Sakar 4 - Ebaibul

Akirot ŋina a ŋakan ŋina kitoodiunio anakiruja: Awoet ŋina ke etaa ka ŋikito ŋulu ka olipa

¹ Abu emalaika ŋolo sek ikirworo ka ayoŋ toboŋu neni kaŋ eketekyenyu ayoŋ, ikwa itekienyunere ituŋanan anajo.

² Abu iŋes ekeŋit ayoŋ tema, “Nyo ite iyoŋ?” Abu ayoŋ otema, “Ete ayoŋ awoet ŋina ke etaa, ŋina erae egolid bon, eyai abesen kidiama keŋ, eyakasi ŋitaae ŋikanikaarei kidiama keŋ, eya lotaae ŋul ŋakiboisyo ŋakanikaarei ŋuna iwuanakinio ŋausyo.

³ Diyete ŋitaae ŋul, eyakasi ŋikito ka Olipa ŋiarei, eyai epei teten abesen ka ŋoloce kedyeny keŋ.”

⁴ Abu ayoŋ eŋit emalaika ŋolo ikirworo ka ayoŋ otema, “Nyo ŋiboorei lu Ekapolon kaŋ?”

⁵ Toboŋok iŋes tema, “Mam nyiyeni iyoŋ atemar nyo ŋiboorei lu a?” Oboŋok ayoŋ otema, “Mam, Ekapolon kaŋ.”

⁶ Aŋun, abu iŋes tema neni kaŋ, “Erae ŋin akirot ke Ekapolon neni a Serubabel. Ebala Ekapolon ŋolo Etiron, nyilouni iŋes alotooma agogoŋu, kori apedor, nai alotooma Etau kaŋ.

⁷ Eŋopiyarete aneni a Serubabel ŋatyokisyo ŋuna apolok nooi ŋuna etya ŋimoru. Edukokini iŋes nabo Akai ka Akuj, ido apaki ŋina edukokinia iŋes amoru ŋina esidyon, ecelunete ŋituŋa temasi, ‘Ibus nooi! Ibus nooi!’ ”

⁸ Abu nabo akirot ace bu neni kaŋ aneni ke Ekapolon ebala,

⁹ “Adau Serubabel adukokin akisyakinet ŋina ka Akai ka Akuj, irikakini iŋes akiduk Akai. Ani itiyakin ŋun, eyenunete nai ŋituŋa kaŋ atemar ayoŋ abu ekeyakiya iyoŋ neni kec.

¹⁰ Nyelakara ikes tokona, anerae edit ibore ŋini etiyakin. Nai iŋolikinete ikes Serubabel erubakinit eduki Akai ka Akuj, ido elakarosi ikes.” Abu emalaika tema neni kaŋ, “Erae ŋitaae ŋulukanikaarei ŋul ŋakonyen ŋakanikaarei ŋuna ke Ekapolon ŋuna iteete akwap daadaŋ.”

¹¹ Abu nai ayoŋ eŋit iŋes ebe, “Nyo bo ŋikito ka Olipa ŋuluarei ŋul, ŋulu eyai epei teten ka ŋoloce kedyeny a awoet a etaa?”

¹² Abu nabo eŋit ŋina a ŋaarei ebe, “Nyo bo ŋaten ka Olipa ŋunaarei, ŋuna eyakasi diyete ŋasuwa ŋuna ke egolid ŋuna eleleunitor akimyet ŋina ka Olipa?”

¹³ Abu iŋes okoboŋok ayoŋ tema, “Nyiyeni iyoŋ atemar nyo ikes a?” Oboŋok ayoŋ otema, “Ekapolon kaŋ, nyayeni ayoŋ.”

¹⁴ Aŋun, abu nai iŋes tema, “Erae ŋul ŋikilyok ŋiarei ŋulu aseu ka etaleu Akuj akitiyanakin Akuj ŋina erae Ekapolon a akwap a daadaŋ.”