Tobit 1 - Ebaibul

¹ Irworitae alokitaabo alo eemut a Tobit a lokoku a Tobiel a ŋolo arae lokoku ka Ananiel a ŋolo arae lokoku ka Aduel a ŋolo arae lokoku a Gabael a ŋolo arae lokoku a Rapael a ŋolo arae lokoku a Raguel a ŋulu arae ŋiletok ka Asael a ŋolo alokabila a Naputali.

² Alorwa a ŋulu epukator Salimaneser ŋolo ka Asirya, keponi torikoroe Tobit nakwap a Babilon, kerikoryo iŋes alo Sisibe, alotaun a ŋolo ayai Kwap Kedes, anakwap a Naputali, anakibois a Galileya a ŋina ayai lowae ŋolo ikyaara alokidiama Aser alowae a ŋolo alo To ka alo Kuju Pogor.

Asorokanut a Tobit ka akiyar keŋ ŋina eyookino

³ Abu ayoŋ Tobit, oyar ŋirwa a akiyar kaŋ daadaŋ, erae ŋulu a kire ka ŋulu a akiyookino. Abu ayoŋ etiya ŋiticisyo ŋulu alalak ŋulu ka amina neni a ŋiyeneta kaŋ ka neni a ŋituŋa kaŋ ŋulu aponi torikoroe kaapei ka ayoŋ Ninepe nakwap ka Asirya.

⁴ Apaki ŋina ayakar ayoŋ nakwap kaŋ, nakwap a Isirael, apaki ŋina ariŋaakar ayoŋ asorokana, apotu ŋituŋa a ekabila a papaa kaŋ a Naputali daadaŋ kimyekis ekal a Daudi ka kimyekis Yerusalem. Abu koloŋ Akuj toseu etaun Yerusalem alotooma ŋitaunio a ŋikabilae daadaŋ a Ŋisirael, toruwor neni einanakiniata ŋikabilae daadaŋ a Ŋisirael ŋamuronisya ka neni eyakaun Akai ka Akuj neni iboiyo Akuj, aponi kitaleunoe ka kitogogoŋoi aŋuna a ŋanyameta a daadaŋ ŋikaru ka ŋikaru.

⁵ Ainanakinete ŋituŋa a ekal a Naputali a papaa kaŋ daadaŋ ŋamuronisya neni a etorube a itaok a ŋini abu erwosit Yeroboam ŋolo a Isirael kiwuak nakwap a Dan ka lomoru a Galileya daadaŋ.

⁶ Nai ayoŋ bon alosenene ŋarwa ŋuna alalak Yerusalem aŋuna a ŋasuban, lopite ŋolo elimokinitere Ŋisirael daadaŋ anatubunet a ŋina a ŋikaru ka ŋikaru. Ewonyanakini ayoŋ Yerusalem atiŋit ŋaraito ŋuna eŋarenok ŋuna a ŋinyomen a emanikor kaŋ, ŋikiyae a ŋamesekin ka atutubet apei alotooma ŋitomon anaatuk ka a ŋajul a ŋuna eŋarenok a ŋuna etubunitoe anamesekin kaŋ.

⁷ Ainanakini ayoŋ ŋul neni a ŋisacaradotin a ŋidwe ka Aron anamuroet. Ainanakini daŋ ayoŋ neni a ŋidwe a Lepi a ŋulu arae ikes itiyanakinete Akuj alo Yerusalem atutubet apei alotooma ŋitomon a ŋikinyom, a epiini, a akimyet a ŋina ka Olipa, ŋaraito ŋuna ikwaan ka ŋuna a ekacikicikit ŋuna enyaritae Pomegranate ka ŋaboboryo ta ŋaraito ŋunace daadaŋ. Nabo daŋ alotooma ŋikaru ŋikanikapei eŋadaanari ayoŋ erae ŋisiliŋa atutubet apei alotooma ŋitomon a ŋiboro a ŋulu edoŋeneneete kadau ainakin neni a ŋidwe a Lepi, ido oya okoranak ŋituŋa alo Yerusalem,

⁸ ido ainanakini ayoŋ neni a ŋikokyok, a ŋapuseru ka neni a ŋituŋa a ŋulugelae a ŋulu kepotu toruworosi ŋipei ka Ŋisirael atutubet apei alotooma ŋiuni a ŋiboro a ŋulu edoŋeneneete. Ayaununui ayoŋ ŋiboro ŋul okoranak neni kec alokaru a ŋolo a ŋiuni, ido anyamio isua ŋamuja ŋun iwuapitae ŋikisila ŋulu etubunitoe alokisila a Moses aŋuna a ŋamuja a ŋun ka iwuapitae ŋuna alimunit Debora toto keŋ a Tobiel a ŋolo arae papa kaŋ, anerae abu papa kaŋ totwana ekemyek ayoŋ arae ekoki.

⁹ Ani aruwor ayoŋ ekile, abu eitu aberu ŋina arae ayenet kosi, abu ayoŋ ouruutu ka iŋes ikoku ŋinisapat ŋini abu ayoŋ olimok ekiro Tobias.

Torikoroe Tobit yae Ninepe

¹⁰ Ekaku a arikoro kaŋ Asiriya, kadolu Ninepe arae erikuno, emujete ŋiyeneta kaŋ daadaŋ ka ŋituŋa kaŋ daadaŋ ŋamuja a ŋituŋa a ŋulu nyerae Ŋiyudayan

¹¹ nai abu ayoŋ oŋer akimuj ŋamuja a ŋituŋa a ŋulu nyerae Ŋiyudayan.

¹² Etiyae ayoŋ ŋun aŋuna amitakinitor ayoŋ Akuj a etau kaŋ a daadaŋ,

¹³ abu Akuj ŋina alokidiama kitiya ejok neni kaŋ ka oyakaunor akikinyoma aneni a Salimaneser, ido agyelununui ayoŋ ibore daadaŋ ŋini eitanit iŋes.

¹⁴ Akitodol ŋina atwania Salimaneser alosenene ayoŋ nakwap a Media agyelunun ŋiboro aŋuna keŋ aina. Apaki ŋina ayakar ayoŋ nakwap a Media, abu ayoŋ emyek ŋiguniyae ŋulu eleleba esilipa ŋolo arae egyelit keŋ ŋatalentae ŋatomon, abu ayoŋ ecikak esilipa ŋol neni a Gabael alokaato keŋ a Gabiri.

¹⁵ Nai ani etwani Salimaneser, ido kilunyokin lokoku keŋ Senakerib lokicoloŋ keŋ kipuka, abu awasya toyakaun lorotin ŋulu alosere nakwap a Media, ido abu ayoŋ nyalot nabo inaa.

Amukeo anakinuk ŋikatwak

¹⁶ Alorwa a ŋulu epukator Salimaneser, abu ayoŋ etiya ŋiticisyo ŋulu alalak ŋulu ka amina ŋiyeneta kaŋ, ŋituŋa a ekabila kaŋ.

¹⁷ Ainanakini ayoŋ akimuj kaŋ neni a ŋulu anyamit akoro ka ainanakini ŋilowi kaŋ neni a ŋulu amamu ŋilowi, ido ani eŋolikini ayoŋ ekuwan a ituŋanan kaŋ a idio, ecakakinitae kiŋa arwatata a Ninepe, anukenene ayoŋ ituŋanan ŋin.

¹⁸ Anukenene daŋ ayoŋ ituŋanan daadaŋ ŋini abu erwosit Senakerib toar apaki ŋina amotunor iŋes alo Yudaya aŋuna ka akisicanet a ŋina abu erwosit ŋolo anakuj kisicania iŋes aŋuna eyanyia iŋes Akuj, anerae anaŋoit keŋ abu Senakerib toar Ŋisirael ŋulu alalak, nai asiyenene ayoŋ alemar ŋawat a ŋituŋa a ŋul onuk. Aŋun, apaki daadaŋ ŋina iwarya Senakerib ŋawat a ŋituŋa a ŋul, pa aryamununui ikes.

¹⁹ Kebu nai Eninepait epei tolot tolimok erwosit ŋakiro ŋuna etiyaenene ayoŋ tolimok atemar anukenene ayoŋ ŋituŋa ŋulu aarenene iŋes, aŋun abu ayoŋ oŋop. Nai ani ayenuni ayoŋ atemar eyeni erwosit ŋakiro kaŋ ka oyenu atemar ekewaritae ayoŋ ikotere akaaryo, abu ayoŋ okuryaniar, ido oem nariet.

²⁰ Aponi nai ekemiki ayoŋ ŋiboro kaŋ daadaŋ, mam ibore kaŋ ŋini aponi okoinakin ayoŋ, ŋini pa aponi tolemarae yaarae kai ka apukan ŋina eŋadao ŋiboro; mati aberu kaŋ Ana ka lokoku kaŋ Tobias.

²¹ Nai ani eriŋa nyelunyara ŋirwa ŋatomoniomwon, apotu ŋidwe a Senakerib ŋulusapa ŋiarei toara iŋes ka apotu ikes toema lomoru ŋulu ka Ararat, ido abu lokoku a Senakerib Esaradon kilunyokin lokicoloŋ kipuka. Abu Esaradon toseu Aikar lokoku alokaato kaŋ Anael apolokin ŋisiliŋa daadaŋ ŋulu a apukan keŋ, ido iŋes apolokinit epite ŋolo epukatere akwap ŋin daadaŋ.

²² Abu Aikar kisirwor erwosit aŋuna kaŋ, ido abu ayoŋ oboŋu Ninepe. Apaki ŋin arae Aikar ŋolo ayaununi ekopo neni a erwosit, iŋes daŋ ericakinit ekaboboot ŋolo ka apukan ka iŋes apolokinit epite ŋolo esitiyaere ŋisiliŋa a Senakerib a ŋolo ka Asiriya; aŋun abu Esaradon toseu iŋes nabo aŋuna ke etic a ŋol. Erae Aikar locen kaŋ, eyenet kaŋ nooi.