Rus. 3 - Ebaibul

Kiŋitak Rus Boas akiuryar iŋes

¹ Tema Noami neni anateran keŋ, “Nakoku, nyeejok mono ayoŋ akiwarakin iyoŋ ekal kon a?

² Nai tokona Boas lo, eyenet yok ŋolo ibu iyoŋ kitiyata ka ŋirosorok keŋ etic keŋ. Kiira, ataboŋ na, elosi Iŋes akipyet ŋikinyom analos.

³ Itemokino nai iyoŋ kiloŋar ka kiosakin akimyet, ido tonap ŋilowi kon ŋulu ajokak, tolot nalos. Nyiteyenikin iŋes akitodol ŋina irikakinia akimuj ka akimat.

⁴ Ido kiteyenikin nai apaki ŋina elosyo iŋes akiper. Nai toyenu neni eperenene iŋes. Ani ilomari iyoŋ nen, kiwolo ŋakejen keŋ, toper nen. Ikilimokini iŋes iyoŋ ŋuna emaikina iyoŋ kitiya.”

⁵ Tolimok Rus tata keŋ tema, “Ŋuna ilimu iyoŋ daadaŋ etiyakini ayoŋ.”

⁶ Tolot Rus nalos, kitiya ikwaŋinapei alimokinitor tata keŋ iŋes.

⁷ Kimuj Boas ka tomat, tolakar etau keŋ nooi, ido nai tolot akiper neni adupuk analos anawae atukot a ŋikinyom. Bu Rus pa eyeni iŋes, kiwolo ŋakejen a Boas, ido toper nen.

⁸ Ani edoli kidiŋ akuwar, kitamaranik akaterot Boas, tosodi kibelekin. Nai! Toryamu aberu eperi anakejen keŋ.

⁹ Kiŋit iŋes aberu ŋin tema, “Ŋae iyoŋ?” Toboŋok Rus tema, “Ekapolon arae ayoŋ Rus, ido kimyekinae ayoŋ oruwor aberu kon, anerae irae iyoŋ eyenet alokile kaŋ. Aŋun, iyoŋ emaikina ikiurya ayoŋ.”

¹⁰ Tolimok Boas Rus tema, “Ikiterereŋ Akuj iyoŋ nakoku, anerae itoodiu iyoŋ ejok nooi arimao kon apaki na akilo ŋina ibunio iyoŋ kimiidikin neni a tata kon, kimyek ibore daadaŋ. Nyeloto iyoŋ neni a ŋisorok, kekulyakaka kori kebarito.

¹¹ Nai tokona nakoku, nyikuryaniar. Ŋuna daadaŋ ilimuni iyoŋ etiyakini ayoŋ neni kon, anerae eyenete ŋituŋa kaŋ daadaŋ atemar irae iyoŋ aberu ŋina ajokan.

¹² Nai tokona, tari karae ayoŋ kire eyenet, eyai eyenet ece ŋolo eapi ayena keŋ aneni alokile kon nooi akilo ayoŋ.

¹³ Toper tokona nakwaare ne, ido ani moi taparacu oanyutu erae kikiuryaari iŋes iyoŋ, ejok! Itemokino iŋes tocamu ŋun. Nai ani pa kecamit iŋes akiuryar iyoŋ, ŋun nai ekoŋio ayoŋ alokiro ka Akuj a ŋina eyari atemar ekeuryari ayoŋ iyoŋ. Toper akitodol taparacu.”

¹⁴ Toper Rus nakejen a Boas akitodol taparacu, ido tonyou taparacu sek eriŋa akwap iryono. Totamak Boas atemar, Nyemaikina ŋituŋa toyenut atemar abunit aberu ne nalos.

¹⁵ Tosodi tema, “Yau anaŋga ŋina irwat iyoŋ ŋin, totiŋ ejok.” Totiŋ Rus anaŋga, tookok Boas ŋikinyom ŋaokokinet ŋakanikapei, ido inak Rus toboŋorya lotaun.

¹⁶ Tolomu Rus lotaun, tolot neni a tata keŋ. Kiŋit tata keŋ iŋes tema, “Ŋae iyoŋ nakoku?” Tosodi Rus tolimok iŋes daadaŋ ŋuna etiya Boas neni keŋ.

¹⁷ Tolimu daŋ tema, “Abu ekile ŋol okookok ayoŋ ŋikinyom ŋaokokinet ŋakanikapei, anerae abu iŋes okotema ayoŋ ‘Nyiboŋori iyoŋ neni a tata kon eororete ŋakan.’ ”

¹⁸ Tema Naomi neni anateran keŋ, “Kiboikin nakoku, akitodol ŋina iyanyunia epite ŋolo itiyakinotor ŋakiro, anerae nyieŋuni ekile ŋol mati kirikak ŋakiro ŋun nakuwar na.”