Sakar 14 - Ebaibul

Ejie ŋolo eyakaun ka akiloun ŋina esidyon

¹ Kiirasi ebunit akoloŋit ŋina ke Ekapolon, akoloŋit ŋina ekorere iteete iyes ibore ŋini aponi toŋatarae aneni kus,

² anerae acunakini ayoŋ ŋakwapin daadaŋ kimana Yerusalem kitijioto, ikamarete ikes Yerusalem, toŋatasi ŋiboro anakais ka toreikis ŋaberu akiryamakin ka ikes, erikoryo atutubet aŋituna apei alotaun, nai idoŋete ŋituŋa ŋuluce lotaun.

³ Ebuni nai Ekapolon alosit akitijiore ŋakwapin ŋun, lopite ŋolo sek abunio iŋes akitijio ŋimoe keŋ.

⁴ Akoloŋit ŋin ewoi Ekapolon alomukura a ŋolo a ŋikito ka olipa, alo Kide Yerusalem, etyaka emukura ŋol ŋaarei, akisyakin alo Kide tari To, min nen akadipaalat ŋina apolon nooi, iyotori atyaketait apei Kuju iyotori ŋinace Kwap.

⁵ Iemete iyes kitoro nakadipaalat ŋina ke emukura kaŋ, anerae itooyaaryo akadipaalat ŋin tari Asal. Iemete iyes lopite ŋolo aponiata atapapaa kus toemyata apaki ŋina amaranikinia akwap ŋirwa ŋulu araakar Usia erwosit ŋolo a Yudaya. Ebuni Ekapolon Akuj kaŋ, erukunete iŋes kaapei ka ŋimalaikan daadaŋ.

⁶ Emamukaun akica akoloŋit ŋin, emamukaun alilimu, kori ekuno.

⁷ Eruwor akoloŋit ŋin ŋina nyikwaan ka ŋunace, emamukaun apaaran, kori akuwar. Ekapolon bon eyeni akoloŋit ŋin.Ani iwalari eyakaun akica.

⁸ Akoloŋit ŋin eleleunete alo Yerusalem ŋakipi ŋuna eyaunete akiyar, eleleyarete atutubet apei nanam ŋina Atwan ka atutubet apei nanam ŋina a Mediteranian, eleleete ŋakipi ŋun akamu ka akiporo.

⁹ Akoloŋit ŋin, Ekapolon iŋes eruwor erwosit ŋolo ka akwap a daadaŋ, eruwor Ekapolon epei bon ka eruwor ekiro keŋ bon eyai.

¹⁰ Akwap daadaŋ akisyakin alo Geba tari Rimon, alo Kwap Yerusalem, emamukaun neni edipal, kori emukur nai ikeunio Yerusalem kileŋor kidiama, ido erubakini eyai nenipei sek ayai akisyakin alopuke a ŋolo a Benjamin tari neni koloŋ ayai epuke ŋolo ke ekiŋaren, tomyaa lopuke ŋolo ke ekoona, ido akisyakin anaduketait a ŋina aoyan a ŋina ka Ananel tari neni ecuyere epiini ŋolo ke erwosit.

¹¹ Iboikinosi ŋituŋa Yerusalem, mam nabo nyemunaaryo iŋes jik; erubakini Yerusalem eyakar akinapakina.

¹² Edeke lo iŋes eyauni Ekapolon neni a ŋakwapin a daadaŋ a ŋuna itijikinete Yerusalem: Ebosete ŋawat kec eriŋa ikes eyarete, ebosikinete ŋakonyen kec nakyes kec, ebosikinete ŋaŋajepa kec nakituka kec.

¹³ Akoloŋit ŋin, einakini Ekapolon ekabule ŋolo apolon nooi neni a ŋimoe a Yerusalem, ido ikamuni ŋinituŋanan akan a ekidunyet keŋ, tojikinos ikes make.

¹⁴ Ejiete ŋituŋa a Yudaya daŋ aiun Yerusalem. Ecununio ebari a ŋakwapin a daadaŋ a ŋuna idunyatar Yerusalem, egolid ŋolo alalan nooi ka esilipa ŋolo alalan nooi ta ŋilowi ŋulu alalak nooi.

¹⁵ Eari edeke ŋolo ikoni ŋolopei ŋol ŋaŋolei, ŋaŋolei-sigirya, ŋikaala, ŋisigirya ka ŋibaren daadaŋ analomarisinei a ŋimoe a Yerusalem.

¹⁶ Epote nai ŋituŋa anakwapin a daadaŋ a ŋuna itijiete Yerusalem akitipeiyor a ŋolokaru Yerusalem akilip neni a Erwosit, Ekapolon ŋolo Etiron, ido kinumunuma ŋasuban ŋuna a ŋisakaitei.

¹⁷ Ani keŋero ŋituŋa ka akwap ka adio akitipeiyor Yerusalem akilip neni ke Erwosit Ekapolon ŋolo etiron, emam akiru eryamunete.

¹⁸ Ani pa kelot Ŋijipitian akitipeiyor Yerusalem akinumunum ŋasuban ŋun, emam akiru eryamunete. Eyauni Ekapolon neni kec edeke ŋolo isicania ŋakwapin ŋuna apotu towout akitipeiyor akinumunum ŋasuban ŋuna a ŋisakaitei.

¹⁹ Eruwor ŋin akisicanet a Ijipit ka ŋakwapin daadaŋ ŋuna ewounete akitipeiyor akinumunum ŋasuban ŋuna a ŋisakaitei.

²⁰ Akoloŋit ŋin, igirakinio ŋakiro nu lokaadoŋoi ŋulu a ŋaŋolei, “Itesegitae aŋuna ke Ekapolon.” Esegeta ŋamoti ŋunakipoet ŋuna eya Kai ke Ekapolon, ikwaanikin ka ŋabakulei ŋuna eya kiŋaren a Namuroet.

²¹ Esegeta ŋamoti daadaŋ alo Yerusalem ka Yudaya erae ŋuna ke Ekapolon a ŋolo Etiron, ikotere nai daadaŋ ŋulu epote akitiya amuronot epedorete akisitiya ikes akipoo akiriŋ ŋina ka amuronot. Akoloŋit ŋin, edaunosi ŋikecurutak alo Kai ke Ekapolon a ŋolo Etiron.