Pil. 1 - Ebaibul

Emalas

¹ Ayoŋ Paulo emabus aŋuna a Yesu Kristo ka lokaato yok Timoteo, ikigirit abaruwa na neni kon Pilemon ŋolo minat, ŋolo ikirae ka isua ŋiketiyak etic a Kristo.

² Igirit daŋ neni ka Apia nakaato yok ka Arikipo ŋolo ikirae ka isua ŋisigarya a Yesu, ta neni ka atukot a Ŋikristo a ŋulu ecunanakin kai kon.

³ Toyai ajokis ka ekisil ŋulu eponito aneni ka Akuj a Papa yok ka aneni a Ekapolon Yesu Kristo neni kus.

Amina a Pilemon ka anupit keŋ

⁴ Apaki daadaŋ ŋina akatamunia ayoŋ iyoŋ anakilip kaŋ, alakar ayoŋ neni ka Akuj kaŋ.

⁵ Anerae apupi ayoŋ ŋuna ka amina ka anupit kon Ekapolon Yesu ka ŋituŋa ŋulu ka Akuj daadaŋ.

⁶ Elipi ayoŋ Akuj atemar kiyatak nooi anakimorikina yok ananupit ayenut ŋina a ŋarereŋisyo a daadaŋ a ŋuna erae ŋuna yok alotooma Kristo.

⁷ Lokaato, aryamu ayoŋ alelyan ŋina alalan ka atitinyu aŋuna ka amina kon, anerae italaka iyoŋ ŋitai a ŋituŋa a ŋulu ka Akuj.

Kimaima Paulo Pilemon akisil ka Onesimo

⁸ A ŋakiro a nu, kejoikinit ayoŋ ikwapei lokaato kon alotooma Kristo akicikakin iyoŋ akitiya ŋuna itemokino akitiya;

⁹ nai aŋuna ka amina, ayoŋ Paulo acamit akimaima iyoŋ. Etiyae ayoŋ nu, tari karae ekiyakia ka ŋolo tokona akaenitae alomabus aŋuna a Yesu Kristo.

¹⁰ Ekemaimai iyoŋ aŋuna ka Onesimo a lokoku kaŋ, a ŋolo aruwor ayoŋ papa keŋ anaenenu kaŋ.

¹¹ Paaran sek, arae Onesimo ituŋanan ŋini pa ikiŋarakini iyoŋ, nai tokona ikiŋarakini iŋes iyoŋ ka ayoŋ nooi.

¹² Eyakuunit tokona ayoŋ iŋes neni kon, iŋes ŋolo emina etau kaŋ nooi.

¹³ Acamit sek ayoŋ akisidoŋ iŋes oruko ka ayoŋ a ne, ikotere ekeŋarakini ayoŋ, akilo iyoŋ akiŋarakin ayoŋ apaki na ŋina ayakar mabus aŋuna a Ŋakiro a ŋuna Ajokak.

¹⁴ Nai pa acamit ayoŋ akitiya idiobore alotooma ŋun eriŋa nyecamuna iyoŋ, ikotere nyeruwor ajokis kon ŋina itiŋaunitae, nai torae acamit kon a elope.

¹⁵ Acepaki ŋakiro nu ketyakarere Onesimo aneni kon apaki ŋina euruwana, ikotere nai ani eboŋuni, toruko ka iyoŋ jik.

¹⁶ Nyeriŋa tokona iŋes erae epito, ajokyar akilo epito; erae iŋes lokaato ŋolo minat alotooma Kristo. Erae iŋes lokaato ŋolo minat aneni kaŋ, nai ŋolo minat nooi adepar aneni kon, iŋes ŋolo erae epito ka torae lokaato kon alotooma Ekapolon!

¹⁷ Aŋun, ani kimarit iyoŋ atemar arae ayoŋ erukitos kon, kijau Onesimo lopite ŋolo ikijaunia iyoŋ ayoŋ.

¹⁸ Ani keyai idiobore ŋini esecit iŋes kori keyakar iŋes amica kon, kimicae ayoŋ.

¹⁹ Egiri ayoŋ nu ka akan kaŋ a elope, ayoŋ Paulo akataci iyoŋ. (Nai nyitemokino ayoŋ eketatamu iyoŋ atemar erae neni kaŋ iryamunitor iyoŋ akiyar kon ŋina kitete alotooma Kristo.)

²⁰ Nai lokaato kaŋ, okoe kiŋarakinae aŋuna ke Ekapolon; kitalaka etau kaŋ alotooma Kristo!

²¹ Ekegirakinit ayoŋ iyoŋ abaruwa, anerae ayeni atemar iwuapi iyoŋ ŋakiro ŋuna akalimokini ayoŋ iyoŋ--ka itiyakini tari ŋuna iloito ŋun.

²² Nabo daŋ, kitemok agule ŋina a ŋipeyok aŋuna kaŋ, anerae egeno ayoŋ atemar eboŋokini Akuj ŋakilipeta kus daadaŋ, ekenyakun ayoŋ neni kus.

Ŋimalasyo ŋulu esidyok

²³ Ikimalae iyoŋ Epapuras ŋolo ikirae ka ayoŋ ŋimabus aŋuna a Kristo.

²⁴ Ikimalaete nabo ata Mariko, Aristako, ka Demas ta Luka ŋulu ikitiyae ka ayoŋ.

²⁵ Toyai ajokis ŋina ke Ekapolon Yesu Kristo neni kus daadaŋ.