Yak. 2 - Ebaibul

Ŋakiro ŋuna nyejoikinitor atyakatyak ŋituŋa

¹ Ŋikaitotoi kaŋ, ikwapei iraakatar iyes ŋikanupak ŋulu ke Ekapolon yok a Yesu Kristo, ŋolo erae Ekapolon ka apolou, nyitemokino iyes atyakatyak ŋituŋa.

² Ani bo kebu natukot kus ekabaran ŋolo enapit ekaboboot ŋolo ke egolid ka ŋilowi ŋulu ebusak, tosodi tolomu ŋolo a ŋican daŋ ŋolo enapit ŋilowi ŋulu nyamuna;

³ ido torimaakyata iyes neni a ŋolo enapit ŋilowi ŋulu ebusak, itemasi, “Kiboikin lokicoloŋ ŋolo ajokan lo,” nai tolimokis ŋolo a ŋican itemasi, “Towo kaama,” kori “Kiboikin kwap nege diyete ŋakejen kaŋ,”

⁴ nyeruworo nai iyes ŋulu ityakatyaka alokidiŋ kus ka nyeruworo ŋikatubok alopite a ŋolo aronon a?

⁵ Topupokisi, ŋikaitotoi kaŋ ŋuluminan! Aseu Akuj ŋikulyak anakwap a na, ikotere toruworos ikes ŋulu ebarito ananupit ka ŋulu eryamunete Apukan ŋina iikinit Akuj ŋulu eminasi iŋes.

⁶ Nai ijamuwasi iyes ŋikulyak! Meere mono ŋikabarak ikisicaneneete ka ikirikonorete iyes loikiikoe a?

⁷ Meere mono ikes iyanyete ekiro ŋolo kerer ŋolo ikiinakinitae iyes a?

⁸ Ipedorete iyes akitiya ŋuna iyookino erae kiwuap ekisil ŋolo ka Apukan ka Akuj, ikwaŋinapei igiritere Nakigireta ebe, “Tomina ekonikidunyet ikwaŋina iminar iyoŋ akonikuwan.”

⁹ Nai ani kityakatyakato iyes ŋituŋa, isecito iyes ka ikitubokinete iyes Ŋikisila ikwa ŋulupei ebilito ekisil.

¹⁰ Ituŋanan ŋini ebili ekisil tari epei, abil iŋes daadaŋ.

¹¹ Anerae Akuj ŋinapei elimunit atemar, “Nyilom,” iŋes pei ebala “Nyiar.” Tari pa kilom iyoŋ, nai toar, ibil ekisil.

¹² Aŋun, kirworo ka kitiyata ikwa ŋituŋa ŋulu elosyo atubokin alokisil a ŋolo ikilacakini.

¹³ Anerae emam akisyon anatubokino a ŋina a ituŋanan a ŋini nyisyoniyenene ŋituŋa ŋuluce, nai ŋulu isyoniyete ŋuluce, nyikerito ikes atubokino.

Anupit ka ŋiticisyo

¹⁴ Ŋikaitotoi kaŋ, anijokis eyakar ituŋanan erae kelimu atemar ayakar iŋes anupit, nai nyitoodiunito ŋiticisyo keŋ? Epedori nai anupit ŋin aiun iŋes a?

¹⁵ Ani keyai lokaato kori nakaato ŋulu iitanito ŋilowi ka ŋulu emam akimuj ŋina itemokino,

¹⁶ ido itemasi iyes, “Ikidarite Akuj! Kiboiyoto ejok, kimuja neni ajokan!” Nyo nai ajokis a ŋakiro a ŋun, tomam nyiinakinito iyes ikes ŋiboro ŋulu iitanito aŋuna a ŋawat kec?

¹⁷ Anupit daŋ ikoni nen; ani pa kerukito ka ŋiticisyo, erae ŋina etwanit.

¹⁸ Nai elimuni ituŋanan ice tema, “Iyakar iyoŋ anupit ka ayakar ayoŋ ŋiticisyo.” Aboŋokinet kaŋ iŋes na, “Kitoodikinae ayoŋ anupit kon emam ŋiticisyo; eketoodikini ayoŋ iyoŋ anupit kaŋ ŋina erukito ka ŋiticisyo”.

¹⁹ Inupit iyoŋ atemar erae Akuj apei bon a? Ejok! Enupito tari atasatan daŋ--nabo emaranete tobulite.

²⁰ Iyoŋ ebaŋaanot! Icamit iyoŋ ikitoodikin atemar anupit ŋina emam ŋiticisyo erae akoŋinait a?

²¹ Ekokinio koloŋ papaa yok Aburaam ituruworyo ŋolo iyookino alokiŋaren Akuj ai? Eturuworyo iŋes ŋolo iyookino aŋuna a ŋiticisyo keŋ, apaki ŋina ainakinia iŋes lokoku keŋ Isaka neni ka Akuj a Namuroet.

²² Nyeanyuna tokona iyes atemar anupit ka ŋiticisyo keŋ etiyaete etic epei a? Abu anupit keŋ toruwor ŋina iyookino aŋuna a ŋiticisyo keŋ.

²³ Aŋun, apotu kiyookinos Ŋakigireta ŋuna ebasi, “Abu Aburaam tonup Akuj ka aŋuna ka anupit keŋ, abu Akuj tocamu iŋes erae ŋolo iyookino.” Alopite a ŋol, aponi tonyarae Aburaam ekone ŋolo ka Akuj.

²⁴ Ianyut tokona iyes atemar, ituruworyo ituŋanan ŋini iyookino alokiŋaren Akuj aŋuna a ŋiticisyo, meere aŋuna ka anupit bon.

²⁵ Ekote ŋakiro nenipei nen tari aneni ka amalaat a ŋina anyaritae Raab. Abu Akuj kituruwo iŋes ŋina iyookino alokiŋaren keŋ aŋuna a ŋiticisyo keŋ; anerae abu iŋes kijau ŋirototin ŋulu a Isirael, kiŋarak ikes tosiwa alorot ke ece.

²⁶ Ikwaŋinapei etwanitor akuwan emam etau, anupit daŋ etwanit emam ŋiticisyo.