Sakar 3 - Ebaibul

Akirot ŋina a ŋaomwon ŋina kitoodiunio anakiruja: Yosua ka Satan

¹ Abu nai Ekapolon eketoodik ayoŋ anakiruja Yosua esacaradoti ŋolo Apolon nooi, ŋolo awoi alokiŋaren emalaika ke Ekapolon. Eketoodik iŋes ayoŋ Satan daŋ ŋolo awoi aloteten a Yosua akisitakin Yosua.

² Tema Ekapolon neni a Satan, “Okoe Satan, Ekapolon elope ikiyayakini iyoŋ! Ekapolon ŋolo aseu Yerusalem iŋes ikiyayakini iyoŋ! Nyikwaan mono ekile lo ke emacar ŋolo enepi ŋolo elemunio anakim a?”

³ Apaki ŋin, awoi Yosua alokiŋaren emalaika, enapit ŋilowi ŋulu aronok.

⁴ Tolimok emalaika ŋituŋa ŋulu awuasi alokiŋaren Yosua tema, “Tolacasi ŋilowi keŋ ŋul.” Tema nai neni a Yosua, “Kiŋolik, alema ayoŋ asecit kon, ido eketanapikini ayoŋ iyoŋ ŋilowi ŋulu a ŋasuban.”

⁵ Abu nai emalaika a Ekapolon tema, “Kitanapikisi iŋes akopiya ŋina kitete.” Aŋun, apotu ikes kitanapikis iŋes akopiya ŋina kitete ka ŋilowi, towoi emalaika a Ekapolon a nen.

⁶ Abu nai emalaika a Ekapolon kicik Yosua ŋakiro nu tema,

⁷ “Ŋakiro ŋuna ebala Ekapolon ŋolo Etiron ikes nu ebe, ‘Ani kiwuap iyoŋ ŋikisila kaŋ, ido kitiya ŋiticisyo ŋulu akainak ayoŋ iyoŋ, ipedori iyoŋ apolokin akai kaŋ ka ŋalapatui ŋuna alo kiŋa akai kaŋ, akainakini ayoŋ iyoŋ apedor ŋina irukyoto kaapei ka ŋulu ewuasi a ne.

⁸ Topupok tokona, iyoŋ Yosua ŋolo irae esacaradoti ŋolo Apolon nooi, iyoŋ kaapei ka ŋirukitos kon ŋulu iboiyete alokiŋaren kon, ŋulu erae akitoodiunet a ŋakiro a ŋuna ajokak a ŋuna eponito. Alosi ayoŋ ayaun eketiyan kaŋ ŋolo enyaritae Ateni.

⁹ Kiŋolikisi iyes amoru ŋina ewuak ayoŋ kiŋaren a Yosua. Eyakar amoru ŋin ŋiwaetin ŋikanikaarei, ido eciekini ayoŋ ŋakiro namoru ŋin, alemari ayoŋ asecit ka akwap a na alotooma akoloŋit apei bon.

¹⁰ Akoloŋit ŋin, ebuni ŋinituŋanan alokidiŋ kus anyarare ikidunyet keŋ akiboikin ka iŋes lotolim ke epiini keŋ ka ŋolo ke ebobore keŋ.’”