Sakar 5 - Ebaibul

Akirot ŋina a ŋakanikapei ŋina kitoodiunio anakiruja: Ekitaabo ŋolo ayai kidiama lokuwuam

¹ Abu nabo ayoŋ eŋoliya kidiama, eŋolik ekitaabo ŋolo ayai kidiama lokuwuam.

² Ekeŋit ayoŋ emalaika tema, “Nyo ite iyoŋ?” Oboŋok ayoŋ otema, “Ete ayoŋ ekitaabo eyai lokuwuam, erae aoyau keŋ ke epeiwae ŋimitae ŋakanikaomwon ka erae auruwuanut keŋ ke epeiwae ŋimitae ŋaomwon ka atutubet.”

³ Tema nai iŋes neni kaŋ, “Erae ŋul ŋicen ŋulu epete akwap daadaŋ; anerae alotooma ŋakiro ŋuna igiritae epeiwae ekitaabo ŋol, ebasi ebe, ‘Emunyaryo ŋolo kokolan daadaŋ, ido ebasi ŋuna igiritae lowae ŋoloce, ituŋanan daadaŋ ŋini ikoŋi alyokonu emunyaryo.’

⁴ Alimu Ekapolon ŋolo Etiron ŋakiro nu ebe, ‘Eyakiyari ayoŋ ŋicen ŋul, ido epete ŋicen ŋul kai a ŋolokokolan ka kai a ŋini ikoŋi alyokonu alokiro kaŋ. Erubakinete ŋicen ŋul anakais a ŋul, ido emunaarete ŋakito kaapei ka ŋamoru a ŋakais kec.’ ”

Akirot ŋina a ŋakanikaarei ŋina kitoodiunio anakiruja: Aberu ŋina ayai tooma ebukit

⁵ Abu nai emalaika ŋolo ikirworo ka ayoŋ bu neni kaŋ tema, “Kiŋoliya kidiama kiŋolik ibore ŋin ŋini ebunit.”

⁶ Abu ayoŋ eŋit iŋes otema, “Nyo iŋes?” Toboŋok iŋes tema, “Erae ibore ŋini ebunit ŋin ebukit.” Torubak iŋes irworo ebala, “Apolou keŋ iŋes atemar asec akwap daadaŋ.”

⁷ Aponi nai toŋaarae anukenit anakituk ke ebukit, eŋolik ayoŋ aberu iboi alobukit.

⁸ Tema emalaika neni kaŋ, “Apolou ka aberu a ŋin iŋes atemar eyai aronis.” Abu nai emalaika kijukak aberu ŋin tooma ebukit, ido togolok ebukit.

⁹ Ani eŋoliyari ayoŋ kidiama, abu eŋolik ŋaberu ŋaarei eporete a ŋabebenuk a ŋuna ikiwuakarete, ido aponito ŋaberu ŋun neni kaŋ. Ayakatar ikes ŋabebenuk ŋuna ikwaan ka ŋuna a acolikokot, apotu ikes kikyaasi ebukit topororyata.

¹⁰ Abu ayoŋ eŋit emalaika otema, “Ai eayete ikes ebukit?”

¹¹ Toboŋok iŋes tema, “Eayete ikes ebukit nakwap ŋina a Babilon, adukokin iŋes akai a ina. Ani kirikakin akiduk, kiwuakinae ebukit nen nakibois keŋ ŋina emaikina iŋes eyai.”