Yak. 4 - Ebaibul

Ikituruwori akoneo ka akwap emoit ŋolo ka Akuj

¹ Ai itorunito ŋijiyesyo ka ŋiburasinei alokidiŋ kus? Itorunito lokibure ŋolo aronon ŋolo eji alotooma kus.

² Iitanito iyes ŋuna nyipedorete aryamun; aŋun, iarete. Irakakina ŋiboro a ŋuluce ŋulu nyipedorete ayaar; aŋun, kiburata ka tojioto. Nyiyakatar iyes, anerae nyiŋitasi aneni ka Akuj.

³ Tari ŋina iŋisyata iyes iŋes, nyiryamunete, anerae iŋitasi erono; iŋitasi iyes ŋiboro ŋulu isitiyaete aŋuna ke ekibure kus.

⁴ Iyes ŋulu nyikikinyomitae alokiŋaren Akuj, ikwa ŋikalomak alokiŋaren ŋaberu kec! Nyiyenete iyes atemar akoneo ka akwap erae aruwor emoit ŋolo ka Akuj a? Ituŋanan daadaŋ ŋini ecamit aruwor ekone ŋolo ka akwap, eruwor emoit ŋolo ka Akuj.

⁵ Nyitamete atemar kori nyiyookino ŋakiro ŋuna igiritae Nakigireta ebe, “Ecamit Akuj ikotere iŋes bon etau ŋolo abu kiwuak tooma yok.”

⁶ Nai einanakini iŋes ajokis ŋina alalan; aŋun, elimunit Akigiret ebe, “Itepegi Akuj ŋiketurok, nai einanakini ajokis neni a ŋulu itiditeuna.”

⁷ Aŋun, inakinos neni ka Akuj. Kitepega Satan, eemi iŋes aneni kus.

⁸ Toapuutu neni ka Akuj, eapuuni iŋes daŋ neni kus. Kilotasi ŋakan kus iyes ŋikasecak! Kitesega ŋitai kus iyes ŋituŋa ŋulu a ŋitai a ŋiarei!

⁹ Kiyaloloŋo aŋuna ke epite kus a ŋolo ka aseconu, kiluurwoto ka kigworo! Kilocokisi akiena kus toruwor akigworo ka alakara kus toruwor akiyaloloŋ!

¹⁰ Kitiditeunos alokiŋaren Ekapolon, ido ikitopoloori iŋes iyes.

Akiciket ŋina nyejokia atubokin lokaato ŋolo Kristoit

¹¹ Ŋikaitotoi kaŋ! Nyirworotor ŋuluce aŋuna aronok. Ŋini irworo ŋuna aronok kori etubonokini lokaato keŋ, irworo iŋes ŋuna aronok itoroniyarit Ŋikisila ka etubonokini Ŋikisila. Ani kitubonok iyoŋ Ŋikisila, iŋes atemar nyeriŋa iyoŋ iwuapit Ŋikisila; nai iruwor iyoŋ ekatubonokinan.

¹² Akuj bon iŋes erae ekainanakinan ŋolo a Ŋikisila ka ekatubon. Iŋes bon epedori aiun ka akinyasun. Nai ŋae iyoŋ itubonokini ekidunyet kon?

Akiciket ŋina nyejokia akituro

¹³ Topupokisi tokona ŋakiro kaŋ, iyes ŋulu ibasi, “Nakoloŋit na kori moi taparacu, ikilosi lotaun ati, eboiyoto aina ekaru epei, ogeutu akigyel ka agyelanar, ikotere oryamutu ŋisiliŋa ŋulu alalak.”

¹⁴ Nyiyenete iyes tari atemar ikokini akiyar kus moi taparacu ai! Ikote iyes apuru ŋina epokun atipei, ido toŋopiya.

¹⁵ Ŋuna itemokino iyes tolimut ikes nu: “Ani kecamit Ekapolon, ikiyari ka ikitiyae nu kori ŋun.”

¹⁶ Nai tokona iturosi ka isupasi iyes; akisupa ŋin daadaŋ erae aronis.

¹⁷ Aŋun, ituŋanan ŋini eyeni ŋuna itemokino kitiyae, nai nyitiyak, aruwor ŋun asecit aneni keŋ.