Yer. 14 - Ebaibul

¹ Erae nu ŋakiro a Ekapolon neni a Yeremia aŋuna ka amamukaun a akiru apaki ŋina aoyan:

² Iyaloloŋete ŋituŋa a Yudaya, enyasun ŋitaunio kec, eperete ŋituŋa a Yudaya alokwap iyaloloŋete ka arem akigworo a ŋituŋa a Yerusalem kidiama.

³ Iyakiyanarete ŋikapolok keŋ ŋiketiyak kec aokun ŋakipi, elosete ŋiketiyak ŋul nakarei toryamut emam ŋakipi, ido toboŋosi eororete ŋiboro kec. Irumito ikes ŋileec ka ekadakinit, ido imukito ŋakyes kec.

⁴ Alalata ŋakabaae anakwap, anerae mam akiru ayakaun nakwap, akadaki ŋiketak, aruwor ŋulu imukito ŋakyes kec.

⁵ Emyeanakis ŋapooe daŋ ŋitak kec ŋulu ariŋa euruunio, anerae mam ŋinya eyakasi.

⁶ Ewuasi ŋisigirya alokidiama ŋikamukumukui ŋulu elapat, ieŋieŋasi ikwa ŋikweei, nyeriŋa iteete akwap ejok, anerae emam ŋinya.

⁷ Tari kitoodiunito ŋiticisyo kosi ŋulu aronok ŋuna ikisicanitere isua, kisyoni isua okoe Ekapolon, aŋuna a ekiro kon, anerae ikipotu isua oŋero akiwuap ŋuna alalak ŋuna ikilimokinitae, ido ikisec isua aneni kon.

⁸ Okoe iyoŋ irae akigeno a Ŋisirael, ekalakunan kec anapaki a ŋina a ŋican. Kaanukiro itiyaa iyoŋ esibit irae egela anakwap, esibit irae ekaloton ŋolo erii iwace toper nakwaare?

⁹ Kaanukiro ityaa iyoŋ esibit ituŋanan ŋini nyeyeni ŋuna emaikina kitiya, esibit ekajion ŋolo adedeŋan ŋolo emam ibore epedori akitiya akiŋarakin ŋituŋa keŋ? Toyai bo iyoŋ okoe Ekapolon, kidiŋ kosi, ido ikinyaritae iyoŋ isua a ekiro kon, nyikiesik isua!

¹⁰ Irworo Ekapolon ŋakiro nu aŋuna a ŋituŋa a lu ebala, “Kire, eminasi ŋituŋa lu akitwaŋa make, nyeupenene alosenen aneni kaŋ, aŋun, nyecamit Ekapolon ikes, etamuni tokona Ekapolon aronis ŋina itiyato ikes, ido kisican ikes.”

¹¹ Okolimok nai Ekapolon ayoŋ tema, “Nyilip neni kaŋ aŋuna ka akiŋarakin ŋituŋa lu.

¹² Tari kiredakis ikes akiron, nyeirari ayoŋ akigworo kec, tari keyaut ikes neni kaŋ ŋainakineta ŋuna epeyo ka ŋainakineta ŋuna a ŋikinyom, nyacamuni ayoŋ ŋainakineta kec, nai aari ayoŋ ikes a ekileŋ, a akoro ka a ŋidekesinei.”

Kitoroniyarae ŋikadwarak ŋulu alyokonok

¹³ Olimu nai ayoŋ otema, “Okoe, Ekapolon Akuj! Ŋikadwarak lu ŋulu elimonokinete ŋituŋa ebe, ‘Nyikiaryo iyes a ekileŋ, kori nyiyakaunotor iyes eron, nai akainakini ayoŋ iyes ekisil ŋolo a kire anakibois a na.’ ”

¹⁴ Abu nai Ekapolon okolimok ayoŋ tema, “Edwarete ŋikadwarak alyokonu enyarito ekiro kaŋ, nyeyakit ayoŋ ikes, kori nyetemara ayoŋ ikes kirworo ŋun, kori nyirworo ayoŋ neni kec. Edwarete ikes neni kon ŋakisileerenokineta ŋuna ka alyoko, edwarete ikes ŋakiro ŋunacaryo ka amodiyo ŋina eyai natameta kec a ŋikulepek.”

¹⁵ Aŋun irworo Ekapolon aŋuna a ŋikadwarak a ŋulu edwarete enyarito ekiro kaŋ atemar tari ŋina pa eyakitor ayoŋ ikes ŋulu ebasi, “Nyikiaryo a ekileŋ ka nyebuni eron nakwap na.” Earyo ŋikadwarak ŋul a ekileŋ ka etwakete aŋuna a eron.

¹⁶ Tosodi ŋituŋa daadaŋ ŋulu edwarete ikes ŋakiro kec, imasaryo kiŋa lorotin ŋulu a Yerusalem, erae ŋulu earit akoro ka ekileŋ, emamukaun ituŋanan ŋini enuki ikes, itiyakin ŋakiro ŋun neni kec a daadaŋ ka neni a ŋaberu kec neni a ŋidwe kec a ŋulusapa ta neni a ŋidwe kec a ŋulupesur, anerae esitiyae ayoŋ aronis kec akisicania ikes.

¹⁷ Okolimok nai Ekapolon ayoŋ tema, “Tolimok ŋituŋa ŋul ŋakiro ŋuna iyaloloŋio iyoŋ nu: Elipi toleleta ŋakiyo anakonyen kaŋ apaaran ka akuwar, kerae nyajoŋo ayoŋ akigworo, anerae awani ŋituŋa kaŋ nooi, epol nooi awananu kec.

¹⁸ Ani alosi lomanikorin, eŋolik ŋulu kearyo a ekileŋ, ani alomari lotaun, eŋolik ŋulu iridete aŋuna ka akoro, anerae erubakinito ŋikadwarak ka ŋisacaradotin itiyaete etic kec anakwap a daadaŋ, nai nyeyenete ŋuna itiyaete.”

Todyeka ŋituŋa Ekapolon kisyoni ikes

¹⁹ Okoe Ekapolon, iŋer iyoŋ ŋituŋa a Yudaya jik a? Aluŋ mono etau kon Sion a? Kaanukiro ikisicania iyoŋ isua nooi adaunor epite ŋolo ikitaŋaleunere isua? Iitanitae isua ekisil, nai mam ajokis aryamun, iitanitae isua akitaŋaleuno, nai eryamunitae anyunyura akilo ekisil.

²⁰ Okoe Ekapolon, acamun isua asecenu kosi, acamun isua asecit atapapaa kosi, anerae ikisec isua aneni kon.

²¹ Aŋuna a ekiro kon, nyikijamuwa isua, nyisirum ŋileec etaun kon, Yerusalem neni eyai ekicoloŋ kon ŋolo ka apolou, totamu ŋakiikineta kon, ido nyilema acamunet kon ka isua.

²² Epedorete mono ŋakujo a ŋakwapin ayaun akiru a? Kori epedori mono kidiama akimyekin akiru bu a? Okoe Ekapolon Akuj kosi, meere mono iyoŋ iyauni a? Ikiwuakinit isua akigeno kosi neni kon, anerae iyoŋ itiyae ŋun daadaŋ.