Yer. 1 - Ebaibul

¹ Erae nu ŋakiro a Yeremia a lokoku ka Ilikia, arae Yeremia epei a ŋisacaradotin a ŋulu aya Anasos nakwap ŋina a Benjamin.

² Abu Ekapolon kirwor neni a Yeremia alorwa a ŋulu a erwosit Yosia a lokoku ka Amon a ŋolo alo Yudaya arae ŋol ekaru ŋolo a ŋitomon ka ŋiuni ipukat iŋes.

³ Abu daŋ Ekapolon kirwor neni a Yeremia alorwa a ŋulu a erwosit Yeoiakim lokoku a Yosia a ŋolo a Yudaya, torubak Ekapolon irworo neni a Yeremia akitodol adaunet a ekaru a ŋolo a ŋitomon ka epei ipukat erwosit Sedekia lokoku a Yosia a ŋolo a Yudaya tari lokaru ŋolo ekamarere Yerusalem alolap a ŋolo a ŋikan.

Anyarao a Yeremia ka akiyakiyaro keŋ

⁴ Apaki ŋin, abu akirot a Ekapolon bu neni kaŋ ebala,

⁵ “Eriŋa ayoŋ nyeyeuna iyoŋ anakook a toto kon, akayeni ayoŋ iyoŋ, ani eriŋa nyidouno iyoŋ, aris ayoŋ keketaleiyo iyoŋ, abu ayoŋ eketuruwo iyoŋ ekadwaran aneni a ŋituŋa a ŋakwapin.”

⁶ Abu nai ayoŋ otema, “Okoe Ekapolon Akuj! Kire jik, nyayeni ayoŋ erwor, anerae eriŋa ayoŋ arae idya.”

⁷ Nai abu Ekapolon okolimok ayoŋ tema, “Nyitema, ‘Eriŋa ayoŋ arae idya;’ anerae ilosi iyoŋ neni a daadaŋ a ŋulu ekeyakiyari ayoŋ iyoŋ, ido ibuni iyoŋ akirwor ŋakiro daadaŋ ŋuna akalimokini ayoŋ iyoŋ.

⁸ Nyikuryaniar aŋuna kec, anerae ikirukit ayoŋ ka iyoŋ aŋuna ka aiun iyoŋ.”

⁹ Abu nai Ekapolon kiopeu akan keŋ totap akituk kaŋ, tosodi okolimok ayoŋ tema, “Tokona adau ayoŋ akiwuakin ŋakiro kaŋ nakituk kon.

¹⁰ Kiira, nakoloŋit na akaseu ayoŋ iyoŋ topolok ŋakwapin ka ŋapukasinei, arutun ka aritakin kwap, amunaar ka akikamar, adukokin ka adupakin.”

¹¹ Abu akirot a Ekapolon bu neni kaŋ ebala, “Yeremia, nyo ite iyoŋ?” Abu ayoŋ otema, “Ete ayoŋ ateni a ekitoe a ŋolo enyaritae Alimond.”

¹² Okolimok nai Ekapolon ayoŋ tema, “Iŋolikinit iyoŋ ejok, anerae ete ayoŋ atemar kiyookin akirot kaŋ.”

¹³ Abu nabo akirot a Ekapolon bu neni kaŋ abunet ŋina a ŋaarei ebala, “Nyo ite iyoŋ?” Oboŋok ayoŋ otema, “Ete ayoŋ amot ŋina iwaliwali iriitoe alowae a ŋolo alo Kuju.”

¹⁴ Abu nai Ekapolon tema neni kaŋ, “Epote ŋican alo Kuju kielakin ŋituŋa ŋulu iboiyete anakwap daadaŋ.

¹⁵ Anyaraunit ayoŋ tokona ŋituŋa a ŋikabilae daadaŋ a ŋapukasinei a ŋuna alo Kuju, tosodi epote ikes, ido iwuakinete ŋirwosi kec daadaŋ ŋikicoloŋo kec ŋulukipukaet lopukei a Yerusalem imanito ŋarwatatain ŋuna ewuato iŋes daadaŋ ka imanito ŋitaunio a Yudaya daadaŋ.

¹⁶ Tosodi, alimuni nai ayoŋ ŋakiro kaŋ ŋuna atubokinitor ikes aŋuna a ŋaronisya kec a daadaŋ a ŋuna akaŋerioto ikes ayoŋ; ainanakis ikes ŋainakineta kec neni a ŋakujo a ŋace ka elipa neni a ŋiboro a ŋulu etiyaunete ikes a ŋakan kec.

¹⁷ Nai toten iyoŋ Yeremia, towo, tolimok ikes ŋakiro daadaŋ ŋuna ekeciki ayoŋ iyoŋ. Nyikuryaniar alokiŋaren kec, kikuryaniar iyoŋ, akainakini ayoŋ iyoŋ akuryanu alokiŋaren kec.

¹⁸ Ani eruwor ayoŋ, adau ayoŋ akitogogoŋ iyoŋ nakoloŋit na, lopite ŋolo egogoŋio etaun ŋolo ewuatae a ŋarwatatain, lopite ŋolo egogoŋio epir ŋolo erae asuwat ka egogoŋio arwatata ŋina edukitoe a eburonis. Nyikuryaniar, ikiremokinosi iyoŋ ŋituŋa a akwap a daadaŋ, ikiremokinosi iyoŋ ŋirwosi a Yudaya, ŋikapolok keŋ, ŋisacaradotin keŋ ka ŋituŋa keŋ ŋuluce daadaŋ.

¹⁹ Ikitijiete ikes iyoŋ, nai nyikilounete ikes iyoŋ, anerae ikirukit ayoŋ ka iyoŋ aŋuna ka alakun iyoŋ.”