Tito 2 - Ebaibul

Ŋakiro ŋuna itemokino kitatamae natukon ŋuna egelegelya

¹ Nai itemokino iyoŋ kitatam ŋakiro ŋuna ecamuna ka akitatam ŋina a Ŋikristo ŋina iyookino.

² Kitatam ŋikasikou toraakas ŋulu ecoito, ŋulu emaikina tokeritetei, ŋulu epakito, ŋulu egogoŋ ananupit, anamina ka anatitinyikinit.

³ Ikwaŋinapei, kitatam ŋakimak kiboiyoto alopite a ŋolo itoodiunit atemar ekerito ikes Akuj, nyirworotor ŋulucetuŋa ka nyeruworosi ŋakamerak. Itemokino ikes toruworos ŋuna itatamete ŋakiro ŋuna ajokak,

⁴ ikotere epedoryata ikes akitatam ŋaberu ŋuna esorokaka: amina ŋikilyok kec ka ŋikecedwe,

⁵ toraakas ŋuna epakito, ŋuna ecayete ŋatameta, ŋuna esegak ŋitai, ŋuna itiyaete etic alokalya kec ejok, ŋuna ajokak ka ŋuna ekerito ŋikilyok kec; ido alopite a ŋol, emam ituŋanan itoroniyari ŋakiro ŋuna eponito aneni ka Akuj.

⁶ Ikwaŋinapei, kitatam ŋisorok toraakas ŋulu ecayete ŋatameta.

⁷ Anakiro a daadaŋ itemokino iyoŋ elope torae akitaanyikinet ŋina a ŋipitesyo a ŋulu ajokak. Kitatam emam alyokonu ka tomukeana.

⁸ Kirwor ŋakiro ŋuna ileereete ŋuna nyitepegio, ikotere ŋiketepegak yok isurumyo ŋileec, anerae eŋopete ŋakiro ŋuna aronok ŋuna ikitoroniyaryata ikes iwon.

⁹ Kitatam ŋipi topupete ŋikapolok kec anakiro a daadaŋ, kitalakanarete ikes tomam apeganakin ikes,

¹⁰ kori nyekokoyete aneni kec. Akilo, itemokino ikes kitoodiunito atemar ejokak ka ikinyoma ikes jwi jwi, ikotere itopoloorete ikes akitatam ŋina ka Akuj a ŋina erae Akaiunan yok, anibore a daadaŋ a ŋini itiyaete ikes.

¹¹ Anerae etoodiu Akuj ajokis keŋ aŋuna ka aiunia ŋituŋa daadaŋ.

¹² Ikitatami ajokis ŋin iwon aesikin ŋipitesyo ŋulu nyekerito Akuj ka ekibure ŋolo ka akwap a na ka itemokino ikiboi ikirae ŋulu ikitenit anatameta, ŋulu ikiyookino ka ŋulu ikikerit Akuj anakwap a na,

¹³ eriŋa ikidarit arereŋu ŋina ikigeno iwon, iŋes atemar itatakanunio apolou ŋina ka Akuj yok a ŋina etiron ka ŋina ke Ekaiunan yok Yesu Kristo.

¹⁴ Abu iŋes tojal akiyar keŋ aŋuna yok, aiun iwon anaronis a daadaŋ ka akituruwor iwon ŋituŋa ŋulu asegak ŋulu erae ŋulu keŋ make, ŋulu imuit nooi akitiya ŋuna ajokak.

¹⁵ Kitatam ŋakiro ŋun; kisitiya apolou daadaŋ ŋina iyakar iyoŋ apaki ŋina isimukekinitor ka ŋina isiburaa ikes epupete ŋakiro ŋuna irworo iyoŋ. Nyicamak idio alokidiŋ kec ikimenit iyoŋ.