Sakar 8 - Ebaibul

Ŋakiikineta ka Akuj neni a Sion

¹ Abu Ekapolon ŋolo Etiron tolimok Sakariya ŋakiro nu tema,

² “Acamit ayoŋ ŋinapei akiŋarakin Yerusalem aŋuna epoloo nooi amina kaŋ aŋuna a ŋituŋa keŋ, amina ŋina akainaki ayoŋ aŋoikin ŋimoe keŋ.

³ Aboŋuni ayoŋ Yerusalem lotaun kaŋ ŋolo asegan eboikin nen. Eyenunio iŋes erae etaun ŋolo eyai akikinyoma ka enyarao emukura ŋolo ke Ekapolon a ŋolo Etiron, emukura ŋolo asegan.

⁴ Iboikinosi nabo nalapatui ŋuna a Yerusalem ŋikasikou ka ŋakimak ŋulu elosete icogeete a ŋibelae.

⁵ Ilelebun nabo lorotin ŋulu a Yerusalem ŋidyain ka ŋapesur ebolyasi.

⁶ Tari ketakan alorwa a lu ŋakiro nu esibit nyitiyakin, iirarete ŋapiya a ŋituŋa ka akwap a Yerusalem, nai etakanunete aneni kaŋ erae ŋuna itiyakin.

⁷ Aiuni ayoŋ ŋituŋa kaŋ anakwapin a ŋuna alo Kide ka ŋuna alo To.

⁸ Enyakuni ayoŋ ikes kiboikinos Yerusalem; toruwor ŋituŋa kaŋ, ido aruwor ayoŋ ŋolo ekinyoma ka eyookino aneni kec ikwapei Akuj kec.

⁹ “Totitinyokiata! Ipupete tokona iyes ŋakiro ŋunapei apotu ŋikadwarak kirworo apaki ŋina esyakinere adukokin nabo Akai ŋina ka Akuj.

¹⁰ Ani eriŋa apaki ŋin nyedolo, mam ituŋanan apedorit aryamun ŋisiliŋa ŋulu kipaŋgaet ŋituŋa, kori ŋibaren, ido mam ituŋanan ayakar akinapakina, anerae abu ayoŋ eturuwo ŋituŋa ŋulu imanan make.

¹¹ Nai tokona nyetiyae ŋuna aronok neni a ŋipiya a ŋituŋa a Yerusalem lopite ŋolo abunio etiyaa neni atapapaa kec.

¹² Itaete ikes ŋikinyom kec anakinapakina. Eraete ŋikito ke epiini, itokoni akwap ŋikinyom, ido eyakaun akiru ŋina alalan. Ainakini ayoŋ ŋarereŋisyo ŋun daadaŋ lotuŋa ŋulu ka akwap kaŋ ŋulu apiyanun.

¹³ Ŋituŋa a Yudaya ka Isirael! Ikwapei paaran iraakatar iyes ŋulu ikilamete ŋigelaanotin, akaiuni tokona ayoŋ iyes toruworos arereŋu. Aŋun, totitinyokiata, Nyikuryaketa!”

¹⁴ Ŋakiro ŋuna irworo Ekapolon ŋolo Etiron ikes nu ebe, “Ani ŋinibore eketoŋoeta ayoŋ atapapaa kus, abu ayoŋ oyeu akisican ikes, ido abu ayoŋ nyelocok ŋatameta kaŋ, nai abu etiya ŋuna sek ayeunit akitiyakin.

¹⁵ Nai tokona acamit ayoŋ nooi akiterereŋ ŋituŋa a Yerusalem ka ŋulu a Yudaya. Aŋun, Nyikuryaketa!

¹⁶ Ŋakiro nu ikes emaikina iyes kitiyata: Itemokino ŋinituŋanan kirwor ŋuna a kire neni a ŋinice ka totubonokisi anakiyookino alo ikiikoe kus.

¹⁷ Nyituko akitiya aronis neni a ŋikidunyet kus, nyiminasi akikoŋ alyokonu. Aŋerit ayoŋ ŋun daadaŋ.”

Akiredakin akiron ŋina eyai alelyanu

¹⁸ Abu Ekapolon ŋolo Etiron tolimok Sakariya ŋakiro nu tema,

¹⁹ “Emaikina akiredanakin akiron ŋina iredanakinere aroneenen elap ŋolo a ŋiomwon, ŋolo a ŋikan, ŋolo a ŋikanikaarei ka ŋolo a ŋitomon, toruwor ŋasuban ŋuna ka alelyanu ka alakara aneni a ŋituŋa a Yudaya. Aŋun, emaikina iyes tominakis ŋuna a kire ka ekisil.”

Aponare a ŋituŋa a ŋulu alalak Yerusalem

²⁰ Ebala Ekapolon ŋolo Etiron ebe, “Ebunit apaki ŋina eponiata ŋituŋa ŋulu a ŋitaunio a ŋulu alalak Yerusalem.

²¹ Etemarete ŋituŋa ŋulu ke etaun ke epei neni a ŋulu ke etaun a ŋoloce ebe, ‘Elosyo isua akilip Ekapolon ŋolo Etiron ka akilipun ŋarereŋisyo aneni keŋ; potu oloto ka isua!’

²² Epote Yerusalem ŋituŋa ŋulu alalak ka ŋakwapin ŋuna agogoŋok alojiesyo. Epote ikes akilip Ekapolon ŋolo Etiron ka akilipun ŋarereŋisyo aneni keŋ.

²³ Alorwa a ŋul epote ŋituŋa ŋulugelaanotin ŋitomon neni ke Eyudayat ke epei temasi, ‘Ecamitae isua arukor ka iyoŋ neni ilosi, anerae adaun isua akiirar atemar irukito iyoŋ kaapei ka Akuj.’ ”