Sakar 2 - Ebaibul

Akirot ŋina aŋauni ŋina kitoodiunio anakiruja: Ekile ŋolo ayakar akipimet

¹ Ani eŋoliyari ayoŋ kidiama, abu eŋolik ekile ŋolo ayakar akipimet.

² Abu nai ayoŋ eŋit iŋes otema, “Ai ilosi iyoŋ?” Abu nai iŋes okoboŋok ayoŋ tema, “Akipim Yerusalem oanyu aoyau ka alalau keŋ.”

³ Abu nai emalaika ŋolo ikirworo ka ayoŋ bu kiŋaren, ido abu ecemalaika bu akisiryam iŋes.

⁴ Tema neni keŋ, “Tomotun, tolimok esorokit ŋol ŋolo eyakar akipimet ebe, ‘Ebala Ekapolon, eruwor Yerusalem etaun ŋolo emam ŋarwatatain aŋuna alalauniata nooi ŋituŋa keŋ ka ŋibaren keŋ.

⁵ Ayoŋ elope aruwor arwatata ŋina ikwaan ka akim, arwatata ŋina irimokinit Yerusalem kidiŋ, ido ayoŋ elope apolokini.’ ”

Tojoŋo mono Sakariya akiruja: Adyekitoi neni a ŋulu ealara nakwapin

⁶ Tolimok Ekapolon ŋituŋa keŋ tema, “Potu! Potu! Tomotunos anakwap a ŋina alo Kuju, anerae abu ayoŋ ekeala iyes lowaetin ka akwap daadaŋ.

⁷ Potu! tosiutu, toboŋut Sion, iyes ŋulu iboiyete ka ŋituŋa a Babilon.”

⁸ Aŋun, abu Ekapolon ŋolo Etiron kirwor ŋakiro nu kedau iŋes anapolou keŋ akiyok ayoŋ aŋuna a ŋituŋa a ŋulu apotu ikielasi iyes. Abu iŋes tema, “Kire jik, ituŋanan ŋini ikiari iyes, ikwaanikin ka ŋini elemari ibore kaŋ ŋini amina ayoŋ.”

⁹ Kiirasi tokona, alosi ayoŋ akitijikin ikes, ikotere toŋatasi ŋipi kec ebari kec. Toyenut nai iyes atemar Ekapolon ŋolo etiron iŋes ekeyakuunit ayoŋ.

¹⁰ Ebala Ekapolon, “Iyes ŋituŋa a Sion, toeoto ka tolelyana, anerae abunit ayoŋ, ido eboiyoto kaapei ka iyes.”

¹¹ Epote ŋakwapin ŋuna alalak akoloŋit ŋin neni ke Ekapolon, eruwor ikes ŋituŋa keŋ, iboikin Ekapolon kaapei ka ikes. Iyenunete nai iyes atemar Ekapolon ŋolo Etiron iŋes ekeyakuunit ayoŋ neni kus.

¹² Eruwor Yudaya atutubet ŋina erae ŋina ke Ekapolon anakwap a ŋina asegan, ido eseuni iŋes nabo Yerusalem.

¹³ Kililiŋa iyes ŋituŋa daadaŋ alokiŋaren Ekapolon; anerae abu iŋes anakibois keŋ a ŋina asegan a ŋina sek iboiyo.