Sakar 12 - Ebaibul

Emunyaryo ŋimoe a Yerusalem

¹ Erae nu ŋakiro a Ekapolon aŋuna a Isirael, ŋakiro a Ekapolon a ŋolo abu tosub kidiama lopite ŋolo eyakar, tosub akwap, ido inak akiyar neni a ituŋanan. Ebala iŋes ebe,

² “Esikwaanikini ayoŋ Yerusalem ka ekopo ŋolo eyai epiini ŋolo ikitemerakini, ani kemata ŋituŋa ŋulu idunyatar iŋes epiini keŋ, iteritereonor ikwa ŋikamerak. Ani ikamaryo Yerusalem, ikamaryo ŋitaunio ŋuluce daŋ ŋulu eya Yudaya.

³ Akoloŋit ŋina ecunakinotor ŋakwapin a akwap a daadaŋ imanito Yerusalem, esikwaanikini ayoŋ Yerusalem ka ataaba ŋina nyesubanakin. Ewanasi make ŋakwapin daadaŋ ŋuna ikatakinete alemar iŋes.

⁴ Apaki ŋin, ewuakini ayoŋ akuryanu naŋolei ŋuna a ŋimoe a Yerusalem daadaŋ ka esimatimataari ŋikametok a ŋaŋolei a ŋun daadaŋ. Eyoki ayoŋ ŋituŋa a Yudaya, nai etumudukani ŋaŋolei a ŋimoe kec.

⁵ Etemarete nai ŋatekerin a Yudaya make ebe, ‘Itogogoŋit Ekapolon ŋituŋa keŋ ŋulu iboiyete alo Yerusalem.’

⁶ “Apaki ŋin, esikwaanikini ayoŋ ŋatekerin a Yudaya ka akim ŋina enomi amoni, kori ŋina enomi ŋatukon a ŋikinyom. Emunyarete ŋituŋa a Yudaya ŋituŋa a ŋakwapin a ŋuna idunyatar ikes. Idoŋete ŋituŋa a Yerusalem lotaun emam ŋace.

⁷ “Ayoŋ Ekapolon ainakini akiloun neni a ŋasigarya a Yudaya mono, ikotere apolou ŋina eryamunete ŋipapae a Daudi ka ŋituŋa a Yerusalem nyeruwor ŋina iloit ŋina a ŋituŋa a Yudaya a ŋuluce.

⁸ Apaki ŋin, iuryari Ekapolon ŋulu iboiyete alo Yerusalem, tari ŋulu epalag alo kidiŋ kec, egogoŋioto lopite ŋolo agogoŋio Daudi. Ipukaete ŋipapae a Daudi ikes lopite ŋolo ipukaa emalaika a Ekapolon, lopite ŋolo ipukator Akuj alope.

⁹ Apaki ŋin, amunyari ayoŋ akwap daadaŋ ŋina ikatakini akisiiryakin Yerusalem.

Akigworo ŋolo apotu ikes kicuma

¹⁰ “Elelebikini ayoŋ neni a ŋipapae a Daudi ka ŋituŋa ŋuluce ŋulu a Yerusalem etau ŋolo ka akisyon ka ŋolo ka akilip. Iŋoliunete ikes neni kaŋ a ŋolo apotu ikes kicuma, igworete ikes aŋuna kaŋ lopite ŋolo igworor ituŋanan aŋuna a ikoku a ŋini sek arae ipei bon. Iyaloloŋete ikes aŋuna keŋ nooi, lopite ŋolo iyaloloŋio ituŋanan ikoku ŋini erae ikiyae.

¹¹ Epoloor nooi akigworo a Yerusalem apaki ŋin, ikokini akigworo ŋina abu toyakaun Adad Rimon, nakadipaalat a emukura ŋolo enyaritae Megido.

¹² Ikalounete ŋituŋa ka akwap a ŋin, a ŋulutuŋa anateker kec, igworete ŋaberu kec ka ikes: Ŋiletok a Daudi ka ŋaberu kec, ŋiletok a Nasan ka ŋaberu kec.

¹³ Ŋiletok a Lepi ka ŋaberu kec, ŋiletok a Simei ka ŋaberu kec,

¹⁴ Igworete ŋatekerin ŋunace daŋ daadaŋ ka ŋaberu kec.”