Sakar 13 - Ebaibul

Akitaleuno anasecit

¹ “Akoloŋit ŋin, eŋakinio elelya neni a ŋituŋa a ekal a Daudi ka neni a ŋulu iboiyete alo Yerusalem, ikotere kitaleun ikes anasecit ka anaronis.”

² Ebala Ekapolon ŋolo Etiron ebe, “Akoloŋit ŋin, ekisari ayoŋ anakwap ŋirorwa a ŋakujo, ido nyetamunio nabo ikes jik. Alemari ayoŋ anakwap ŋulu itusubuna ŋikadwarak kaapei ka ŋulu ilipete ŋakujo.

³ Ani ketakanu nabo ekadwaran ece, etemarete atapapa kec ka atatoto kec neni kec ebe, ‘Emainina iyoŋ totwan, anerae ikilimokini iyoŋ isua alyokonu alokiro ke Ekapolon.’ Ani kedwar iŋes icumete ŋikauruunak keŋ iŋes toara.

⁴ Akoloŋit ŋin irumete, ŋileec ŋolo kadwaran daadaŋ a nakiro a ŋuna kebu iŋes todwar. Nyenapi iŋes elou ŋolo ke ekadwaran ŋolo itiyaunitae a ŋajul aŋuna ka adwarya alyokonu.

⁵ Etemari iŋes, ‘Nyarae ayoŋ ekadwaran. Arae ayoŋ eketan, ŋalup iŋes ayarya ayoŋ ŋinapei anasorokanu kaŋ.’

⁶ Ani kiŋit idiotuŋanan iŋes ebe, ‘Ai aponiata ŋajemei nu ŋuna eya nakuwan kon?’ Eboŋokini iŋes ebe, ‘Ekedicio ayoŋ alokai a ŋikonei kaŋ.’”

Aponi toarae Ekeyokon, ido apotu ŋamesekin kielar nariet

⁷ Ebala Ekapolon ŋolo Etiron ebe, “Okoe ekileŋ toten kicum ekeyokon kaŋ, kicum ekile ŋolo itiyae etic kaŋ! Toar iŋes, ikotere kielar ŋamesekin; etijikini ayoŋ ŋamesekin keŋ ŋuna adaun ekeyokon ŋolo iyoki,

⁸ ido alotooma akwap daadaŋ, etwakete ŋituŋa ŋulu edolit ŋiarei alotooma ŋiuniuni. Eyari ipei alotooma ŋiuniuni.

⁹ Ekatakini ayoŋ ŋituŋa ŋulu idoŋete, ekatakini ayoŋ ikes oliu ikwaŋina eliyere esilipa, ekatakini ayoŋ ikes, ikwaŋina ipoere egolid toanyunere erae kejok. Enyaraete ikes ekiro kaŋ, ido aboŋokini ayoŋ ikes. Alimokini ayoŋ ikes ebe, ‘Irae iyes ŋituŋa kaŋ,’ ido elimunete ikes ebe, ‘Erae Ekapolon Akuj kosi.’ ”