Tito 1 - Ebaibul

Emalas

¹ Ayoŋ Paulo eketiyan ŋolo ka Akuj ka ekiyakia ŋolo a Yesu Kristo egirit abaruwa na. Abu Akuj okoseu ayoŋ, ekeyakia daŋ akiŋarakin ka akitogogoŋ anupit a ŋituŋa keŋ a ŋulu seuna ka akirik ikes toyenut ejok ŋakiro ŋuna a kire ŋuna eyenuniata ikes akerit Akuj ejok;

² ŋakiro ŋuna eponito anakigeno a ŋina ka akiyar a ŋina nyedaun. Abu Akuj ŋina nyelyokono ikiik iwon akiyar ŋin eriŋa ŋakwapin nyesubuna

³ ka anapaki a ŋina eyookino, abu kisileereu akiikinet ŋin anakirot keŋ. Abu Akuj, ŋina erae Akaiunan yok, ekecikak ayoŋ alimonokin ŋakiro ŋun neni a daadaŋ.

⁴ Egirit ayoŋ neni kon Tito, a ŋolo irae lokoku kaŋ ŋolo a kire ananupit a ŋina ikimori ayoŋ ka iyoŋ. Toyai neni kon ajokis ka ekisil aneni ka Akuj Papa ka aneni a Yesu Kristo Ekaiunan yok.

Etic a Tito alo Kirete

⁵ Abu ayoŋ ekemyek iyoŋ alo Kirete, ikotere isubakini ŋakiro daadaŋ ŋuna etemokino tosubakinae aina ka aseun ŋikatukok ŋulu epolokinito ŋatukon a Ŋikristo alotooma ŋolotaun, ikwaŋina eketatamikinitor ayoŋ iyoŋ.

⁶ Itemokino ŋolokatukon kikoni ne: torae ŋolo nyitoronitae, toyakar aberu apei; tonupito ŋidwe keŋ Yesu Kristo ka nyelimitoe anakiro a ŋuna ka adedeŋu ka aŋerit akipup ŋakiro.

⁷ Ikwapei eraakar ekarikon ŋolo a Ŋikristo epolokinit etic ŋolo ka Akuj, itemokino iŋes pa itoronitae. Nyitemokino iŋes ituro kori epatana akiŋo kori emerana kori eryenyaana kori erorokana alosiliŋa.

⁸ Itemokino iŋes erae ŋolo ijaununui ŋituŋa daadaŋ, tomina ibore ŋini ajokan daadaŋ. Itemokino iŋes erae ŋolo ecayete ŋatameta, ŋolo iyookino, ŋolo itoodiunito ŋipitesyo keŋ atemar iwuapit iŋes ŋakiro ŋuna ka Akuj; torae ŋolo iyokuuno bon.

⁹ Itemokino kiricite ejok akitatam ŋina ecamuna, ŋina ikinyoma ŋina a Ŋikristo. Alopite a ŋol epedori akisimukekin ŋuluce anakitatam a ŋin, a ŋina iyookino ka akitepeg ŋulu itepegito akitatam ŋin.

¹⁰ Anerae eyakasi ŋulu alalak, akilo nooi ŋulu ebelekinosi alodin a ŋolo a Ŋiyudayan aruwor Ŋikristo, ŋulu eŋerito akipukao ka emodyanakinete ŋuluce a ŋakiro kec a ŋuna erae ŋacaryo.

¹¹ Emaikina kiretakinae ikes alorwor kec, anerae eguryakis ikes ŋikalya daadaŋ, aŋuna itatamyata ŋakiro ŋuna nyitemokino kitatamae. Itatamete ikes ŋakiro ŋun aŋuna ca ka aryamunia ŋisiliŋa.

¹² Tari epei a ŋikadwarak a Ŋikiretei, alimunit atemar, “Erae jwi jwi Ŋikiretei ŋikalyokonok, ikwaan ikes ka ŋityaŋ ŋulu asiilyanak ka erae ŋikadakak ŋulu akalanyanak.”

¹³ Iyookino ŋakiro ŋuna abu iŋes tolimu. Aŋakiro a ŋun, itemokino iyoŋ kisibura ikes nooi, ikotere toruworos ikes ŋikanupak ŋulu ajokak;

¹⁴ tojoŋoto akiwuapit ŋiemuto ŋulu a Ŋiyudayan ka ŋakiciketa ŋuna eponito alotuŋa a ŋulu adaut akiŋer ŋuna a kire.

¹⁵ Esegak ŋiboro daadaŋ aneni a ŋituŋa a ŋulu esegak ikes ŋilopeyek, nai emam ŋiboro esegak aneni a ŋituŋa a ŋulu nyenupito, anerae erae ŋatameta ka ŋitai kec esiilyaka.

¹⁶ Ebasi ikes iwogasi ebe ikiyeni Akuj, nai itepegito ŋiticisyo kec ŋun. Erae ikes ŋulu emoitaka, nyepupete ŋakiro ka nyepedorete akitiya idiobore ŋini ajokan.