - Ebaibul

Akisicanio ŋina emam akiretakinet

¹ Abu nai Ekapolon okolimok ayoŋ tema, “Tari kewua Moses ka Samuel alokiŋaren kaŋ akilip aŋuna a ŋituŋa, nyeminakini etau kaŋ ŋituŋa lu. Kirita ikes alokiŋaren kaŋ, emaikina ikes toloto.

² Ani kikiŋita ikes iyoŋ ebe, ‘Ai ikilosi isua?’ Tolimok ikes ebe, Irworo Ekapolon ebala, ‘Ŋulu atubokin atwanare a edeke, toloto ikiar edeke, ŋulu atubokin atwanare a ekileŋ, toloto ikiari a ekileŋ, ŋulu atubokin atwanare a akoro, toloto ikiar akoro, ido ŋulu atubokin arikoro, toloto ikirikor.’”

³ “Aseuni ayoŋ aŋuna kec ŋirotin lu ŋiomwon ŋulu emunyarere ikes: Earyo ikes a ekileŋ, iriyarete ŋiŋokwo ikes nariet ka irikarete ŋikyeny ka ŋityaŋ ŋulu ka ariet ikes.

⁴ Eturuwori ayoŋ ikes ŋulu inyasuna aneni a ŋituŋa a ŋakwapin, anerae nyejokak ŋakiro ŋuna abu erwosit Manase lokoku a Esekia ŋolo a Yudaya kitiya alo Yerusalem.

⁵ “Okoe ŋituŋa a Yerusalem, ŋae ikisyoni iyes? Kori ŋae ikigwori iyes? Ŋae erii nawae akiŋita epite ŋolo iyakatar iyes?

⁶ Ikiŋero iyes ayoŋ, iboŋete iyes kaku. Aŋun, adau ayoŋ akisican ka amunyar iyes, anerae akaup ayoŋ akidaŋidaŋ ŋakiro kus.

⁷ Abu ayoŋ ekemasana iyes alotaunio a daadaŋ, lopite ŋolo ekutarya ekuwuam ŋikabinin, adau ayoŋ akiyaloloŋ aŋuna kec, adau ayoŋ amunyar ŋituŋa kaŋ, anerae apotu ikes nyilocokis ŋipitesyo kec ŋulu aronok.

⁸ Alalata ŋapuseru anakwap kec akilo asinyon ŋina alokipetot a ŋanamyo. Adau ayoŋ ayaun ekamunyaran ŋisorok kec kidiŋ apaaran, oinak atatoto kec toryamut ŋican, adau ayoŋ ayaun aryeba ka ekabule toyakaun neni kec pa eyenete ikes.

⁹ Eyaloloŋ aberu ŋina sek ayakar ŋidwe ŋikanikaarei ka eridak, aruwor akica daŋ aneni keŋ akiryonut, eruma iŋes ŋileec ka aruwor ajamuwara. Ainakini ayoŋ ŋimoe kus tomunyasi ŋulu eriŋa idoŋito eyarete alotuŋa kus. Ayoŋ Ekapolon erworo ŋun!”

Akiŋuruŋura a Yeremia neni ke Ekapolon nabo ka ŋuna aponi tolimokinae

¹⁰ Mam alakara ayakar ayoŋ! Kaanukiro kekedounio ayoŋ toto kaŋ ekewuak nakwap na? Arae ayoŋ ekile ŋolo ekesiburao ka eketepegitae anakwap a daadaŋ! Nyidenikino ayoŋ idiobore neni a ituŋanan ka nyideniuno ayoŋ idiotuŋanan ibore, nai ekecenete ikes daadaŋ ayoŋ.

¹¹ Tolimu Ekapolon tema, “Kire, abu ayoŋ ekeŋarak iyoŋ anakiyar kon aŋuna ka aryamun ajokis, abu ayoŋ ewuak ŋimoe neni kon apaki ŋina a ŋican ka ŋina iyaloloŋio iyoŋ

¹² Epedori mono ituŋanan akibil asuwat ŋina alo Kuju ŋina inyalitae ka eburonis a?

¹³ “Eŋatarete ŋimoe ŋiboro kus ka abaru kus emam egyelit aŋuna a ŋasecisya kus. Iritorete ŋimoe ŋiboro anakwap kus a daadaŋ.

¹⁴ Eketuruwori ayoŋ iyes ŋiketiyak a ŋimoe kus anakwap a ŋina nyiyenete iyes, anerae erirae aŋoit kaŋ ikwaan ka akim ŋina erirae ŋikaru ka ŋikaru.”

¹⁵ Abu nai ayoŋ otema, “Okoe Ekapolon, iyeni iyoŋ, totamunae ayoŋ, ido kiyokoi ayoŋ, inakinae akinyaŋar aronis a ŋulu ekesicanito ayoŋ, anapatanu kon nyimyek ikes elemarete akiyar kaŋ; toyeni atemar edaŋidaŋi ayoŋ ŋiyany aŋuna kon.

¹⁶ Ibu iyoŋ kirwor ka abu ayoŋ opupok ŋakiro kon, apotu ŋakiro kon okoinakis ayoŋ alelyanu ka apotu toruwor ŋuna etalakarito etau kaŋ; anerae akanyaritae ayoŋ a ekiro kon, okoe Ekapolon Akuj ŋina a ŋajoresyo.

¹⁷ Nyiboikino ayoŋ neni aya ŋulu emwomworete elakara, kori nyelelyana ayoŋ; eboi ayoŋ aneni kaŋ bon, anerae ibu iyoŋ ikisican ayoŋ, ibu iyoŋ kilelebik aŋoit lotau kaŋ.

¹⁸ Kaanukiro nyedaununor aryeba kaŋ? Kaanukiro nyeiyonaryata ŋajemei kaŋ? Kire, ikoni iyoŋ aneni kaŋ ayonae ŋina edaunun ŋakipi ikamuni, ikoni iyoŋ eitanit ŋolo egolori ŋakipi.”

¹⁹ Aŋun, abu Ekapolon tema neni kaŋ, “Ani kiboŋunit iyoŋ neni kaŋ, ekejauni ayoŋ iyoŋ nabo, ido ibuni iyoŋ akitiyanakin ayoŋ nabo. Ani kirwor iyoŋ ŋakiro ŋuna ajokak, meere ŋunacaryo, iruwor iyoŋ ekadwaran kaŋ. Eboŋunete ŋituŋa neni kon meere iyoŋ iboŋori neni kec.

²⁰ Eketogogoŋi ayoŋ iyoŋ alokiŋaren ŋituŋa lu, lopite ŋolo egogoŋio arwatata ŋinajiet ŋina edukitoe a eburonis; ikitijiete ikes iyoŋ, nai nyikilounete ikes iyoŋ, anerae ikirukit ayoŋ ka iyoŋ aŋuna ka aiun ka alakun iyoŋ.

²¹ Akalakuni ayoŋ iyoŋ anapedor a ŋulu aronok, akalakuni ayoŋ iyoŋ anagogoŋ a ŋulu aryenyaanak.”