Yer. 11 - Ebaibul

Aŋero ŋituŋa a Isirael ka ŋituŋa a Yudaya acamunet kec ka Akuj

¹ Kirwor Ekapolon neni a Yeremia tema,

² “Kiira ŋakiro ŋuna ka acamunet a na, kirwor neni a ŋituŋa a Yudaya ka neni a ŋituŋa a ŋulu iboiyete alo Yerusalem.

³ Tolimok ikes ebe, Irworo Ekapolon Akuj a Ŋisirael atemar, icenen ituŋanan daadaŋ ŋini nyiwuapi ŋakiro a acamunet a na,

⁴ a ŋina abu ayoŋ olimok atapapaa kus apaki ŋina ayaunia ayoŋ ikes anakwap a Ijipit, anakwap a ŋina aryamunitotor ikes ŋican. Abu ayoŋ olimok ikes atemar kiirasi ŋakiro kaŋ ka kitiyata daadaŋ ŋuna akalimokini ayoŋ iyes. Aŋuna nai aruworotor ikes ŋituŋa kaŋ ka aruwor ayoŋ Akuj kec,

⁵ ikotere esiyookini ayoŋ akikoŋiet kaŋ ŋina abu ayoŋ ekoŋ neni atapapaa kus, abu ayoŋ ekoŋ ainakin ikes akwap ŋina elelyaata ŋakile ka ao, lopite ŋolo eyakar nakoloŋit na.” Abu nai ayoŋ oboŋok iŋes otema, “Okoe Ekapolon, kitiyakinosi ŋakiro lopite ŋolo ilumunio iyoŋ”

⁶ Okolimok Ekapolon ayoŋ tema, “Kisera ŋakiro nu alotaunio a Yudaya a daadaŋ ka alorotin a Yerusalem. Kiirasi ŋakiro a acamunet a na ka kiwuapa ikes,

⁷ anerae abu ayoŋ olimok ka agogoŋu atapapaa kus apaki ŋina ayaunia ayoŋ ikes anakwap a Ijipit atemar torubakisi iwuapito ŋakiro kaŋ, alimokinit ayoŋ ikes ŋakiro ŋun tari nakoloŋit na atemar kiwuapa ŋuna erworo ayoŋ.

⁸ Nai apotu ikes nyiwuapa ŋakiro kaŋ, kori nyepupokis ŋuna erworo ayoŋ, nai abu ŋinituŋanan anakisyaanu kiwuap acamit keŋ ŋina aronon. Aŋun, abu ayoŋ oyau neni kec ŋakiro a acamunet a na, ŋakiro ŋuna abu ayoŋ olimok ikes kiwuapa, nai apotu ikes nyitiyata ŋun.”

⁹ Abu Ekapolon okolimok ayoŋ tema, “Eyeenete ŋituŋa a Yudaya ka ŋulu iboiyete alo Yerusalem akituk akitiya ŋuna aronok.

¹⁰ Aboŋokis ikes akitiya ŋuna aronok lopite ŋolo etiyaata atapapaa kec alorwa a ŋulu a koloŋ, apotu atapapaa kec toŋero akiwuap ŋakiro kaŋ. Aloto ikes akitiyanakin ŋakujo ŋace. Aŋero ŋituŋa a Isirael ka ŋituŋa a Yudaya acamunet ŋina abu ayoŋ ocamunotor ka atapapaa kec.

¹¹ Aŋun, kire jik abuni ayoŋ ayaun ŋican neni kec ka nyesiyete ikes alocan a ŋul, tari kekekaloikis ikes ayoŋ, nyapupokini ayoŋ ikes.

¹² Elosete nai ŋituŋa ŋulu iboiyete alotaunio a Yudaya ka ŋulu iboiyete alo Yerusalem neni a ŋakujo a ŋuna einanarete ikes ŋainanakineta, nai nyeiunete ŋakujo ŋun ikes apaki ŋina eyakatar ikes locan,

¹³ okoe ŋituŋa a Yudaya ariyanikin ekimar a ŋakujo kus ka ekimar a ŋitaunio kus ka ariyanikin ekimar a ŋamuroeta a ŋuna iduko iyes ka ŋirotin a Yerusalem. Erae ŋamuroeta ŋun ŋuna iinanakiniata iyes ŋainakineta neni a Baal.

¹⁴ “Ani eruwor iyoŋ Yeremia, nyilipi aŋuna a ŋituŋa a ŋul, nyikeu akigworo kon, kori akilip aŋuna kec, anerae nyeirari ayoŋ ikes akanyarito ayoŋ apaki ŋina eyakaunotor ikes locan.

¹⁵ Ajokis ani eyakar ituŋanan ŋini amina ayoŋ alokai kaŋ, kitiyae iŋes ŋakiro ŋuna aronok? Epedorete mono ŋakikoŋieta ka ŋamuronisya aiun iyes anamunyaro a? Ipedorete nai iyes alelyan a?”

¹⁶ Ikinyarit koloŋ Ekapolon iyes ebe, “Ekitoe ka Olipa ŋolo aliban, ekitoe ŋolo ibus ŋolo eyakar ŋaraito ŋuna ajokak. Nai anaŋoit keŋ a ŋina apolon, ikimunyari iŋes iyes, lopite ŋolo enomya akim ekitoe tonomiya ŋaten keŋ daadaŋ.

¹⁷ Atubu Ekapolon ŋolo a ŋajoresyo akisicanio kus aŋuna a ŋakiro a ŋuna aronok aŋuna etiyata ŋituŋa a Isirael ka ŋituŋa a Yudaya, apotu ikes eketoŋoa ayoŋ aŋuna ainanakiniata ŋainanakineta neni a Baal.”

Totukut ŋituŋa akiar Yeremia

¹⁸ “Ekapolon iŋes eketeyenikini ayoŋ ka abu ayoŋ oyenu, ibu nai iyoŋ ikiteyenik ayoŋ ŋakiro kec ŋuna aronok ŋuna etiyaete ikes.

¹⁹ Nai ikikwaan ayoŋ ka ikale ŋinimesek ŋini epatana erikoryo akiŋol. Pa ayeni ayoŋ atemar ekemanitae ayoŋ, pa ayeni ayoŋ atemar ayeete ikes ŋakiro kec ebasi, ‘Omunaasi ekitoe ka ŋaraito keŋ, olemasi iŋes anakwap a ŋituŋa a ŋulu eyarete, ikotere tojoŋoi atamunit ekiro keŋ.’

²⁰ Okoe iyoŋ Ekapolon ŋolo a ŋajoresyo iyoŋ ŋolo itubi ŋakiro ka akiyookino, ŋolo ikatanakini ŋitai ka ŋatameta a ŋituŋa, kisiŋolikinae ayoŋ akinyaŋaret kon neni a ŋituŋa a lu, anerae ewuak ayoŋ ŋakiro kaŋ daadaŋ napedor kon.

²¹ “Aŋun, alimu Ekapolon aŋuna a ŋituŋa ka Anasos a ŋulu ecamito akiar iyoŋ ka ebasi, ‘Nyidwari iyoŋ alokiro ke Ekapolon, ani kitiya iyoŋ ŋun, ikiari isua iyoŋ;’

²² aŋun, ŋakiro ŋuna alimu Ekapolon ŋolo a ŋajoresyo ikes nu ebe, ‘Esicani ayoŋ ikes oar a ekileŋ. Aari ayoŋ ŋisorok kec a ekileŋ, aari ayoŋ ŋidwe kec ŋulusapa ka ŋulupesur a eron.

²³ Mam ŋipiya idoŋete alotuŋa a ŋul, anerae ayauni ayoŋ ŋican lotuŋa ŋulu ka Anasos, eyakaun ekaru ŋolo ka akisicanio kec.’ ”