Sakar 9 - Ebaibul

Atubokino ŋina a ŋimoe a Ŋisirael

¹ Erae nu ŋakiro ke Ekapolon: “Adau iŋes atubun akisican akwap ŋina ka Adirak ka etaun ŋolo a Damasko, anerae etaun ŋolo epol alo Siriya daŋ erae ŋolo ke Ekapolon, lopite ŋolo eraakatar ŋikabilae a Isirael daadaŋ ŋulu ke Ekapolon.

² Etaun Amas daŋ ŋolo ikukorosi ka Adirak, erae ŋolo ke Ekapolon. Tiro ka Sidon daŋ tari kerae ikes ŋakwapin ŋuna eosok nooi, erae ŋuna ke Ekapolon.

³ Adaut ŋituŋa a Tiro akiduk aŋuna kec ŋaduketa ŋunajiet. Adaut akituk esilipa ŋolo alalan ka egolid aruworosi esilipa ka egolid ibore ŋini epetuna ikwa apuwa.

⁴ Nai tokona, elemari Ekapolon ibore daadaŋ ŋini eyakar etaun ŋol. Imasakini Ekapolon ebari ke etaun a ŋol tooma nanam, ido icunyaryo etaun ŋol todaun.

⁵ Iŋolikinete ŋituŋa ŋulu eyakasi lotaun Asikelon ŋakiro ŋun, ido ekuryakyarosi. Ŋituŋa a Gasa daŋ, iŋolikinete ŋun, toryamut aryeba ŋina apipilan nooi. Ŋituŋa ka Ekiron daŋ, iŋolikinete ŋakiro ŋun, ido epuripuryaar akigeno kec. Etwani erwosit ŋolo a Gasa, imyekinio Asikelon erae ereŋorot koŋin.

⁶ Iboikinosi ŋituŋa ŋulugelaanotin Asidod, ido alemari ayoŋ akituro a Ŋipilistin.

⁷ Nyerubakinete ikes enyamete akiriŋ ŋina eyakasi ŋaokot, kori ŋamuja ŋuna italeo akinyam. Eruwor ŋipiya kec daadaŋ ŋipei a ŋituŋa kaŋ, ikwaanikin ikes ka ekabila a Yuda. Eruwor ŋituŋa a Ekiron ŋipei ka ŋituŋa kaŋ, lopite ŋolo aponiata Ŋiyebusi toruworotor.

⁸ Euryari ayoŋ akwap kaŋ, eretakini ŋajorei tojoŋoto akitorunun nen. Nyacamakini ayoŋ ŋiryenyaanotin ebolyatar ŋituŋa kaŋ nabo. Adau ayoŋ akiŋolikin epite ŋolo aponiata ŋituŋa kaŋ toryamuniata ŋican.”

Erwosit a ŋituŋa ka Akuj

⁹ “Tolelyana nooi iyes ŋituŋa a Sion! Tocelutu nooi aŋuna ka alelyanu, iyes ŋituŋa a Yerusalem! Kiŋolikisi ebunit erwosit kus neni kus; Erae iŋes ŋolo iyookino ka ŋolo adau akiloun, erae iŋes ŋolo itiditeuna ka edokit isigirya, itaok ŋini ka asigirya.”

¹⁰ Ebala Ekapolon ebe, “Alemari ayoŋ ŋagaari ŋuna ke ejie alo Epuraim, alemari ayoŋ ŋaŋolei ŋuna ke ejie alo Yerusalem, amunaari ayoŋ ŋiboro ŋulu isitiyao alojiesyo. Eyauni erwosit kus ekisil nakwapin; ipukae iŋes ameun ananam tari nanam, ameun anaŋolol Eupurate tari nakisalet ka akwap.

¹¹ “Aŋuna ka acamunet kaŋ ka iyes, a ŋina ikicamunor iwon anakisitiya ŋaokot ŋuna a ŋamuronisya, alacakini ayoŋ ŋituŋa kus ŋulu eenitae, nyerubakinete ikes eenen anapanya a ŋuna emam ŋakipi.

¹² Toboŋutu iyes ŋulu iyakatar akigeno, iyes ŋulu sek ikirikoritae nakwapin toboŋutu nakibois kus ŋina eyai aiuno. Akalimokini ayoŋ iyes tokona atemar, ekenyakakini ayoŋ iyes ŋinibore ŋarwa ŋaarei adepar ŋini sek.

¹³ Esitiyae ayoŋ Isirael ikwapei isitiyaa ekajion ŋikaleŋeleŋe. Esitiyae ayoŋ ŋikilyok ŋulu eya Sion ikwapei isitiyaa ekajion ŋileŋia, kitojioto ŋikilyok ŋulu ka Akaia.

¹⁴ “Etakanuni Ekapolon eyai kidiama ŋituŋa keŋ; egumuni iŋes ŋikaleŋeleŋe keŋ ikwaan ka akimilyaunet. Ekutakini Ekapolon ŋolo Etiron arupepe; ebuni iŋes alokuwuamin a ŋulu alo Kwap a ŋulu ipiripirete.

¹⁵ Iuryari Ekapolon ŋolo Etiron ŋituŋa keŋ, ido emunyarete ŋituŋa a Ekapolon ŋimoe kec. Ecelunete ikes alo jie esibit ŋituŋa ŋulu emerasi, ido earete ŋituŋa a Ekapolon ŋimoe kec; toleleiyasi ŋaokot a ŋimoe kec ikwa ŋaokot a ŋamuronisya ŋuna ebukokinio Namuroet anabakule.

¹⁶ “Ani edoluni akoloŋit ŋin, eiuni Ekapolon Akuj ŋituŋa keŋ lopite ŋolo eiunia ekeyokon ŋamesekin keŋ alocan. Ileereunete ikes anakwap ke Ekapolon a Akuj ikwa ŋasuwa ŋuna amilimilak ŋuna inaminamitae lobokot.

¹⁷ Ejokyar nooi ka ibusyar nooi akwap kec. Epolounete anakwap a ŋin ŋisorok ka ŋasorok erae ŋulu itogogoŋit ekidikidi ka epiini.”