Sepan. 2 - Ebaibul

Atubokino a ŋimoe a Ŋisirael

¹ “Tocununos kaapei, tocununos iyes ŋakwapin ŋuna nyileeceko,

² tocununos eriŋa iyes nyiritara nariet ikwa ŋikabinin ŋulu ekutarit ekuwuam, eriŋa nyedoluno neni kus anyunyura ŋina aronon ŋina ke Ekapolon. eriŋa nyedoluno neni kus akoloŋit ŋina ka anyunyura ke Ekapolon.

³ Kiwara Ekapolon, iyes daadaŋ ŋulu itiditeuna anakwap, iyes ŋulu iwuapito ŋakiciketa keŋ; kiwara akiyookino, kitiditeunos alokiŋaren Ekapolon Akuj; acepaki iunosi iyes akoloŋit ŋina ka anyunyura ke Ekapolon,

⁴ anerae imyekinio Gasa emam ituŋanan eyai, ido inyasunio Asikelon; iritaryo ŋituŋa ka Acidod edoli kidiŋ apaaran, ido elemaryo Ekiron aneni eyai.”

⁵ “Okoe iyes ŋituŋa ŋulu iboiyete alodiyete anam, iyoŋ akwap ŋina a Ŋikerisi! Ikiremokino iyes akirot ke Ekapolon. Okoe iyes Ŋikanaani, akwap ŋina a Ŋipilistin; akamunyari ayoŋ iyes todaun ŋini idoŋi.

⁶ Okoe iyes Ŋikerisi ŋulu iboiyete alodiyete anam, eruwor akwap kus ŋina a ŋikeyokok, ŋina ilelebun ŋauyoi a ŋamesekin.

⁷ Eruwor akwap kus ŋina a ŋipiya a ŋulu a ekabila a Yuda; eruwor neni edakasi ŋibaren kec, eruwor nakais ŋuna ka Asikelon eperete ikes eboŋ. Iuryari Ekapolon Akuj kec ikes; inyakakini ŋituŋa keŋ ŋarereŋisyo kec.

⁸ “Adau ayoŋ akiirar ŋiyany a ŋituŋa a Moab ka ŋilam a Ŋiamoni, ŋulu alomakiniata akilam ŋituŋa kaŋ, ido itubulito ŋituŋa kaŋ anakwap kec.

⁹ Aŋun, ayoŋ Ekapolon ŋolo Etiron, Akuj ŋina a Ŋisirael alimu atemar, ‘Ikwapei ayarya ayoŋ, inyasunio Moab ikwa Sodoma, ikwaanikin Ŋiamoni ka ŋituŋa a Gomora, Sodoma ka Gomora ŋakiboisyo ŋuna aliba ŋinya aneni sek adukitoe ikes, ŋakiboisyo ŋuna aruwor ŋapanya ŋuna ebokere acumbi, ŋakiboisyo ŋuna aruwor ŋacaryo ŋikaru ka ŋikaru. Ikurukurorete ŋituŋa kaŋ ŋulupiya ŋakiboisyo ŋun; eruwor ŋakwapin ŋun ŋuna a ŋituŋa a ŋulu apotu tobucun alomoe kec.’

¹⁰ “Epite ŋol iŋes isicanere ŋituŋa a Moab ka ŋulu ka Amon aŋuna ka akituro kec ta ajamuwarit ŋituŋa ke Ekapolon a ŋolo Etiron.

¹¹ Eryenyaanikini Ekapolon ikes nooi; kire jik, emunyari iŋes ŋakujo daadaŋ ŋuna eya nakwapin. Ilipete neni ke Ekapolon ŋituŋa daadaŋ ŋulu iboiyete alodiyete ŋanamyo ka ŋulu iboiyete aloculeta a ŋanamyo.

¹² “Iyes daŋ Ŋikusi, ikiaryo iyes ke ekileŋ.

¹³ Isitiyae Ekapolon apedor keŋ amunyarya ŋituŋa ŋulu ka Asiriya, ido ituruwori etaun ŋolo a Ninepe ereŋorot, akibois ŋinacaryoit ŋina ikwaan ka aloŋisat.

¹⁴ Eruwor nen neni euryaniata ŋaatuk, eruwor nen akibois a ŋityaŋ a ŋulu ka ariet; akibois ŋina iboiyoto ŋitulae ka ŋikurukwa a nakyes a ŋipirin keŋ; eruwor lodirisae keŋ erwotor ŋitulae, eruwor nalosin keŋ erwotor ŋikurukwa; anerae ielaryo ŋakito ŋuna a Cedar ŋuna sek eya kidiama ŋakais keŋ.

¹⁵ Arae sek Ninepe etaun ŋolo alakara ŋituŋa keŋ kiboiyete pa ekuryaka, ebasi make, ‘Iwon bon ikidedeŋ, mam ice?’ Kiŋolikisi tokona epite ŋolo aruworor iŋes ereŋorot, neni eperete ŋityaŋ ŋulu ka ariet! Eumokini ituŋanan daadaŋ ŋini itori nen iŋolikini Ninepe ikoni nen, ido kimuŋumuŋak akou.”