Rus. 4 - Ebaibul

Toruwor Rus aberu a Boas

¹ Tonyou Boas tolot lotemu diyete epuke ke etaun kiboikin nen. Apaki ŋinapei, totubun eyenet ŋolo sek alimokinit Boas Rus. Tema Boas, “Iŋes lo, toriu laalo kiboikin ne.” Toriu ekile ŋol kiboikin.

² Toyarau Boas ŋikasikou ŋulu ke etaun ŋitomon, tolimok ikes tema, “Kiboikinos ne.” Kiboikinos nai ikes.

³ Tosodi tolimok eyenet kec ŋol tema, “Ikiinakini iyoŋ Naomi, ŋina aboŋu alo Moab iwadio a emanikor a ŋolo sek arae ŋolo alokaato yok a Elimelek.

⁴ Abu ayoŋ otamak ebe itemokino ekesiira iyoŋ ŋakiro nu, ebe tocamu akiuryar emanikor ŋol epupete lu ŋulu iboiyete a ne ka alokiŋaren ŋikasikou lu ŋulu a ŋituŋa kaŋ. Ani kicamit akiuryar emanikor ŋol, kiurya; nai ani pa kiuryarii, tolimokinae ayoŋ, ikotere oyenu, anerae emam ice epol alokiŋaren kon ŋini iuryari iŋes, ekewuapit ayoŋ iyoŋ.” Tolimu ekile ŋol tema, “Euryari ayoŋ emanikor ŋol.”

⁵ Tosodi Boas tolimu tema, “Akoloŋit ŋina iuryarya iyoŋ emanikor ŋol aneni a Naomi, idau iyoŋ acamun akiuryar Rus daŋ, aberu ke ekasyon, torubakinia ekiro keŋ aneni a ŋinibore daadaŋ erae ŋini keŋ.”

⁶ Tema eyenet ŋol, “Nyapedori ayoŋ akiuryar, acepaki ajamakini ayoŋ ŋulu kaŋ ke elope; kiurya iyoŋ tari kerae sek ayoŋ emaikina eurya daŋ, anerae emam ayoŋ epite ŋolo kiuryaret.”

⁷ Arae lo epite ŋolo koloŋ sek erumeneneere ka elokonyere ŋiboro alo Isirael aŋuna ka akitogogoŋ ŋinibore daadaŋ. Alacuni ituŋanan amukat keŋ inak ŋini agyeli ŋiboro keŋ, toruwor ŋin akitogogoŋiet acamun kec.

⁸ Tema eyenet a Boas ŋol, “Kiurya iyoŋ toruwor ŋulu kon”, tosodi tolacu amukat keŋ.

⁹ Tolimok Boas ŋikasikou ka ŋituŋa daadaŋ tema, “Nakuwar na, irae iyes ŋisuudae ŋulu iyenete atemar acamu ayoŋ akiuryar Naomi ka ibore daadaŋ ŋini sek arae ŋini a Elimelek ka daadaŋ ŋini arae ŋini a Kilion ka Malon.”

¹⁰ Rus daŋ ŋina Moabit, aberu a Malon, adau ayoŋ acamun aruwor aberu kaŋ, torubakinia ekiro a ekasyon aneni a ŋinibore daadaŋ erae ŋini keŋ. Ikotere ekiro a keŋ nyeŋopiya aneni a ŋikaitotoi keŋ ka alotuŋa a ŋulu ka akibois keŋ. Irae iyes ŋisuudae nakuwar na.

¹¹ Temasi ŋituŋa daadaŋ ŋulu aya lotemu diyete epuke kaapei ka ŋikasikou ebe, “Ikirae isua ŋisuudae. Kisikwaanik Akuj aberu ŋin ŋina elomuni lokal kon ka Rakel ka Lea ŋuna apotu kitatakanut ŋituŋa ŋulu a Isirael. Iyoŋ daŋ touri ŋidwe alo Epurata kiturubak ekiro a Ekapolon alo Betelem.

¹² Kikwaanikin ekal kon ka ŋolo a Peres, a ŋolo auruuni Tamar ŋina arae aberu a Yuda, a ŋolo erae alyasit ŋina ikiinakini Akuj iyoŋ anaberu a ŋinasorokit a na.”

Ŋirorwa atapapaa a Daudi

¹³ Ya Boas Rus toruwor aberu keŋ, toruko ka iŋes kiŋarak Akuj Rus toryamu akook; tosodi kidou isapat.

¹⁴ Tolimokis ŋaberu Naomi temasi, “Kipuroe Ekapolon ŋolo pa abu ikimyek iyoŋ tari tokona emam ekeuryaran; ikigasi torwoniar ikoku en alo Isirael.”

¹⁵ Ikigasi daŋ toruwor iŋes ŋini eiuni akiyar kon ka ŋini ikidari iyoŋ alorwa a ŋulu ka amojoŋu kon, anerae adau nateran kon, ŋina ikimina iyoŋ akidoun isapat ŋini ejok nooi aneni kon akilo tari ŋisapa ŋulu alalak.

¹⁶ Todaku Naomi ikoku kiperik nakejen keŋ, toruwor iŋes akedaran a ikoku.

¹⁷ Tolimokis ŋaberu ŋuna arae ŋakidunyet ikoku ekiro temasi, “Erae en isapat ŋini idounitoe aŋuna a Naomi.” Tosodi tolimokis ekiro a ikoku Obed. Obed iŋes abu touru Yese ŋolo arae papa a Daudi.

¹⁸ Erae lu ŋirorwa atapapaa Peres. Abu Peres touru Esiron,

¹⁹ touru Esiron Ram, touru Ram Aminadab,

²⁰ touru Aminadab Nason, touru Nason Salimon,

²¹ touru Salimon Boas, touru Boas Obed,

²² touru Obed Yese ka touru Yese Daudi.